IDEA İctimai Birliyi “Uğura gedən yol” layihəsinə başlayıb

IDEA İctimai Birliyi gəncləri ətraf mühit sahəsində ixtisaslaşmağa və bu sahədə çalışmağa həvəsləndirmək məqsədilə aprel ayından etibarən “Uğura gedən yol” adlı layihəyə başlayıb.

İctimai Birlikdən AZƏRTAC-a verilən məlumata görə, layihə çərçivəsində ekologiya sahəsində təhsil alan və ya bu sahəyə həvəs göstərən gənclərin ətraf mühit və davamlı inkişaf sahələrində peşəkar səviyyədə uğur əldə etmiş şəxslərlə görüşləri təşkil olunur. IDEA İctimai Birliyi bu üsulla gəncləri ətraf mühit və davamlı inkişaf sahələrinə yönəltməklə, ölkəmizdə ixtisaslaşmış və peşəkar mütəxəssislərin yetişməsinə töhfə vermək niyyətindədir.

Layihə çərçivəsində ilk görüş “Azərsun Holdinq”ə məxsus Azərbaycan Kağız Karton İstehsalı Kombinatının (AKKİK) baş mütəxəssisi Bəxtiyar İsmayılovun iştirakı ilə baş tutub.

Görüşdə B.İsmayılov gənclərə davamlı inkişaf, o cümlədən təkrar istehsal sahəsindəki təcrübəsi və fəaliyyəti, qazandığı uğurların sirləri və özünü inkişaf etdirməyin yolları haqqında geniş məlumat verib. Qeyd olunub ki, bu sahədə çalışmaq maddi baxımdan əlverişli olmaqla yanaşı, ölkəmizin ətraf mühitinin mühafizəsi üçün faydalı hesab olunur. Görüşün sonunda ekspert gəncləri maraqlandıran sualları cavablandırıb.

“Uğura gedən yol” layihəsi çərçivəsində ayda bir dəfə IDEA İctimai Birliyinin Azərbaycan Respublikası Prezidenti yanında Dövlət İdarəçilik Akademiyasında yerləşən Resurs Mərkəzində ətraf mühit və oxşar sahələrdə uğurlu karyera qurmuş mütəxəssislərlə gənclərin görüşü təşkil olunacaqdır.

Növbəti görüşlər barədə elanlar IDEA İctimai Birliyinin rəsmi internet səhifəsində və sosial mediada yerləşdiriləcək. Layihə haqqında əlavə məlumat əldə etmək istəyən şəxslər 4976316 şəhər nömrəsi və ya info@ideacampaign.org elektron poçt ünvanı vasitəsilə IDEA İB ilə əlaqə saxlaya bilərlər.

Azərbaycan.-2015.- 29 aprel.- S.12.