Mövlud Çavuşoğlu: Ermənistan Azərbaycan torpaqlarının

işğalından heç nə əldə etməyib, əksinə çox şey itirib

Türkiyənin xarici işlər naziri Mövlud Çavuşoğlu fevralın 25-də ADA Universitetində mühazirə oxuyub.

AzərTAc xəbər verir ki, əvvəlcə ADA Universitetinin rektoru Hafiz Paşayev Mövlud Çavuşoğlunun həyat və fəaliyyətinin əsas mərhələləri barədə məlumat verib, universitetin tarixi, fəaliyyəti və beynəlxalq əlaqələri haqqında danışıb.

Nazir Mövlud Çavuşoğlu mühazirəsində Türkiyənin xarici siyasəti, regionda və dünyada gedən proseslər, Azərbaycan-Türkiyə əlaqələrinin inkişafı, ölkəmizin son illərdə əldə etdiyi uğurlar, Dağlıq Qarabağ münaqişəsi haqqında danışıb.

Mövlud Çavuşoğlu deyib ki, son 7-8 ildir Avropada tüğyan edən iqtisadi böhranın təsirlərini hələ də yaşayırıq. Belə bir mərhələdə Türkiyə və Azərbaycan fərqlilik ortaya qoyub. Azərbaycanın bugünkü inkişafının təkcə Bakı ilə məhdudlaşmadığını, bu inkişafın ölkənin bütün bölgələrinə də təsir etdiyini görürük. Azərbaycan iqtisadiyyatı yalnız neft və qaza əsaslanmır. Bu gün başqa ölkələrə yardım edən Azərbaycan dünyada artıq qəbul olunmuş oyunçuya çevrilib. Bu ölkənin beynəlxalq aləmdə mövqeyi güclənir. Azərbaycan bölgədəki önəmli layihələrin mərkəzidir. Biz qurduğumuz birliklə bölgədə sülh və əmin-amanlığı təmin etməyə çalışırıq. Türkmənistan, İran və Gürcüstanla üçtərəfli əməkdaşlıqla bu istiqamətdə səylə çalışırıq. Bizim niyyətimiz heç kəsə zərər vermək deyil, bu birliyin bölgədə hər kəsə faydası var.

Dağlıq Qarabağ münaqişəsindən bəhs edən nazir deyib ki, Ermənistan Azərbaycan torpaqlarının işğalından heç nə əldə etməyib, əksinə çox şey itirib. Beynəlxalq səviyyədə qəbul edilmiş bütün sənədlər Dağlıq Qarabağın Azərbaycana mənsub olduğunu birmənalı şəkildə təsdiq edir. Bu işğal Ermənistan üçün çoxlu problemlər yaradır. Dağlıq Qarabağ münaqişəsi Cənubi Qafqazda sülh və sabitlik yolunda ən böyük maneədir. Türkiyə münaqişənin tez bir zamanda nizamlanmasını istəyir.

Nazir fevralın 26-da Xocalı faciəsinin 23-cü ildönümünün qeyd edildiyini xatırladaraq deyib: “Biz şəhidlərin xatirəsini yad edirik, onları heç vaxt unutmayacağıq”.

Azərbaycan-Türkiyə əlaqələrinin sürətlə inkişaf etdiyini deyən Mövlud Çavuşoğlu bildirib ki, biz bir millət, iki dövlət olaraq birlikdə öz problemlərimizi həll etdiyimiz kimi, digər problemlərin də öhdəsindən gələ bilərik.

Azərbaycan.-2015.- 26 fevral.- S.4.