Amerika jurnalı Ermənistan ilə Azərbaycan

arasında müharibə ehtimalından yazır

ABŞ-da çıxan “The National Interest” nəşri siyasi şərhçi Cek Malkeyrin “Qarşıdurma: Ermənistan ilə Azərbaycan arasında gözlənilən müharibə” (http://www.nationalinterest.org/feature/face-the-coming-war-between-armenia-azerbaijan-12585) sərlövhəli məqaləsini dərc edib. Müəllif məqalədə Azərbaycanın Ermənistan silahlı qüvvələri tərəfindən işğal edilmiş Dağlıq Qarabağ regionu ətrafında gərginləşən vəziyyətdən yazır və Ermənistan ilə Azərbaycan arasında müharibə ehtimalını təhlil edir.

C.Malkeyr qeyd edir ki, Azərbaycanın qərb hissəsində yerləşən Dağlıq Qarabağ regionu fəal hərbi əməliyyatlar dayandırıldığı andan Ermənistanın nəzarətindədir. Azərbaycan öz ərazisinin beşdə bir hissəsindən əl çəkmək niyyətində deyil, buna görə də öz torpaqları üzərində nəzarəti bərpa etmək səylərini davam etdirir.

C.Malkeyr vurğulayır ki, son aylarda münaqişə zonasında silahlı toqquşmalar tez-tez baş verir. Ermənistan öz ordusunu silahlandırmaqda Azərbaycan ilə rəqabət aparmaq iqtidarında deyil. Sonra şərhçi müharibə başlayacağı halda potensial hərbi əməliyyatların coğrafiyasını, Azərbaycan ordusunun Xankəndi və Kəlbəcər istiqamətində irəliləməsi vəzifələrini təhlil edir.

Müəllif sonda yazır ki, “hərbi qüdrətin nisbəti və coğrafi amillər status-kvonun dəyişməsi baxımından Bakının üstünlüyünü göstərir” ki, bu da erməniləri müdafiə mövqeyi tutmağa məcbur edir.

Azərbaycan.-2015.- 10 aprel.- S.5.