ADİU ilə Rusiyanın “Ali İqtisadiyyat Məktəbi” Milli

Tədqiqat Universiteti arasında saziş imzalanıb

Azərbaycan Respublikası təhsil nazirinin müavini Ceyhun Bayramovun rəhbərlik etdiyi nümayəndə heyətinin Moskvaya səfəri çərçivəsində Rusiyanın “Ali İqtisadiyyat Məktəbi” Milli Tədqiqat Universitetinin rektoru, professor Yaroslav Kuzminov ilə görüş keçirilib.

Görüş zamanı iki ölkə arasında ali təhsil sahəsində əməkdaşlığın inkişaf etdirilməsi üçün geniş imkanların mövcud olması diqqətə çatdırılıb. Daha sonra Azərbaycan Dövlət İqtisad Universitetinin rektoru, professor Ədalət Muradov və Rusiyanın “Ali İqtisadiyyat Məktəbi” Milli Tədqiqat Universitetinin (AİM-MTU) rektoru, professor Yaroslav Kuzminov iki universitet arasında “Elm, tədris və mədəniyyət sahəsində əməkdaşlığa dair” saziş imzalayıblar.

Sazişdə Rusiyanın nüfuzlu ali təhsil müəssisələrindən biri olan “Ali İqtisadiyyat Məktəbi” Milli Tədqiqat Universiteti ilə tələbə mübadiləsi, ikili diplom proqramlarının hazırlanması, birgə elmi-tədqiqat layihələrinin, müəllim və tələbələr üçün təcrübə proqramlarının həyata keçirilməsi və digər sahələrdə uzunmüddətli əməkdaşlıq nəzərdə tutulub. Eyni zamanda sazişdə ADİU-nun tələbələrinin təhsillərini AİM-MTU-nun magistratura pilləsində davam etdirməsi, yeni təlim texnologiyalarından birgə istifadə olunması da öz əksini tapıb.

Qeyd edək ki, cari ilin fevralında AİM-MTU tərəfindən sonuncu kurs tələbələri üçün olimpiadanın məhz ADİU-nun bazasında keçirilməsi iki universitet arasında əməkdaşlığa xüsusi təkan verib. Rusiyanın aparıcı ali məktəblərindən biri kimi dünya universitetlərinin reytinq siyahısına daxil olan AİM-MTU müasir tədris metodları və idarəetmə sistemlərinin tətbiqi, ali təhsillə elmi tədqiqatların səmərəli inteqrasiyasının təmin olunması, Avropa və Amerikanın qabaqcıl universitetləri ilə ikili diplom proqramlarının reallaşdırılması istiqamətində mühüm uğurlar əldə edib.

Azərbaycan.-2015.- 21 aprel.- S. 5.