Milli Məclisin nümayəndə heyəti Tokioda Azərbaycan-Yaponiya

parlamentlərarası dostluq qrupunun üzvləri ilə görüşüb

Milli Məclisin sədri Oqtay Əsədov başda olmaqla Yaponiyada rəsmi səfərdə olan Azərbaycan parlamentinin nümayəndə heyəti aprelin 22-də Azərbaycan-Yaponiya parlamentlərarası dostluq qrupunun üzvləri ilə görüşüb.

Azərbaycan Milli Məclisinin sədrinin rəhbərlik etdiyi nümayəndə heyətini Tokioda salamlamaqdan məmnun olduğunu deyən Yaponiyanın iqtisadi və maliyyə siyasəti üzrə dövlət naziri, Azərbaycan-Yaponiya parlamentlərarası dostluq qrupunun yaponiyalı rəhbəri Akira Amari əmin olduğunu bildirib ki, bu səfər Yaponiya ilə Azərbaycan arasında əməkdaşlığın möhkəmlənməsində mühüm rol oynayacaq.

Milli Məclisin sədri Oqtay Əsədov, öz növbəsində, nümayəndə heyətinin səfər proqramının çox zəngin olduğunu, Yaponiya İmperatoru, Baş nazir, parlamentin iki palatasının sədrləri ilə keçirilən görüşlərin iki dövlət arasında əlaqələrin inkişafına mühüm təsir göstərəcəyini vurğulayıb. Dəvətə görə minnətdarlığını bildirən spiker qeyd edib ki, bu, bizim üçün böyük nailiyyətdir. İki ölkə parlamentləri arasında əməkdaşlıq münasibətlərinə toxunan Oqtay Əsədov, bu əlaqələrin inkişafında dostluq qrupunun rolunu xüsusi qeyd edib. Qrup üzvləri arasında sıx əlaqələrin vacibliyini vurğulayan Milli Məclisin sədri bildirib ki, bir-birini daha yaxşı anlamaqda bu münasibətlərin mühüm rolu var. Azərbaycan parlamentində 70-dən çox ölkənin parlamentləri ilə dostluq qrupunun olduğunu diqqətə çatdıran spiker bu qrupların hər birinin sıx əməkdaşlıq çərçivəsində fəaliyyət göstərməyə çalışdığını bildirib. Dostluq qrupunun üzvlərinə uğurlar arzulayan Oqtay Əsədov qeyd edib ki, qrup üzvləri arasında dostluq münasibətlərinin möhkəmliyi iki xalq arasında əməkdaşlığın daha da yaxınlaşmasına töhfələr verəcək.

Görüşdə dostluq qrupunun gələcək fəaliyyətinin istiqamətləri ilə bağlı fikir mübadiləsi aparılıb.

Sonra xatirə hədiyyələri təqdim olunub.

Vüqar Ağayev

AZƏRTAC-ın xüsusi müxbiri

Tokio

Azərbaycan.-2015.- 24 aprel.- S.2.