Azərbaycanın Baş naziri Türkiyə Cümhuriyyətinin xarici

işlər naziri Mövlud Çavuşoğlu ilə görüşüb

Fevralın 25-də Azərbaycan Respublikasının Baş naziri Artur Rasizadə ölkəmizə rəsmi səfərdə olan Türkiyə Cümhuriyyətinin xarici işlər naziri Mövlud Çavuşoğlu ilə görüşüb.

Nazirlər Kabinetinin mətbuat xidmətindən AzərTAc-a bildiriblər ki, görüşdə Azərbaycan və Türkiyənin tarixi dostluq və qardaşlıq ənənələrinin sarsılmazlığından söz açılıb, müasir dövrdə siyasi, iqtisadi, mədəni sahələrdə strateji əməkdaşlıq imkanlarının daha da genişləndiyi məmnunluqla vurğulanıb. Ölkələrimiz arasında qlobal enerji və nəqliyyat layihələrinin, habelə beynəlxalq və hərbi-texniki əməkdaşlıq və digər sahələrdə iş birliyinin milli maraqlar çərçivəsində bundan sonra da dərinləşdirilməsinin vacibliyi bildirilib.

Söhbət zamanı Ermənistan-Azərbaycan, Dağlıq Qarabağ münaqişəsinə toxunan tərəflər Azərbaycanın ədalətli mövqeyinin bütün beynəlxalq tədbirlərdə dəstəklənməsinin zəruriliyini qeyd edərək, problemin beynəlxalq hüquq normalarına uyğun, Azərbaycanın ərazi bütövlüyü və sərhədlərinin toxunulmazlığı prinsipləri əsasında həlli istiqamətində həmrəy mövqedən çıxış edəcəklərini bir daha təsdiqləyiblər.

Görüşdə regional və beynəlxalq əlaqələrin daha da möhkəmləndirilməsi və bölgədə sabitliyin qorunub saxlanmasına dair bir sıra digər məsələlər ətrafında geniş fikir mübadiləsi aparılıb.

Azərbaycan.-2015.- 26 fevral.- S.1.