Forumun sonuncu panel iclası “Yerli, milli və regional

inteqrasiyanın təhlükəsizlik imkanları” mövzusuna həsr edilib

III Qlobal Bakı Forumunun sonuncu panel iclası “Yerli, milli və regional inteqrasiyanın təhlükəsizlik imkanları” mövzusuna həsr edilib.

Ərəb Liqasının keçmiş baş katibi Əmr Musanın moderatorluğu ilə keçirilən sessiyada Uruqvayın keçmiş Prezidenti Luis Alberto Lakalle regional inteqrasiyanın iqtisadi, mədəni və siyasi səviyyədə daha yaxın əməkdaşlıq üçün bir vasitə olduğunu söyləyib.

Yaponiyanın keçmiş Baş naziri Yukio Hatoyama regional inteqrasiyadan söhbət açaraq bu məsələdə təhlükəsizliyin gücləndirilməsinin vacibliyini vurğulayıb. O, ölkələrin müharibə təhlükəsindən azad olması üçün hərbi gücdən imtinanın önəmini qeyd edib. Yukio Hatoyamasülhün təmin olunmasında ölkələr arasında konstruktiv dialoqun əhəmiyyətini vurğulayıb.

Slovakiyanın keçmiş Baş naziri xanım İveta Radiçova III Qlobal Bakı Forumunun dünyada baş verən bir çox hadisələrin müzakirəsi üçün əhəmiyyətli platforma olduğunu söyləyib. O qeyd edib ki, müharibə təhlükəsizliyinin qarşısının alınması üçün əhəmiyyətli alyanslar yaradılmalıdır.

Estoniyanın keçmiş Prezidenti Arnold Rüütel “Şərq tərəfdaşlığı” proqramının əhəmiyyətindən danışaraq bu layihənin gənclərin Avropaya inteqrasiyasına dəstək olduğunu, müzakirələr aparmaq baxımından imkan yaratdığını söyləyib. Beynəlxalq etimadın yaradılmasında regional və beynəlxalq təşkilatların rolundan danışan Arnold Rüütel bu qurumların sülhün, təhlükəsizliyin təmin olunmasına mühüm töhfə verə biləcəyini diqqətə çatdırıb.

Azərbaycan.-2015.- 30 aprel.- S.5.