Azərbaycan və Rusiya gömrük xidmətləri arasında üç sənəd imzalanıb

Fevralın 4-də Azərbaycanda rəsmi səfərdə olan Rusiya Federasiyası Federal Gömrük Xidmətinin rəhbəri Andrey Belyaninovun rəhbərlik etdiyi nümayəndə heyəti ilə Dövlət Gömrük Komitəsində görüş keçirilib.

Dövlət Gömrük Komitəsində keçirilən görüşdə komitə sədri, gömrük xidməti general-leytenantı Aydın Əliyev iki qonşu ölkənin siyasi-iqtisadi və mədəni sahələrdə əlaqələrindən söhbət açıb. Azərbaycan və Rusiya arasında ikitərəfli münasibətlərin uğurla inkişaf etdiyini söyləyən DGK sədri bildirib ki, bütün sahələrdə, o cümlədən, gömrük sahəsində qarşılıqlı əməkdaşlıq yüksək səviyyədədir.

A.Əliyev vurğulayıb ki, ölkələrarası münasibətlərin qurulmasında, inkişaf etdirilməsində gömrük orqanları da böyük rol oynayır və bugünkü görüş də əlaqələrin möhkəmləndirilməsinə öz töhfəsini verəcək.

Rusiya Federal Gömrük Xidmətinin rəhbəri Andrey Belyaninov Rusiyanın regional əməkdaşlığa böyük önəm verdiyini və qonşu ölkələrlə daha da sıx əməkdaşlıq etmək istədiklərini açıqlayıb. Azərbaycana hər səfərində ölkə paytaxtının sürətlə inkişaf etdiyinin şahidi olduğunu vurğulayan qonaq bu inkişafın bütün sahələrdə, eləcə də gömrük sahəsində də müşahidə edildiyini bildirib.

A.Belyaninov bu gün Azərbaycan və Rusiyanın gömrük xidmətləri arasında əməkdaşlıq yüksək səviyyədə olduğunu və Azərbaycana budəfəki səfərinin qarşılıqlı əlaqələrin davamlı inkişafına xidmət edəcəyinə əminliyini ifadə edib.

Görüşün sonunda Azərbaycan və Rusiya gömrük xidmətləri arasında 3 sənəd – gömrük xidməti rəhbərlərinin işçi görüşünün protokolu, qarşılıqlı ticarət haqqında statistik məlumatların informasiya mübadiləsinin texnoloji sxemi və 2015-2016-cı illər üçün ikitərəfli qarşılıqlı fəaliyyətin planı imzalanıb.

Sənədləri Azərbaycan Respublikası Dövlət Gömrük Komitəsinin sədri Aydın Əliyev və Rusiya Federasiyası Federal Gömrük Xidmətinin rəhbəri Andrey Belyaninov imzalayıblar.

Rusiya Federasiyası Federal Gömrük Xidmətinin nümayəndə heyətinin Azərbaycana səfəri fevralın 5-dək davam edəcək.

Azərbaycan.-2015.- 5 fevral.- S.5.