“Bizi ümid xilas etdi...”

Dəhşətli hadisədən sağ çıxanların səhhəti normallaşır

Dekabrın 4-də “Günəşli” yatağında baş vermiş qəza hər bir azərbaycanlını sarsıtdı. Rəsmi məlumata görə, hadisə baş verən zaman 10-cu dərin dəniz özülündə 63 nəfər olub. Onlardan 1-i dünyasını dəyişib, 33 nəfər təxliyyə olunub, 29 nəfərin taleyi isə hələlik naməlumdur. Onlar itkin düşmüş elan ediliblər. Hadisə nəticəsində müxtəlif xəsarətlər almış və hazırda Neftçilər Xəstəxanasında müalicə alan vətəndaşların isə vəziyyətləri normaldır.

Hadisə zamanı sağ qalanlarla bağlı Səhiyyə Nazirliyi məlumat yayıb. Məlumatda bildirilir ki, “Günəşli” yatağındakı 10-cu dərin dəniz özülündə baş verən güclü yanğın nəticəsində xəsarət alan vətəndaşlardan həmin gün ümumilikdə Azərbaycan Respublikası Səhiyyə Nazirliyinin Mərkəzi Neftçilər Xəstəxanasına 31 müraciət daxil olub. Vəziyyətləri yaxşı olan 22 nəfər, təkrar müayinələrə cəlb olunması şərti ilə ambulator yardım göstərilərək evlərinə buraxılmışdır. Dünən həmin 22 nəfər yenidən müayinələrə cəlb olunmuşdurlar. Onlardan bir nəfərini (ürək bulanma diaqnozu) xəstəxanada saxlamaq məsləhət görülüb, lakin heç bir həyati təhlükəsi yoxdur. Müxtəlif bədən xəsarətləri alan 8 nəfərə xəstəxanada lazımi səviyyədə tibbi yardım göstərilir. Vəziyyətləri sabitdir və artıq palatalara köçürülüblər. Müxtəlif dərəcəli yanıq xəsarətləri almış 1 nəfər isə Respublika Yanıq Mərkəzinə yerləşdirilmişdir ki, onun da vəziyyəti sabitdir.

Dəhşətli gecənin qəhrəmanları olan və müxtəlif dərəcəli xəsarətlərlə Mərkəzi Neftçilər Xəstəxanasına yerləşdirilən həmin hadisə şahidlərinə baş çəkdik. Onların son durumları ilə bağlı vəziyyəti həm həkimlərdən, həm də özlərindən soruşduq.

Mərkəzi Neftçilər Xəstəxanasının baş direktorunun müavini Nadir Mehdiyev qəza nəticəsində xəstəxanaya yerləşdirilən neftçilərin səhhətində heç bir problemin olmadığını bildirdi. Yalnız 1976-cı il təvəllüdlü Allahverdi Məmmədovun vəziyyəti orta-ağır olaraq qiymətləndirilir. Allahverdi Məmmədov hadisə baş verən 10-cu platformanın rəisidir. O, dekabrın 5-i axşam saatlarında xəstəxanaya daxil olub. Elə həmin gün də əməliyyata alınıb. N.Mehdiyev dedi ki, ona sağ bazu sümüyünün orta 1/3-nin qapalı yerdəyişmiş sınığı, mil sinirinin zədələnməsi, böyük qabarın qopması diaqnozu qoyulub.

Nisbətən ağır xəsarətlər alan digər vətəndaş isə 1959-cu il təvəllüdlü Mərdan Rəcəbovdur. Diaqnoz isə belədir: qabırğaların çoxsaylı sınığı. Sağ mil-bilək və budun yumşaq toxumalarının əzilməsi.

Direktor müavininin sözlərinə görə, xəsarət alanların hamısına təklif olunub ki, bir gün xəstəxanada qalsınlar. Daha sonra özləri öz təkidləri ilə evlərinə getmək istədilər: “Lakin hansına ki, vacib stasionar müalicə lazım idi, onları xəstəxanada saxladıq. Eyni zamanda, ambulator müalicə olunanlar da vaxtlı-vaxtında zəng olunub müayinə üçün xəstəxanaya çağırılırlar. Çünki onlar soyuqda və suda qalıblar, isti-isti bəzi şeyləri hiss eləmirlər. Bəzilərinin sınığı, çıxığı var. Ona görə də bu işlərlə tam məşğuluq. Heç bir gecikmə və digər əngəllər yoxdur. İstər-istəməz onların hər birində müəyyən həyəcan və psixoloji gərginliklər olub. Lakin hazırda onların psixoloji vəziyyətləri də tam sabitdir. Deyərdim ki, bu insanlar əsl qəhrəmanlardır”.

Xəstəxananın həkim-travmatoloqu Fərhad Hüseynov və həkim-cərrah Nemət Abbasov da eyni sözləri dedilər. Bildirildi ki, müraciət edənlərdən ikisinin vəziyyəti ağır idi. Onlardan biri dərhal əməliyyat olundu, biri də Yanıq mərkəzinə göndərildi. Qalanları isə müxtəlif yüngül travmalarla qeydə alınıblar.

Həkim-cərrah Nemət Abbasov: “Mən 10 il Neft Daşlarında cərrah işləmişəm. Ona görə də neftçilərin xarakterinə bələdəm. O adamlar döyüşdə olan əsgərlərdən nə əməklərinə, nə də xarakterlərinə görə fərqlənirlər. Əsgərlərdə belə bir xüsusiyyət var ki, yaralı olsa da yoldaşlarını tək qoymaq istəmir, axıra qədər döyüşürlər. Bax, bu xasiyyət neftçilərdə də var. Bu hadisə zamanı oradakı bəzi yaralı işçilər hətta qalmaq istəyirdilər ki, digərlərini xilas etsinlər. Möhkəm xarakterləri var. Çox mətindirlər. Bəlkə də neftçinin çörəyi qədər halal çörək yoxdur. Onlar bir tikə çörəklərini də haqq edirlər”.

Sonra xəstələrin müalicə olunduğu palatalara baş çəkdik. İlk olaraq alın nahiyəsindən müxtəlif çapıq yaraları alan Mais Abbasovla söhbətləşdik. O, 21 ildir ki, hadisə olan platformada operator işləyir: “18 saat qayıqda qalmışıq. Orada panika olduğunu deməzdim. Hər birimiz demək olar ki, taleyimizlə barışmışdıq. Ya hamımız ölməliydik, ya da xilas olmalıydıq. Amma hər birimiz ümid edirdik ki, xilas olacağıq. Allaha çox şükür ki, belə də oldu. Ümidimiz çox idi. Bəlkə də elə bu ümid saxladı bizi, xilas etdi. Ləpə vurduqca hiss edirdik ki, harasa ilişmişik. Hər dəfə ləpə vuranda qorxuya düşürdük ki, indi su bizi atacaq. Suya düşmə ehtimalımız çox idi. Qayıq o qədər o tərəf-bu tərəfə çırpılmışdı ki, qırılıb dağıla bilərdi. Oradan sağ çıxmağımıza görə sevincliyik deməzdim. Çünki bizim uzun illərdir orada birgə çalışdığımız dostlarımız itkin düşüblər... Bu illər ərzində ən dəhşətli hadisəni yaşadım. Düzdür, xırda hadisələr çox olub. Amma qarşısını almışıq. Bunun isə qarşısını almaq heç cür mümkün deyildi”.

Energetik Ənvər Əliyev də o gecənin dəhşətli olduğunu dedi: “23 ildir ki, dənizdə işləyirəm. 5 il də müharibədə döyüşmüşəm. Ancaq döyüşdə belə bir dəhşətlə rastlaşmamışam. Bu çox təhlükəli bir hadisə idi”.

Platformanın qaynaqçısı Rəşad Hüseynov isə xəstəxanada şəraitin yüksək səviyyədə olduğunu bildirdi: “Bizə göstərilən qayğıya görə bütün həkimlərə, eləcə də xəstəxana rəhbərliyinə təşəkkür edirik. Onlardan çox razıyıq”.

Səhiyyə Nazirliyinin mətbuat xidmətindən də bildirdilər ki, sözügedən hadisə zamanı xəsarət alanların vəziyyəti nazirliyin daim nəzarətindədir. Eyni zamanda, səhiyyə nazirinin xüsusi tapşırığına əsasən xəsarət alan və hadisə nəticəsində itkin düşmüş neftçilərin yaxınlarına psixoloji yardımın göstərilməsi üçün psixoloqlardan ibarət briqada yaradılıb. Dünən psixoloqlar yenidən Neftçilər Xəstəxanasında olub onlara lazımi yardım göstəriblər. Xəsarət alanların tezliklə sağalmaları üçün bütün zəruri addımlar atılır.

Elgün MƏNSİMOV,

Azərbaycan. - 2015.- 8 dekabr.- S.9.