Qafqaz Müsəlmanları İdarəsinin sədri

Məkkədə beynəlxalq konfransda iştirak edib

Qafqaz Müsəlmanları İdarəsinin (QMİ) sədri şeyxülislam Allahşükür Paşazadənin rəhbərlik etdiyi nümayəndə heyəti Səudiyyə Ərəbistanının Kralı, İki Müqəddəs Ocağın Xadimi Əlahəzrət Salman bin Əbdüləziz Al Səudun himayəsi ilə İslam Aləmi Liqasının “Terrorizmə qarşı mübarizə” mövzusunda təşkil etdiyi beynəlxalq konfransda iştirak etmək üçün fevralın 21-dən 24-dək Məkkədə səfərdə olub.

QMİ-nin mətbuat xidmətindən AzərTAc-a verilən məlumata görə,

Səudiyyə Ərəbistanı Kralının müşaviri, Məkkə quberniyasının əmiri Xalid Feysəlin açdığı konfransda dünyanın bir çox ölkələrindən ali dini liderlər, İslam alimləri, dini işlər üzrə nazirlər və müxtəlif elm və beyin mərkəzlərinin rəhbərləri iştirak ediblər.

İslam Aləmi Liqasının baş katibi Abdullah bin Əbdüllmühsin Əl-Türki konfransın mövzusunun aktuallığına toxunaraq, terrorizmin bütün dünyanı bürüyən bir bəla olduğunu, bu bəlanın qarşısının alınması üçün beynəlxalq ictimaiyyətlə yanaşı, bütün dinlərin əl-ələ verməli olduğunu vurğulayıb.

İslamın terrora qarşı olduğunu söyləyən, Quran ayələrindən sitatlar gətirən Əl-Əzharın şeyxi Əhməd Əl-Tayyib isə bir sıra Qərb ölkələrinin terroru İslamla bağlamağa çalışdıqlarını qətiyyətlə pisləyib, Qərb ölkələrindən çox bu gün müsəlman dünyasının terrordan əziyyət çəkdiyini təəssüflə qeyd edib.

Səudiyyə Ərəbistanının Kralı, İki Müqəddəs Ocağın Xadimi Əlahəzrət Salman bin Əbdüləziz Al Səudun müraciətini konfrans iştirakçılarına oxuyan Məkkə əmiri Xalid əl-Feysal ölkəsinin beynəlxalq terrorizmə qarşı mübarizədəki rolundan danışıb. Səudiyyə Ərəbistanının “İŞİD” terrorçu qruplaşmasına qarşı beynəlxalq koalisiyada təmsil olunmasının buna nümunə olduğunu diqqətə çatdırıb.

Tədbirin açılışından sonra günün ikinci yarısında nümayəndə heyətlərinin rəhbərlərinin çıxışları dinlənilib.

Konfransda çıxış edən Azərbaycan nümayəndə heyətinin rəhbəri şeyxülislam Allahşükür Paşazadə İslam dünyasının və bütün bəşəriyyətin kəskin ziddiyyətlər, qanlı olaylar və narahat gündəm yaşadığı bir dövrdə İslam Aləmi Liqasının belə bir konfransı təşkil etməsini məntiqi bir qərar kimi dəyərləndirərək minlərlə günahsız insanın məhv olduğu bir dönəmdə müsəlman dünyasının özünün sülh məramını bir daha bəşəriyyətə bəyan etməli olduğunu vurğulayıb.

Allahşükür Paşazadə bu gün dünyada, xüsusilə İslam coğrafiyasında müsəlmanların bir-birinin qanını axıtdığını məyusluqla qeyd edərək bildirib ki, eyni qibləyə namaz qılanların bir-birini kafir adlandıraraq qətlə yetirməsinin qarşısını almaq üçün İslam aləminin bütün nüfuzlu şəxsiyyətləri birləşməlidirlər.

Terror bəlasının Azərbaycan xalqından da yan keçmədiyini qeyd edən şeyxülislam Allahşükür Paşazadə XX əsrin ən dəhşətli faciələrindən olan Xocalı soyqırımının erməni ekstremizmi və terrorunun aydın nümunəsi olduğunu konfrans iştirakçılarının diqqətinə çatdırıb.

Sonra Allahşükür Paşazadənin İslam Aləmi Liqasının baş katibi Abdullah bin Əbdüllmühsin Əl-Türki ilə görüşü olub. Görüşdə Azərbaycana səfərini məmnunluqla xatırlayan Əl-Türki Ermənistan-Azərbaycan, Dağlıq Qarabağ münaqişəsinin həlli prosesi ilə maraqlanıb, ölkəmizin bu istiqamətdəki haqlı mövqeyini bir daha dəstəklədiyini söyləyib. Bu günlərdə Azərbaycan xalqının Xocalı faciəsinin 23-cü ildönümünü qeyd etməyə hazırlaşdığını bildirən A. Paşazadə müsəlman dünyasının bu soyqırımına laqeyd qalmamasının vacibliyini diqqətə çatdırıb.

Daha sonra Allahşükür Paşazadə Əl-Əzharın şeyxi Əhməd Əl-Teyyib, İordaniyanın Baş Qazisi Məhəmməd Həlil, Küveyt Əmirinin dini işlər üzrə müşaviri Adil Fəlah, bir sıra ərəb və müsəlman ölkələrinin baş müftiləri və dini işlər nazirləri ilə görüşlər keçirib.

Görüşlərdə Allahşükür Paşazadəni ölkəmizin Səudiyyə Ərəbistanındakı səfiri Rasim Rzayevin başçılığı ilə səfirliyin əməkdaşları müşayiət edib.