Jurnalistikaya dair yeni kitab

Azərbaycan milli mətbuatının 140 illik yubileyi ərəfəsində filologiya elmləri doktoru, professor Alxan Bayramoğlunun “Jurnalist sənətkarlığı” kitabı (“Elm v təhsil” nəşr, 88 səh.) çapdan çıxmışdır.

Kitabda vətəndaş cəmiyyətinin formalaşması və milli dövlətçiliyin möhkəmləndirilməsində müasir mətbuat və jurnalistikanın öhdəsinə düşən vəzifələr gündəmə gətirilmişdir. Əsərdə həmin vasitə və üsulların müxtəlif elmi-nəzəri prinsiplərindən, taktiki və təcrübi xüsusiyyətlərindən söhbət açılır. Müəllif diqqətə çatdırır ki, Azərbaycan mətbuatında çalışan jurnalistlər dövlət qayğısına və etimada cavab olaraq bu vəzifələri vətəndaşlıq məsuliyyəti və peşəkarlıqla yerinə yetirməlidirlər. Bunun üçün jurnalistlərimiz dərin elmi-nəzəri biliyə, geniş dünyagörüşə, ayıq siyasi və hüquqi düşüncəyə, sağlam vətəndaş mövqeyinə, mənəvi-əxlaqi dəyərlərə, milli və dövlətçilik sevgisi ilə yoğrulmuş təəssübkeşliyə, taktiki vərdişlərə, mübarizliyə və s. keyfiyyətlərə malik olmalıdırlar.

Bu tələb və tövsiyələrlə ətraflı tanış olmaq üçün kitabda verilmiş “Jurnalistin intellekti və vətəndaş məsuliyyəti”, “Materialın toplanması, işlənməsi və çap mexanizmi haqda”, “Jurnalist ünsiyyətinin bəzi psixoloji məqamları”, “Kütləvi informasiya vasitələrinin təsisi, təşkili və “dördüncü hakimiyyət”in forma və üsulları”, habelə digər yarımbaşlıqlı yazılara xüsusi diqqət yetirilməlidir.

Ümidvarıq ki, BDU-nun Jurnalistika fakültəsinin müəllimləri fililogiya üzrə elmlər doktoru Nəsir Əhmədli və Akif Rüstəmovun rəyçiliyi, Cahangir Məmmədlinin redaktorluğu ilə işıq üzü görən “Jurnalist sənətkarlığı” hər bir mətbuat təəssübkeşinin, xüsusilə yaxşı jurnalist olmaq istəyənlərin stolüstü kitabına çevriləcəkdir.

Azərbaycan.- 2015.- 9 AVQUST.- s. 6.