“Azərbaycan Respublikasında ovçuluqla bağlı bəzi normativ hüquqi aktların təsdiq edilməsi haqqında” Azərbaycan Respublikası Nazirlər Kabinetinin 2004-cü il 30 sentyabr tarixli 147 nömrəli qərarında dəyişikliklər edilməsi barədə

Azərbaycan Respublikasının Nazirlər Kabinetinin qərarı

№ 104 Bakı şəhəri, 10 aprel 2015-ci il

“Ovçuluq haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2004-cü il 26 may tarixli 69 nömrəli fərmanında dəyişikliklər edilməsi haqqında” Azərbaycan Respublikası Prezidentinin 2014-cü il 15 dekabr tarixli 400 nömrəli fərmanına uyğun olaraq Azərbaycan Respublikasının Nazirlər Kabineti qərara alır:

Azərbaycan Respublikası Nazirlər Kabinetinin 2004-cü il 30 sentyabr tarixli 147 nömrəli qərarı (Azərbaycan Respublikasının Qanunvericilik Toplusu, 2004, № 9, maddə 759, № 12, maddə 1079; 2005, № 6, maddə 535; 2007, № 10, maddə 1013; 2008, № 2, maddə 132) ilə təsdiq edilmiş “Ovçuluq biletinin forması, qeydiyyatı və ovçuluq fəaliyyəti ilə məşğul olmaq istəyən şəxslərə verilməsi qaydası”nda aşağıdakı dəyişikliklər edilsin:

1. 1.2-ci bənddə “Azərbaycan Respublikası Ekologiya və Təbii Sərvətlər Nazirliyinin müvafiq orqanı” sözləri “Azərbaycan Respublikasının Ekologiya və Təbii Sərvətlər Nazirliyi və Azərbaycan Respublikası Xüsusi Dövlət Mühafizə Xidmətinin tabeliyində olan “Hərbi Ovçuluq İttifaqı” Məhdud Məsuliyyətli Cəmiyyətinin üzvlərinə münasibətdə Azərbaycan Respublikasının Xüsusi Dövlət Mühafizə Xidməti” sözləri ilə əvəz edilsin.

2. 1.4-cü bəndə “Nazirliyinin” sözündən sonra “və Azərbaycan Respublikası Xüsusi Dövlət Mühafizə Xidmətinin tabeliyində olan “Hərbi Ovçuluq İttifaqı” Məhdud Məsuliyyətli Cəmiyyətinin üzvlərinə münasibətdə Azərbaycan Respublikası Xüsusi Dövlət Mühafizə Xidmətinin” sözləri əlavə edilsin və həmin bənddə “yaratdığı” sözü “yaratdıqları” sözü ilə əvəz edilsin.

3. 2.1-ci bənd aşağıdakı redaksiyada verilsin:

“2.1. Azərbaycan Respublikasının Ekologiya və Təbii Sərvətlər Nazirliyi tərəfindən verilən ovçuluq bileti bu qaydanın tələblərinə uyğun hazırlanır və 1 nömrəli əlavədə göstərilən formada verilir.”.

4. 2.2-ci bəndin birinci abzası aşağıdakı redaksiyada verilsin:

“2.2. Azərbaycan Respublikasının Ekologiya və Təbii Sərvətlər Nazirliyi tərəfindən verilən ovçuluq bileti aşağıdakı kimidir:”.

5. 2.2-ci bəndin səkkizinci abzasında “onu verən müvafiq orqanın rəhbərinin” sözləri “Azərbaycan Respublikası Ekologiya və Təbii Sərvətlər Nazirliyinin səlahiyyətli şəxsinin” sözləri ilə əvəz edilsin.

6. Aşağıdakı məzmunda 2.3-cü və 2.4-cü bəndlər əlavə edilsin:

“2.3. Azərbaycan Respublikasının Xüsusi Dövlət Mühafizə Xidməti tərəfindən tabeliyində olan “Hərbi Ovçuluq İttifaqı” Məhdud Məsuliyyətli Cəmiyyətinin üzvlərinə verilən ovçuluq bileti bu qaydanın tələblərinə uyğun hazırlanır və 2 nömrəli əlavədə göstərilən formada verilir.

2.4. Azərbaycan Respublikasının Xüsusi Dövlət Mühafizə Xidməti tərəfindən verilən ovçuluq bileti aşağıdakı kimidir:

2.4.1. ovçuluq biletinin cildi tünd-qırmızı rəngdə olur və ölçüləri 7,0 sm x 10,0 sm təşkil edir;

2.4.2. ovçuluq biletinin üz qabığının yuxarı hissəsində Azərbaycan Respublikasının Dövlət gerbi həkk olunur və onun altında “Azərbaycan Respublikasının Xüsusi Dövlət Mühafizə Xidməti” sözləri yazılır;

2.4.3. ovçuluq biletinin üz qabığının orta hissəsində iri hərflərlə “OVÇULUQ BİLETİ” sözləri yazılır;

2.4.4. ovçuluq biletinin içərisində birinci səhifəsinin yuxarı hissəsində “Azərbaycan Respublikasının Xüsusi Dövlət Mühafizə Xidməti” sözləri yazılır;

2.4.5. ovçuluq biletinin birinci səhifəsinin aşağı sol hissəsində ovçuluq bileti alan şəxsin rəngli fotoşəkli üçün yer ayrılır;

2.4.6. ovçuluq bileti alan şəxsin fotoşəklinin sağ hissəsində ovçuluq bileti alan şəxsin ardıcıl olaraq soyadı, adı, atasının adı və təvəllüdü göstərilir;

2.4.7. ovçuluq biletinin ikinci səhifəsinin orta hissəsində ovçuluq biletinin nömrəsi, ovçuluq biletinin verildiyi tarix, qeydiyyat nömrəsi, Azərbaycan Respublikası Xüsusi Dövlət Mühafizə Xidmətinin səlahiyyətli şəxsinin vəzifəsi, imzası və möhür yeri göstərilir;

2.4.8. ovçuluq biletinin üçüncü səhifəsində Azərbaycan Respublikası Xüsusi Dövlət Mühafizə Xidmətinin tabeliyində olan “Hərbi Ovçuluq İttifaqı” Məhdud Məsuliyyətli Cəmiyyətinin üzvünün şəxsiyyət vəsiqəsinin seriyası və nömrəsi, verildiyi tarix, kim tərəfindən verilib, ev ünvanı və şəxsi imzası göstərilir;

2.4.9. ovçuluq biletinin dördüncü səhifəsində Azərbaycan Respublikası Xüsusi Dövlət Mühafizə Xidmətinin tabeliyində olan “Hərbi Ovçuluq İttifaqı” Məhdud Məsuliyyətli Cəmiyyətinin üzvünün minimum sınağı verməsi barədə qeydlər göstərilir;

2.4.10. ovçuluq biletinin beşinci və altıncı səhifələrində Azərbaycan Respublikası Xüsusi Dövlət Mühafizə Xidmətinin tabeliyində olan “Hərbi Ovçuluq İttifaqı” Məhdud Məsuliyyətli Cəmiyyətinin üzvünə məxsus ov aləti və silahın adı, modeli (markası), növü, nömrəsi və kalibri göstərilir;

2.4.11. ovçuluq biletinin yeddinci səhifəsində Azərbaycan Respublikası Xüsusi Dövlət Mühafizə Xidmətinin tabeliyində olan “Hərbi Ovçuluq İttifaqı” Məhdud Məsuliyyətli Cəmiyyətinin üzvünə məxsus ov itləri barədə qeydlər aparılır;

2.4.12. ovçuluq biletinin səkkizinci səhifəsində xüsusi qeydlər göstərilir;

2.4.13. ovçuluq biletinin doqquzuncu və onuncu səhifələrində ovçuluq bileti alan şəxs üçün yaddaş göstərilir.”.

7. 3.1-ci bəndə “Nazirliyi” sözündən sonra “və Azərbaycan Respublikası Xüsusi Dövlət Mühafizə Xidmətinin tabeliyində olan “Hərbi Ovçuluq İttifaqı” Məhdud Məsuliyyətli Cəmiyyətinin üzvlərinə münasibətdə Azərbaycan Respublikası Xüsusi Dövlət Mühafizə Xidməti” sözləri əlavə edilsin.

8. 3.3-cü bənddə “müvafiq orqanının rəhbəri (o olmadıqda onun səlahiyyətlərini icra edən)” sözləri “və Azərbaycan Respublikası Xüsusi Dövlət Mühafizə Xidmətinin tabeliyində olan “Hərbi Ovçuluq İttifaqı” Məhdud Məsuliyyətli Cəmiyyətinin üzvlərinə münasibətdə Azərbaycan Respublikası Xüsusi Dövlət Mühafizə Xidmətinin səlahiyyətli şəxsi” sözləri ilə əvəz edilsin.

9. 4.2-ci bənddə “Azərbaycan Respublikası Ekologiya və Təbii Sərvətlər Nazirliyinin müvafiq orqanında” sözləri “Azərbaycan Respublikasının Ekologiya və Təbii Sərvətlər Nazirliyində və Azərbaycan Respublikası Xüsusi Dövlət Mühafizə Xidmətinin tabeliyində olan “Hərbi Ovçuluq İttifaqı” Məhdud Məsuliyyətli Cəmiyyətinin üzvlərinə münasibətdə Azərbaycan Respublikasının Xüsusi Dövlət Mühafizə Xidmətində” sözləri ilə əvəz edilsin.

10. 4.3-cü bəndə “müddətinə” sözündən sonra “(Azərbaycan Respublikası Xüsusi Dövlət Mühafizə Xidmətinin tabeliyində olan “Hərbi Ovçuluq İttifaqı” Məhdud Məsuliyyətli Cəmiyyətinin üzvlərinə münasibətdə müddətsiz)” sözləri əlavə edilsin.

11. “Ovçuluq biletinin forması, qeydiyyatı və ovçuluq fəaliyyəti ilə məşğul olmaq istəyən şəxslərə verilməsi qaydası”na əlavə 1 nömrəli əlavə hesab edilsin və həmin əlavəyə aşağıdakı məzmunda ad verilsin:

“Azərbaycan Respublikasının Ekologiya və Təbii Sərvətlər Nazirliyi tərəfindən verilən ovçuluq biletinin forması”.

Artur RASİ-ZADƏ,

Azərbaycan Respublikasının Baş naziri

Azərbaycan.-2015.-22 aprel.-S.1.