YAP-ın təşkil etdiyi konfransda qarşıda duran yeni hədəflər müzakirə olunub

Dekabrın 24-də Bakıda Yeni Azərbaycan Partiyasının (YAP) təşkilatçılığı ilə “Yeni hədəflər naminə” mövzusunda konfrans keçirilib.

Konfransda dövlət və hökumət rəsmiləri, Milli Məclisin deputatları, Yeni Azərbaycan Partiyasının üzvləri, ictimaiyyətin nümayəndələri iştirak ediblər.

Baş nazirin müavini, Yeni Azərbaycan Partiyası sədrinin müavini-icra katibi Əli Əhmədov konfransı açaraq başa çatmaqda olan ildə qazanılan mühüm uğurlardan danışıb. Baş nazirin müavini belə uğurlardan birinin növbəti parlament seçkiləri olduğunu vurğulayıb. Bildirib ki, YAP bu seçkilərdə də möhtəşəm qələbə qazanıb. Bu qələbənin əsasında xalqın Yeni Azərbaycan Partiyasının sədri, Prezident İlham Əliyevə sevgisi və etimadı, onun siyasətini dəstəkləməsi, dövlət başçısının yüksək siyasi reytinqi dayanır. Təbii ki, burada YAP-ın namizədlərinin hər birinin siyasi nüfuzunun da öz təsiri var.

Əli Əhmədov cari ildə Azərbaycanın daha bir böyük uğuru kimi Bakıda keçirilən

I Avropa Oyunlarını qeyd edib. Bildirib ki, I Avropa Oyunları Azərbaycanın sürətli inkişafını, qazandığı nailiyyətləri, ölkəmizin zəngin potensialını bütün dünyaya göstərdi.

Ötən on il Azərbaycanın özünün yeni inkişaf modelini bütün dünyaya təqdim etməsi dövrü kimi səciyyələndirilir. Azərbaycan bu illərdə sürətlə inkişaf edən ölkə, müasir cəmiyyət kimi formalaşaraq dünya birliyində özünə layiqli yer tuta bilib. Qarşıdan Azərbaycanın inkişafının yeni mərhələsi gəlir. Bu haqda danışan Baş nazirin müavini vurğulayıb ki, təbii ehtiyatlardan səmərəli şəkildə istifadə etməklə Azərbaycanın müasirləşməsinə imkan verən modelin yaratdığı imkanlar sayəsində ölkəmizin iqtisadiyyatının sürətli inkişaf modelinə keçid günün aktual məsələsinə və sosial sifarişə çevrilib.

Qeyd olunub ki, Prezident İlham Əliyevin Nazirlər Kabinetinin iclasında qarşıda duran hədəflər barədə reallığı əks etdirən nitqində bu istiqamətdə atılmalı olan vacib addımlar dəqiq müəyyənləşdirilib. “Qarşıda duran yeni hədəflər əsasən Azərbaycanın iqtisadi inkişafından istifadə edərək insanların rifahının yüksəldilməsi, sosial problemlərinin həlli ilə bağlı vəzifələrin yerinə yetirilməsidir. İnanırıq ki, Prezident İlham Əliyevin rəhbərliyi ilə həmin vəzifələr layiqincə yerinə yetiriləcək, Azərbaycan özünün müasir inkişaf modelində yeni korrektələr etməklə inkişafın yeni səviyyəsinə qalxmaq vəzifəsinin öhdəsindən uğurla gələcək”, - deyə Əli Əhmədov bildirib.

Konfransın əlamətdar günə - Yeni Azərbaycan Partiyasının sədri, Prezident İlham Əliyevin ad gününə təsadüf etdiyini xatırladan Baş nazirin müavini tədbir iştirakçıları və YAP-ın çoxminli üzvləri adından dövlət başçısına səmimi təbriklərini çatdırıb.

Azərbaycan Milli Elmlər Akademiyasının (AMEA) prezidenti akademik Akif Əlizadə çıxışında vurğulayıb ki, Prezident İlham Əliyevin on ildən artıq müddətdə həyata keçirdiyi ardıcıl və məqsədyönlü siyasət nəticəsində Azərbaycanın beynəlxalq aləmdə strateji mövqeləri möhkəmlənib, ölkəmiz regionun lider dövlətinə çevrilib.

Sürətlə qloballaşan və virtuallaşan dünyanın müasir dövrün bir sıra problemləri ilə üz-üzə qaldığını qeyd edən AMEA prezidenti deyib ki, yeni təhlükələr, təhdidlər, risklər, müharibə ocaqları yaranır. Gələcəklə bağlı nikbin proqnoz vermək çətindir. Belə şəraitdə hər bir ölkə daxili resurslarına arxalanaraq təhlükəsizliyini təmin etməli, dünyada yaşanan maliyyə və iqtisadi böhrandan çıxmaq üçün öz siyasi modelində düzəlişlər aparmalıdır.

Akif Əlizadə bildirib ki, dövlət başçısı AMEA-nın 70 illik yubiley mərasimindəki çıxışında Akademiyanın gələcək inkişafının prioritet istiqamətlərini dəqiq müəyyənləşdirib. Azərbaycanın yeni inkişaf modelinin, xüsusən qeyri-neft sektorunun inkişaf istiqamətlərinin müəyyənləşdirilərək həyata keçirilməsi, ölkənin demoqrafik vəziyyətinin elmi əsaslarla araşdırılması, insan kapitalına dair konsepsiyanın hazırlanması, mövcud təbii şərait və potensial nəzərə alınaraq kənd təsərrüfatının, eləcə də kimya sənayesinin inkişaf etdirilməsi hazırda Azərbaycan elmi qarşısında duran prioritetlərdir.

Diqqətə çatdırılıb ki, Azərbaycan Prezidentinin dəstəyi ilə ölkəmizdə innovativ əsaslarla kimya sənayesinin yaradılması istiqamətində mühüm addımlar atılır. Bu baxımdan Sumqayıt Kimya Sənayesi Parkının yaradılması Azərbaycanın regionda lider mövqeyini daha da gücləndirəcək. Bu layihənin həyata keçirilməsində kimyaçı alimlər də fəal iştirak edirlər. Müvafiq dövlət qurumlarının nümayəndələri ilə səmərəli müzakirələr aparılır, gələcək kimya sənayesinin əsas istiqamətləri müəyyənləşdirilir.

AMEA prezidenti ölkəmizdə ərzaq təhlükəsizliyinin təmin olunmasında elmin istifadə imkanlarının araşdırılmasının, multukilturalizmin təşviqi istiqamətində ictimai və humanitar elmlər sahəsində tədqiqatların aparılmasının, müasir çağırışlar və hədəflər kontekstində qarşıda duran vəzifələrin reallaşdırılması üçün güclü elmi baza və potensialın yaradılmasının da Azərbaycan elminin prioritet istiqamətlərindən olduğunu vurğulayaraq bu sahədə görülən işlərdən danışıb.

Kənd təsərrüfatı naziri Heydər Əsədov çıxışında aqrar sektorda görülən işlərdən, əldə olunan nailiyyətlərdən bəhs edib. Qeyd olunub ki, Azərbaycanda kənd təsərrüfatı sahəsində qazanılan nailiyyətlərin əsasında ulu öndər Heydər Əliyev tərəfindən dəqiq müəyyənləşdirilmiş strategiya dayanır. Müstəqilliyin bərpasından sonra ümummilli lider Heydər Əliyevin hakimiyyətə qayıdışı ilə Azərbaycanda fundamental aqrar siyasətin əsası qoyulub. Prezident İlham Əliyevin bu siyasəti uğurla davam etdirərək həyata keçirdiyi islahatlar sayəsində kənd təsərrüfatı sürətli və dinamik inkişaf yoluna qədəm qoyub.

Heydər Əsədov bildirib ki, son iki ildə aqrar sahədə görülən işlərin əsas hədəfini həmin sektora dövlət dəstəyinin artırılması ilə xarakterizə etmək olar. Nazir bu dəstəyin əsas göstəricisi kimi sahibkarlara kənd təsərrüfatı texnikasının 40 faiz, gübrələrin 70 faiz güzəştlə verilməsini, suvarılan sahələrin genişləndirilməsi üçün müvafiq avadanlığın alınmasına xərclənən vəsaitin 40 faizinin dövlət tərəfindən ödənilməsini qeyd edib.

Kənd təsərrüfatının əsas sahələrindən olan heyvandarlığın inkişaf etdirilməsi üçün cinsin dəyişdirilməsi istiqamətində atılan addımlar barədə məlumat verən nazir deyib ki, yeni cins heyvanların alınması ilə yanaşı, ölkədə süni mayalandırma işlərinin təşkili də mühüm əhəmiyyət kəsb edir. Bitkiçiliyin genişləndirilməsi üçün yüksək məhsuldarlığa malik və quraqlığa davamlı toxum sortlarının yetişdirilməsi istiqamətində zəruri tədbirlər görülür, yeni toxumçuluq mərkəzləri yaradılır. Bu məqsədə yönəlmiş institusional baza formalaşmaq üzrədir.

Aqrar sahədə dövlət dəstəyinin forma və mexanizmlərinin davamlı olaraq təkmilləşdirildiyini vurğulayan Heydər Əsədov bu baxımdan Nazirlər Kabineti tərəfindən 31 qərarın, habelə 6 qanunun qəbul edildiyini, Azərbaycan Prezidentinin 9 sərəncam imzaladığını bildirib. Həmçinin 52 rayonda Kənd Təsərrüfatı Nazirliyinin yerli qurumları üçün binaların tikintisinin başa çatmaqda olduğunu qeyd edən nazir deyib ki, regionlarda toxumçuluq laboratoriyaları, torpaqların analizi, ərzaq təhlükəsizliyi ilə bağlı müvafiq şöbələr fəaliyyət göstərəcək, sahibkarlar üçün treninqlər təşkil ediləcək. Bununla yanaşı, Azərbaycan Dövlət Aqrar Universitetində təhsil ən müasir səviyyəyə uyğunlaşdırılır, yeni laboratoriyalar yaradılır.

Nazir, həmçinin ərzaq təhlükəsizliyinin təmin olunması sahəsində ən müasir tələblərə cavab verən laboratoriyanın, eləcə də yeni elmi-tədqiqat institutlarının yaradıldığını, aqrar sektorun inkişafı istiqamətində beynəlxalq əməkdaşlığın genişləndirildiyini diqqətə çatdırıb.

AZƏRTAC

Azərbaycan. - 2015.- 25 dekabr.- S. 4.