“Tolerantlıq nümunəsi Azərbaycan”

“Multikulturalizm Azərbaycanda həyat tərzidir. Düzdür, bu termin nisbətən yenidir. Ancaq əsrlər boyu Azərbaycanda multimədəniyyətli cəmiyyətlər mövcud olub. Xalqlar arasındakı dostluq və həmrəylik bunun bariz nümunəsidir”.

İlham ƏLİYEV

Hər bir millətin imzası onun milli-mənəvi dəyər və mədəniyyətini ehtiva edir. Bəşəri mədəniyyət isə sivilizasiyaların qitələr, regionlar, xalqlararası əlaqələrin genişlənməsi, bir-birini zənginləşdirməsi və dərinləşdirməsi sayəsində formalaşır.

Azərbaycan Avropa və Asiya qitələrinin təmas nöqtəsində yerləşdiyi üçün iki böyük sivilizasiya və mədəniyyətlərin əlaqələrində bir körpü rolunu oynayır. Azərbaycan milli və dini baxımdan həmişə tolerant bir ölkə olmuşdur. Tarixən dinlərin və mədəniyyətlərin qovşağı olmuş ölkəmiz bu gün də öz missiyasını uğurla yerinə yetirir. Azərbaycan ərazisində məskunlaşmış dini-etnik qruplar burada özlərini nəinki yad hesab etməmiş, hətta yerli əhali ilə qaynayıb-qarışmışlar. Fərqli dini konfessiya nümayəndələri hər zaman Azərbaycan xalqı ilə həmrəy olmuş, bütün tarixi dövrlərdə etnik və dini icmalar arasında möhkəm dözümlülük əlaqələri formalaşmış, milli, dini və irqi zəmində heç bir ayrı-seçkilik faktı qeydə alınmamışdır.

Tolerantlığın Azərbaycanda çox möhkəm təməl sütunları, zəngin ənənələri, dərin tarixi-mədəni kökləri mövcuddur. Azərbaycan xalqı daim bu bölgədə yaşayan insanlar arasında sülh və əmin-amanlıq şəraitinin yaradılmasına əvəzsiz tarixi töhfələr vermişdir. Dözümlülük, başqa dinlərin nümayəndələri ilə dinc yanaşı yaşamaq azərbaycanlıların milli mentalitetinin əsas xüsusiyyətlərindəndir. Ölkəmizdə tarixən islam dini ilə yanaşı, xristianlıq dininə mənsub olan insanlar qarşılıqlı anlaşma, mehriban qonşuluq və əmin-amanlıq şəraitində yaşamışlar.

Fəxrlə qeyd edə bilərik ki, bu gün Prezident İlham Əliyevin məqsədyönlü fəaliyyəti nəticəsində ölkəmiz tolerantlıq, multikulturalizm və dini maarifləndirmə ilə bağlı regional və beynəlxalq konfransların, yüksək səviyyəli forumların keçirildiyi əsas məkana çevrilib. Azərbaycanda dövlət-din münasibətlərinin tənzimlənməsi sahəsində həyata keçirilən siyasət dünya ictimaiyyəti tərəfindən diqqətlə izlənilir və yüksək qiymətləndirilir. Prezident İlham Əliyev demişdir ki, tolerantlıq artıq ölkəmizin vizit kartına çevrilib. Azərbaycanda milli və dini dözümlülüyün, tolerantlığın yüksək səviyyədə olması faktdır və bu, bizim güc mənbəyimizdir.

Bu gün ölkəmizdə dövlət siyasətinin, milli-mənəvi dəyərlərin, azərbaycançılıq məfkurəsinin, tolerantlıq nümunələrinin düzgün şəkildə təbliğ edilməsi istiqamətində geniş işlər aparılır. 7-12 dekabr tarixlərində Binəqədi rayon ərazisində yerləşən təhsil müəssisələrində Azərbaycan Respublikasının millətlərarası, multikulturalizm və dini məsələlər üzrə Dövlət Müşaviri Xidməti və Binəqədi Rayonu İcra Hakimiyyəti ilə birgə “Tolerantlıq nümunəsi Azərbaycan” adlı layihəyə başlanılmışdır.

Layihənin keçirilməsində əsas məqsəd yerlərdə Azərbaycanın bu sahədə dövlət siyasətinin, milli-mənəvi dəyərlərin, azərbaycançılıq məfkurəsinin, tolerantlıq nümunələrinin təbliğ edilməsidir.

7-8 dekabr tarixlərində Binəqədi rayonu 115 saylı tam orta məktəbdə layihənin 2 mühazirə dərsləri keçirilmişdir.

Keçirilən tədbirlərdə Binəqədi Rayon İcra Hakimiyyəti başçısının müavini Aygün Əliyeva, Azərbaycan Respublikasının Millətlərarası, multikulturalizm və dini məsələlər üzrə Dövlət Müşaviri Xidmətinin baş məsləhətçisi, professor Etibar Nəcəfov, Azərbaycan Respublikası Dini Qurumlarla İş üzrə Dövlət Komitəsinin sədr müavini Gündüz İsmayılov və Binəqədi rayon ərazisində yerləşən 32 ümumtəhsil müəssisələrindən 200-ə yaxın tarix müəllimi iştirak ediblər.

Bir mühazirə dərsini “Multikulturalizm - Azərbaycan Respublikasının dövlət siyasəti kimi” mövzusu əsasında Azərbaycan Respublikasının Millətlərarası, multikulturalizm və dini məsələlər üzrə Dövlət Müşaviri Xidmətinin baş məsləhətçisi Etibar Nəcəfov aparmışdır. Natiq çıxışında multikulturalizm dəyərlərindən söhbət açaraq bildirmişdir ki, mədəni yaşam tərzi‚ əxlaqi dəyərlər və bir çox xarakterlər Azərbaycan xalqının həyat normasıdır. Elə bu səbəbdəndir ki, ölkəmizdə bütün xalqların nümayəndələri sakit, sülh şəraitində yaşayırlar.

1990-cı illərin acınacaqlı günlərində xalqın tələbi ilə hakimiyyətə qayıdan dahi şəxsiyyət Heydər Əliyevin müasir Azərbaycan dövlətini qurarkən bu dövlətin təməl ideologiyasının əsaslarından biri ölkədə yaşayan millətlərə hörmətlə yanaşılması,‚ bütün dini inanclara ehtiram göstərilməsi, dini azadlıqların qorunması və tolerantlıq dəyərlərinin bərqərar olması idi.

İkinci mühazirə dərsini “Müasir dövrdə Azərbaycan Respublikasında dövlət-din münasibətləri” mövzusu əsasında Azərbaycan Respublikası Dini Qurumlarla İş üzrə Dövlət Komitəsi sədrinin müavini Gündüz İsmayılov aparmışdır. Natiq çıxışında qeyd etmişdi ki, milli ruhu qorumağın, inkişaf etdirməyin və yeni nəsillərə çatdırmağın ən mühüm şərti milli dövlətçilikdir. Milli dövlət ancaq ərazinin, maddi sərvətlərin deyil, həm də milli-mənəvi dəyərlərin qorunmasına xidmət edir.

Mövzular ətrafında təqdimatlardan sonra suallar cavablandırılmışdır.

Mövzular ətrafında fikirlərini bölüşən tədbir iştirakçıları əsası ulu öndər Heydər Əliyev tərəfindən qoyulan milli-mənəvi dəyərlərimizi qorumağın, onu gənc nəsillərimizə yüksək səviyyədə çatdırılmasının əhəmiyyətli olduğunu bildirmişdilər. Onlar dini, milli adət-ənənələrimizin zənginliyini vurğulayaraq belə mövzularda mühazirələrin təşkili üçün təşəkkürlərini bildirmişdilər.

Qeyd edək ki, 9 dekabr tarixdə, “Bakı Beynəlxalq Multikulturalizm Mərkəzinin Azərbaycan multikulturalizmi modelinin təbliği və təşviqi istiqamətində fəaliyyəti” mövzusunda Bakı Beynəlxalq Multikulturalizm Mərkəzinin şöbə müdiri Nəriman Qasımoğlu, 10 dekabr tarixdə “Azərbaycan multikulturalizminin ədəbi-bədii qaynaqları” mövzusunda AMEA-nın müxbir üzvü, Məhəmməd Füzuli adına Əlyazmalar İnstitutunun şöbə müdiri Mövsün Nağısoylu mühazirə dərslərini aparacaqlar.

Layihənin bağlanış mərasimi 12 dekabr tarixində yekunlaşacaq.

Rəşad BAXŞƏLİYEV,

Azərbaycan. - 2015.- 9 dekabr.- S.7.