“Azərbaycan fəxr edir”

“Bakı-2015” I Avropa Oyunlarının yekunu miniatür kitabda

Bu günlərdə Miniatür Kitab Muzeyinin “Azərbaycan fəxr edir” yeni nəşri işıq üzü görüb. Kitabın super üz qabığında Azərbaycan Prezidenti İlham Əliyevin “Bakı-2015” I Avropa Oyunlarının yüksək səviyyədə keçirilməsindəki xidmətlərinə görə Təşkilat Komitəsinin sədri Mehriban xanım Əliyevanı “Heydər Əliyev” ordeni ilə təltif etdiyi fotoşəkil yer alıb. Miniatür nəşrin forzastında isə I Avropa Oyunlarının loqosu verilib.

Mini nəşr Azərbaycan Prezidenti İlham Əliyevin 29 iyin 2015-ci il tarixində

I Avropa Oyunlarında qalib gəlmiş idmançılarla, onların məşqçiləri, idman ictimaiyyətinin nümayəndələri və xarici tərəfdaşlarla keçirilən görüşündəki nitqi ilə açılır.

Kitabda Azərbaycanın birinci xanımı Mehriban Əliyevanın, həmçinin “Dostluq” ordeni ilə təltif edilən I Avropa Oyunları Əməliyyat Komitəsinin əməliyyatlar üzrə baş direktoru Saymon Kleqin və “Şöhrət” ordeninə layiq görüldüyü üçün dövlət başçısına minnətdarlığını bildirən gənclər və idman naziri Azad Rəhimovun çıxışları verilib.

Nəfis tərtibatlı, 38x52 mm formatlı kitab 216 səhifədən ibarətdir. Burada I Avropa Oyunlarını əks etdirən 42 rəngli şəkil öz əksini tapıb. Üç dildə (Azərbaycan, rus və ingilis) buraxılan,100 nüsxədən ibarət olan yeni nəşr Miniatür Kitab Muzeyinin adı çəkilən beynəlxalq idman bayramına töhfəsi kimi dəyərləndirilir.

Kitabda bir daha göstərilir ki, I Avropa Oyunları Azərbaycanın yalnız idman deyil, mədəniyyət, daha geniş mənada götürsək, ümumi inkişaf tarixinə yazıldı. Mədəniyyət və incəsənətimizin idmanla sintezinin nümayişi üçün münbit şərait yaradıldı. Bu həm də müasir Azərbaycanın siyasi, iqtisadi, sosial və mədəni inkişafının, xalqımızın milli-mənəvi dəyərlərinə sahib çıxma göstəricisi demək idi.

Təbii ki, “Bakı-2015”

I Avropa Oyunlarının möhtəşəm keçirilməsi ilk növbədə yüksək səviyyədə hazırlığın nəticəsi idi. Geniş ictimaiyyət bu beynəlxalq tədbirin bilavasitə iştirakçısına çevrilmişdi.

Yeni nəşrdəki nitq və çıxışlarda vurğulanır ki, “Bakı-2015” I Avropa Oyunlarının ölkəmizi bürüyən şənlik növrağı dünyaya səs saldı.

I Avropa Oyunlarının məşəli ölkəmizi nura qərq etdi. “Atəşgah” məbədindən götürülən “Bakı-2015” ilk Avropa Oyunlarının məşəli Vətənimizi başdan-başa dolaşdı, yollara nur saçdı. Bu məşəlin müqəddəsliyi bir də onda oldu ki, onu xalqımızın taleyinə, dövlətimizin tarixinə adını qurucu, dünyanın siyasi və ictimai, eləcə də dövlət xadimləri sırasına böyük hərflərlə yazan, ümumi inkişafımızın qarantı olan cənab Prezident İlham Əliyev alovlandırmışdı. Bunun rəmzi mənası vardı: nəinki möhtəşəm idman bayramını, onun izi ilə ölkəmizi ziyarət edəcək Azərbaycanın qonaqlarını odlu ürəklə salamlamaq!

Kitab Heydər Əliyev Fondunun prezidenti, UNESCO və İSESCO-nun xoşməramlı səfiri, Heydər Əliyev Fondunun prezidenti, nəhayət, “Bakı-2015” I Avropa Oyunları Təşkilat Komitəsinin sədri Mehriban xanım Əliyevaya Miniatür Kitab Muzeyinin hədiyyəsi olaraq nəşr edilib.

Məhəmməd NƏRİMANOĞLU,

Azərbaycan. - 2015.- 11 dekabr.- S. 7.