Azərbaycanın Beynəlxalq Antikorrupsiya Akademiyasına verdiyi töhfələr yüksək qiymətləndirilib

Vyanada “Beynəlxalq Antikorrupsiya Akademiyasının beynəlxalq təşkilat qismində təsis edilməsi haqqında” Sazişə tərəfdaş dövlətlərin Assambleyasının IV sessiyası keçirilib.

Tədbirdə Azərbaycan Respublikasını baş prokurorun müavini - Baş Prokuror yanında Korrupsiyaya Qarşı Mübarizə Baş İdarəsinin rəisi Kamran Əliyevin rəhbərlik etdiyi nümayəndə heyəti təmsil edib.

Baş Prokurorluğun mətbuat xidmətindən AZƏRTAC-a bildiriblər ki, nümayəndə heyətində Xarici İşlər Nazirliyinin məsul əməkdaşları da yer alıblar.

Plenar iclasda K.Əliyev ötən ilin noyabrında Bakıda keçirilmiş III sessiyada Assambleyanın sədri vəzifəsinə seçilmiş Azərbaycan Respublikasının baş prokuroru Zakir Qaralovun adından çıxış edərək son illərdə ölkəmizdə korrupsiyaya qarşı həyata keçirilən mübarizə tədbirləri, o cümlədən ən uğurlu qabaqlayıcı institusional tədbirlərdən biri kimi “Asan xidmət” mərkəzlərinin fəaliyyəti, habelə respublikamızın bu sosial bəlaya qarşı mübarizə sahəsində apardığı səmərəli beynəlxalq əməkdaşlıq barədə ətraflı məlumat verib.

Azərbaycanın Assambleyaya sədrliyi dövründə həyata keçirilmiş uğurlu fəaliyyət nəticəsində 5 ölkə Akademiyaya üzv qəbul olunub. Beləliklə, həmin Sazişə qoşulmuş və ya onu ratifikasiya etmiş üzvlərin sayı 65-ə çatıb. Sessiyada Akademiyanın rəhbərliyi tərəfindən ötən müddətdə Azərbaycanın təşkilata verdiyi töhfələr yüksək qiymətləndirilib.

Assambleyanın nizamnaməsinə görə, sessiyanın açılışında təşkilata sədrlik Nigeriyaya keçib.

Daha sonra Akademiyanın İdarə Heyətinə seçkilər keçirilib. Təşkilatın fəaliyyətinə ölkəmizin verdiyi töhfələrin məntiqi nəticəsi kimi, Azərbaycan parlamentinin deputatı Vüsal Hüseynov 6 il müddətinə İdarə Heyətinə üzv seçilib.

Tədbir çərçivəsində Azərbaycan nümayəndə heyəti Bolqarıstanın vitse-prezidenti, Akademiyanın İdarə Heyətinin sədri xanım Marqarita Popova, Avstriyanın daxili işlər naziri xanım Yohanna Mikl-Leytner, Akademiyanın dekanı və icraçı katibi Martin Kroytner və digər nümayəndə heyətləri ilə ikitərəfli görüşlər keçirib, əməkdaşlığın perspektivlərini müzakirə edib.

Azərbaycanın Avstriyadakı səfiri Qalib İsrafilov da sessiyada iştirak edib.

Sessiya çərçivəsində tədbir iştirakçılarına son 10 il ərzində Azərbaycan Respublikasında korrupsiyaya qarşı mübarizə sahəsində həyata keçirilmiş tədbirləri əks etdirən jurnallar paylanıb.

Azərbaycan. - 2015.- 15 dekabr.- S.8.