Təhsilə və müəllimə qayğının növbəti nümunəsi

Sürətlə modernləşən Azərbaycanda təhsil sisteminin insan kapitalının inkişafına yönəldilməsi və bu sahədə keyfiyyət göstəricilərinin Avropa standartlarına uyğunlaşdırılması qarşıda duran vəzifələrdən biri kimi prioritetə çevrilib. “Təhsilin inkişafı üzrə Dövlət Strategiyası” kimi olduqca vacib bir sənədin dövlət başçısı tərəfindən imzalanması ilə adıçəkilən sahənin inkişafının yeni mərhələsi başlayıb desək, daha doğru olardı. Bu strategiyanın həyata keçirilməsi ilə bağlı “Fəaliyyət planı”nın təsdiq edilməsi haqqında dövlət başçısının imzaladığı sərəncam, təbii ki, təhsil sahəsində uzunmüddətli inkişafın istiqamətlərini müəyyənləşdirmiş oldu.

Strategiyada müəllim amilinə xüsusi yanaşma var. Ümumiyyətlə, təhsildə əsas meyar müəllimlə bağlı olmalıdır. Aydındır ki, nə qədər yüksək səviyyəli infrastruktur, tədris vəsaiti, maliyyə imkanları olsa belə, keyfiyyətli müəllim olmadan təhsili inkişaf etdirmək o qədər də asan deyil. Təhsilalanın savadlı və səriştəli şəxs kimi formalaşması əsasən müəllimin akademik bacarıqlarından, tədris təcrübəsindən və peşəkarlıq səviyyəsindən daha çox asılıdır.

Bilik və bacarıqlarını davamlı artıran müəllimlər təhsilalanların nailiyyətlərinə əlavə töhfələr verirlər. Yeri gəlmişkən qeyd edək ki, təhsil islahatı uğurla aparılan ölkələrdə müəllim peşəkarlığının inkişafı üçün stimulların yaradılmasına və müəllim hazırlığının təkmilləşdirilməsinə xüsusi diqqət yetirilir.

Haqqında söz açdığımız strateji istiqamətlərdən biri də təhsil sahəsində insan resurslarının müəyyənləşdirilməsidir. Bu istiqamət innovativ təlim metodlarını tətbiq edən səriştəli təhsilverənlərin formalaşdırılmasını, müəllimlərin peşəkarlıq səviyyəsinin daim yüksəldilməsini prioritet sayır. Eyni zamanda onların nüfuzunun artırılmasını, karyera inkişafı və fəaliyyətinin stimullaşdırılmasını təmin edən yeni sistemin yaradılmasını da zərurətə çevirir.

Təhsil islahatlarının yeni istiqamətində dövlətin müəllimə qayğısı və dəstəyinin bariz nümunələri kifayət qədərdir və onlardan biri də Azərbaycan Prezidenti İlham Əliyevin 16 yanvar 2015-ci il tarixli sərəncamıdır. Bu, ilk növbədə ümumtəhsil müəssisələrində çalışan, bilik və bacarıqlarının diaqnostik qiymətləndirilməsi aparılan müəllimlərin həftəlik dərs yükünün optimallaşdırılması yolu ilə əməkhaqqının artırılması ilk növbədə maddi rifahın daha da yaxşılaşdırılmasını nəzərdə tutan və bu istiqamətdə dövlət başçısının yürütdüyü sosial siyasətin və qayğının bariz nümunəsidir. Bütün bunlar bir daha onu qeyd etməyə əsas verir ki, müəllim əməyinin stimullaşdırılmasına artıq start verilib.

Sirr deyil ki, bilik və bacarıqların diaqnostik qiymətləndirilməsi zamanı kafi nəticə göstərən müəllimlər də az olmayıb. Buna baxmayaraq, dövlət başçısının müvafiq sərəncamı bu prosesdən keçən bütün müəllimlərə şamil olunur. Əlbəttə, bu yanaşma müəllimlərə fərq qoymamaq baxımından olduqca təqdirəlayiqdir və deyərdim ki, həm də ciddi məsuliyyətdir. Bilik və bacarıqların sınaq qiymətləndirilməsinə hələlik paytaxtdakı məktəblərdən başlansa da, yaxın gələcəkdə bu prosesin respublikanın ayrı-ayrı bölgələrini də əhatə edəcəyi nəzərdə tutulur. Prosesin mərhələlərlə aparılması regionlarda çalışan müəllimləri sınaq qiymətləndirməsinə hazırlamağa və iştiraka sövq etdirəcək.

Təhsil sahəsində nəzərdə tutulan islahatların gözlənilən nəticəsi müəllim faktorundan dolayı yox, birbaşa asılıdır. Onun əməyinin ödənişində fərqlilik sisteminin pedaqoji rəqabət və stimullaşdırma mühiti yaradacağı şəksizdir. Ona görə də islahatlarda nəzərdə tutulan fərqli əməkhaqqının tətbiq edilməsinin hər kəsdə öz peşəkarlıq səviyyəsini artırmağa maraq oyadacağı da nəzərə alınıb.

Çalışdığım liseyin pedaqoji kollektivi dövlətin müəllim əməyinə olan diqqət və qayğısını yüksək qiymətləndirir, eyni zamanda təhsilə və xalqımızın intellektual nəslinin yetişməsinə daha bir töhfə olacağına əmindir.

Biz müəllimlər yaxşı bilirik ki, təhsil sistemi müstəqil Azərbaycanın milli dəyərlərini mənimsəmiş vətəndaş formalaşdırmalı, qloballaşan və müasir dünyada zəngin biliyə malik insan yetişdirməlidir. Ölkəmizin təhsil sisteminin və infrastrukturunun inkişaf səviyyəsinin dünyanın aparıcı ölkələrindəkinə çatdırılması isə əsas məqsədlərdən biridir.

Akademik Zərifə Əliyeva adına liseyin pedaqoji kollektivi ölkəmizdə öz dəyərləri və nailiyyətləri ilə seçilənlərdəndir. Ötən ilin iyun ayında müəllimlərin sınaq qiymətləndirilməsində yüksək nəticə göstərən pedaqoji kollektivimiz dövlət başçısına təhsilə və müəllimə göstərdiyi diqqət və qayğıya görə dərindən təşəkkürünü bildirir. Əlbəttə, kollektivimiz də, öz növbəsində, gənc nəslin təlim-tərbiyəsində, Azərbaycan təhsilinin inkişafı ilə əlaqədar keyfiyyətin yaxşılaşdırılması sahəsində bütün imkan və bacarıqlarından, həmçinin mövcud potensialdan maksimum istifadə edəcək, əlindən gələni əsirgəməyəcəkdir.

Mehriban VƏLİYEVA,

Akademik Zərifə Əliyeva adına liseyin direktoru,

filologiya üzrə fəlsəfə doktoru, əməkdar müəllim

Azərbaycan.-2015.- 4 fevral.- S.2.