Azərbaycan taleyini özü müəyyən edir

Prezident İlham Əliyevin Almaniya və İsveçrədəki görüşləri Azərbaycanın həyata keçirdiyi müstəqil siyasəti bir daha nümayiş etdirdi

Çox qısa zaman kəsiyi ərzində dinamik və kompleks inkişafa nail olan Azərbaycanın regionun lider dövlətinə və beynəlxalq birlikdə söz sahibinə çevrilməsi dünyanın həm qəbul, həm də etiraf etdiyi gerçəklikdir. Bu gerçəkliyin əsası vaxtilə ulu öndər Heydər Əliyev tərəfindən müəyyən edilib, konturları cızılıb. Ulu öndərin müəyyən etdiyi yeni və güclü Azərbaycan inkişaf strategiyasının Prezident İlham Əliyevin əzmkarlığı, qətiyyəti, xarizması, yüksək siyasi və liderlik keyfiyyətləri ilə həyata vəsiqə alması bugünkü uğurlarımızı təmin edən əsas səbəbdir.

Prezident İlham Əliyevin həyata keçirdiyi siyasi kurs nəticəsində Azərbaycanın yeni dövrün tələblərinə cavab verən sürətli və kompleks inkişafı təmin olunub. XXI əsrin əvvəllərindən başlayaraq yüksək inkişaf sürəti götürmüş ölkə iqtisadiyyatı son illərdə yaşanan qlobal iqtisadi və maliyyə böhranı şəraitində də uğurla inkişaf etməkdə davam edib. Aparıcı ölkələr hələ də böhran qarşıdurması problemlərini həll etdiyi bir vaxtda, Azərbaycan dayanıqlı inkişafa yönəlmiş yeni strateji vəzifələri həyata keçirib. Bu baxımdan ölkəmizin makroiqtisadi dayanıqlıq göstəricilərinə görə dünyada ilk onluqda qərarlaşması təsadüfi sayıla bilməz. Həyata keçirilən müasirləşmə strategiyası və uğurlu sosial-iqtisadi siyasət nəticəsində ölkədəki yüksək iqtisadi artımın sosial rifaha və yüksək həyat standartlarına sürətli transformasiyası baş verib. Nəticədə Azərbaycan adambaşına düşən ümumi daxili məhsulun həcminə görə sürətlə irəliləyərək qısa zaman ərzində orta gəlirli dövlətlər qrupuna daxil olub.

Regionda və dünyada baş verən tarixi prosesləri düzgün qiymətləndirən, geosiyasi dəyişikliklərin gedişini xalqın maraqları çərçivəsinə yönəltməyə qadir olan, bu məqsədlə praqmatik, rasional gedişlər etməyi bacaran, qlobal siyasi və iqtisadi çağırışlara düzgün adekvat münasibət ortaya qoyan Prezident İlham Əliyev ölkəmizin inkişafına və təhlükəsizliyinə nail olmaqla yanaşı, dünya birliyində onun mövqelərini davamlı şəkildə gücləndirib. Dövlət başçısının düşünülmüş, məqsədyönlü fəaliyyəti ölkəmizdə milli birliyin, sabitliyin daha da möhkəmlənməsinə, Azərbaycanın regional və beynəlxalq miqyasda nüfuzunun daha da artmasına gətirib çıxarıb. Odur ki, fəaliyyəti ilə ölkə cəmiyyətindən daim dəstək alan, müasir qloballaşma dövründə istənilən məsələ üzrə Azərbaycanın milli maraqlarının sadiq təminatçısı kimi çıxış edən Prezident İlham Əliyev ulu öndərin layiqli davamçısı olaraq beynəlxalq miqyasda ölkəmizin yeganə və alternativsiz lideri kimi qəbul edilir.

İndiyədək keçirilmiş bütün yerli və xarici rəy sorğularının nəticələri də Prezident İlham Əliyevin yüksək reytinqini, xalq tərəfindən alternativsiz siyasi lider kimi dəstəkləndiyini dəfələrlə sübuta yetirib. Əksər dövlətlərin praktikasından məlum olduğu kimi, prezident kürsüsünə sahib olmuş siyasətçinin reytinqi seçkilər başa çatdıqdan bir qədər sonra tədricən aşağı düşməyə başlayır. Lakin son illərdə ölkəmizdə keçirilən bütün rəy sorğularının nəticələri göstərir ki, Prezident İlham Əliyev nadir siyasətçilərdəndir ki, onun vətəndaşlar arasında reytinqi nəinki sabitdir, əksinə durmadan yüksəlməkdədir. Bunun da əsas səbəbi cənab Prezidentin fəaliyyətinin nəticəsi olaraq insanların daim yüksələn etimadıdır.

Bir neçə gün əvvəl Almaniyaya işgüzar səfəri zamanı bu ölkənin Kansleri Angela Merkellə birgə keçirdiyi mətbuat konfransında verilən suala cavab olaraq Prezident İlham Əliyevin dediyi “Mənim reytinqimdə heç bir problem yoxdur. Azərbaycanda keçirilən sorğulara görə mənim reytinqim 90 faizə yaxındır. Bu da yəqin ki, son illər ərzində Azərbaycanda aparılan islahatlarla bağlıdır. Deyə bilərəm ki, Azərbaycan son 11 il ərzində iqtisadi cəhətdən dünyanın ən sürətlə inkişaf edən ölkəsidir. İqtisadiyyat 3 dəfədən çox artmışdır, işsizlik 5 faiz səviyyəsindədir, yoxsulluq da 5 faiz səviyyəsindədir. Davos Ümumdünya İqtisadi Forumu Azərbaycan iqtisadiyyatını rəqabətqabiliyyətliliyinə görə 38-ci yerə layiq görüb. Belə nəticələrlə, əlbəttə ki, hər bir rəhbərin reytinqi yüksək olmalıdır” sözləri də məhz xalqın dəstəyindən, sevgisindən və etimadından qaynaqlanır.

Dövlətlərin inkişaf səviyyəsini, nüfuzunu, beynəlxalq etimadını və bu kimi digər xüsusiyyətlərini xarakterizə edən əsas cəhətlərdən biri onun yeritdiyi siyasətin məzmun və mahiyyətidir. Təbii ki, hər ölkə dünya birliyinin subyekti olaraq həm özünün milli maraqlarına cavab verən və həm də müstəqil siyasət həyata keçirmək istəyir. Məhz bu konteksdən yanaşaraq əvvəldə də qeyd olunduğu kimi, yerləşdiyi regionun lider dövləti olan Azərbaycanın həm də beynəlxalq birlikdəki yerini möhkəmləndirməsi, söz sahibinə çevrilməsi dünya miqyasında qəbul edilən reallıqdır. Bu reallığı təsdiq edən bir çox amilləri sadalamaq mümkündür ki, bunlardan ən başlıcası Azərbaycanın yeritdiyi müstəqil siyasətdir. Müstəqil siyasət yeridən Prezident İlham Əliyev üçün Azərbaycanın dövləti maraqları hər şeydən ucadır.

Ulu öndər Heydər Əliyevdən başlanan bu siyasət bu gün çox uğurla və daha yeni formada davam etdirilməkdədir. Müstəqil siyasətin fəlsəfəsində həm də müstəqil iqtisadi siyasət və müstəqil qərarların qəbul edilməsində dayanır. Odur ki, Azərbaycanda dövlət adından qəbul edilən bütün qərarlar yalnız və yalnız Azərbaycanın öz müstəqil qərarlarıdır. Ölkəmizin sosial, siyasi, iqtisadi həyatına kiçicik bir məsələnin diktə edilməsi Azərbaycan dövləti üçün qəbul olunmazdır. Bununla bağlı kifayət qədər və beynəlxalq səviyyədə öz təsdiqini və dəstəyini tapmış faktlar ortaya qoymaq mümkündür. Azərbaycanın həyata keçirdiyi enerji siyasəti, sosial-iqtisadi inkişafı, Dağlıq Qarabağ münaqişəsinin həlli istiqamətində ortaya qoyduğu prinsipial mövqeyi, öz ərazilərini məhz dialoq və əməkdaşlıq üçün açıq olduğunu birmənalı şəkildə elan etməsi bu barədə kifayət qədər aydın fikir yeritməyə əsas verir.

Almaniyadan sonra Davosda keçirilən Dünya İqtisadi Forumunda iştirak etmək üçün İsveçrəyə işgüzar səfər edən Prezident İlham Əliyevə burada göstərilən münasibət də Azərbaycanın müstəqil siyasət yeridən ölkə olmasından irəli gəlir. Prezident İlham Əliyevin iştirakı ilə Davosda keçirilən sessiyalar göstərdi ki, müstəqil Azərbaycanın qazandığı uğurlar baxımından inkişaf etməkdə olan əksər dövlətlər üçün bir nümunə rolunu oynamaqdadır və sözügedən kontekstdə sosial-iqtisadi sferanın ən müxtəlif sahələrində ölkəmizin malik olduğu təcrübəyə getdikcə daha çox müraciət olunur. Xüsusən qlobal maliyyə böhranının yaratdığı fəsadlara qarşı dayanıqlıq həddini araşdıran dünyanın bir çox aparıcı mərkəzləri indi Azərbaycana daha çox maraq göstərməkdə, onun inkişaf dinamikasını tədqiq etməkdədirlər.

Əlbəttə, beynəlxalq miqyasda qazandığı yüksək etimadın kökündə dayanan əsas səbəblər məhz həyata keçirilən müstəqil siyasətdən irəli gəlir. Danılmaz faktdır ki, müstəqil siyasət həyata keçirənə beynəlxalq aləmdə də ehtiram göstərərlər. Faktiki müstəqil olmayan dövlətlərə olan münasibət isə başqa paytaxtlardan idarə olunan Ermənistan kimi dövlətlərin timsalında daha aydın görünür. Onlardan fərqli olaraq Azərbaycan beynəlxalq birliyin tamhüquqlu üzvü olmasını yalnız beynəlxalq sənədlər üzərində deyil, həm də əməldə təsdiq edir. Bu gün Azərbaycan dünyanı narahat edən hər bir məsələdə qətiyyətli və prinsipial mövqe tutur, beynəlxalq miqyasda sülhə və əmin-amanlığa layiqli töhfələr verir, Azərbaycan ordusunun bölmələri ayrı-ayrı ölkələrdə sülhün və əmin-amanlığın təmin olunmasında iştirak edir, beynəlxalq terrorçuluqla mübarizədə öz sözlərini deyirlər. Hansısa təşkilatın işində iştirak edib-etməməklə bağlı Azərbaycan özü qərar qəbul edir. Bu mənada faktiki siyasi və iqtisadi müstəqilliyi Azərbaycana beynəlxalq miqyasda yüksək ehtiramı şərtləndirən mühüm məqamlardan biridir.

Müstəqilliyin ən mühüm şərtlərindən biri ölkənin öz təbii sərvətlərinə tam sahib olmasıdır. Bu baxımdan zəngin karbohidrogen ehtiyatlara malik olan Azərbaycanın bu sahədə yürütdüyü siyasət hər birimizdə fəxarət hissi doğurur. Öz təbii sərvətlərinin tam sahibi olan Azərbaycanın neft-qaz strategiyası dünyada yüksək ehtiramla qəbul olunaraq ölkəmizin beynəlxalq imicinə müsbət təsirini göstərir. Prezident İlham Əliyevin yeritdiyi uğurlu enerji siyasəti nəticəsində dünya birliyinə təsir imkanları yüksələn Azərbaycan artıq beynəlxalq miqyaslı enerji-kommunikasiya layihələrinin lokomotivinə də çevrilib. Davosda Dünya İqtisadi Forumu çərçivəsində keçirilən “Regionların transformasiyası: Avrasiya” mövzusunda sessiyada həm enerji təhlükəsizliyi məsələləri, həm beynəlxalq çağırışlar və müstəqillik illərində Azərbaycanın keçdiyi inkişaf yolundan danışıldı. Bu məsələlərlə bağlı fikirlərini bölüşən Prezident İlham Əliyev bir daha bəyan edərək dedi: “Bu gün biz azadıq, öz bayrağımız var. Biz artıq BMT-nin üzvləriyik və öz taleyimizi özümüz təyin edirik. Bunu özümüz edirik”.

Azərbaycan tam müstəqil siyasət yürüdür. Prezident İlham Əliyevin Almaniya və İsveçrə səfərlərində keçirdiyi görüşlər Azərbaycanın həyata keçirdiyi müstəqil siyasəti, eləcə də bu siyasətin mahiyyətini və keyfiyyətini bir daha bütün dünyaya nümayiş etdirdi.

Rəşad CƏFƏRLİ,

Azərbaycan.-2015.- 5 fevral.- S.7.