Əfqanıstan Prezidenti Azərbaycanın

qazandığı uğurları yüksək qiymətləndirib

İqtisadiyyat və sənaye naziri Şahin Mustafayevin rəhbərlik etdiyi Azərbaycan nümayəndə heyəti Əfqanıstanda səfərdə olub.

Nazirliyin mətbuat xidmətindən AZƏRTAC-a bildirilib ki, səfər zamanı Azərbaycan nümayəndə heyəti Əfqanıstan Prezidenti Məhəmməd Əşrəf Qani tərəfindən qəbul edilib.

Görüşdə Əfqanıstan Prezidenti Azərbaycanın iqtisadi inkişafından məmnunluğunu ifadə edərək, ölkəmizin qazandığı uğurları yüksək qiymətləndirib.

Cənab Məhəmməd Əşrəf Qani ölkələrimiz arasında əməkdaşlığın inkişafı baxımından hüquqi bazanın genişləndirilməsinin əhəmiyyətini qeyd edib, enerji, tranzit və s. sahələrdə əməkdaşlıq imkanlarına, Əfqanıstana investisiya qoyuluşuna dair fikirlərini bölüşüb, ölkəsinin neft-qaz sahəsində Azərbaycan təcrübəsindən yararlanmaqda maraqlı olduğunu diqqətə çatdırıb.

Cənab Məhəmməd Əşrəf Qani salamlarını Azərbaycan Prezidentinə çatdırmağı xahiş edib.

Azərbaycan nümayəndə heyətinin rəhbəri, iqtisadiyyat və sənaye naziri Şahin Mustafayev səmimi qəbula görə təşəkkür edib, Azərbaycan Respublikasının Prezidenti İlham Əliyevin salamlarını Əfqanıstan Prezidentinə çatdırıb.

Nazir Şahin Mustafayev əlaqələrin genişləndirilməsi üçün imkanların olduğunu vurğulayaraq, sənaye, enerji, nəqliyyat, tikinti materiallarının istehsalı, eləcə də təhsil, mədəniyyət və humanitar sahələrdə əməkdaşlığı qeyd edib.

Azərbaycan nümayəndə heyəti səfər zamanı Əfqanıstanın Mədən və Neft naziri Daud Saba və Əfqanıstanın Baş icraçı məmuru Abdullah Abdullah ilə də görüşüb.

Görüşlərdə Azərbaycan və Əfqanıstan arasında əməkdaşlığın qarşılıqlı hörmət və faydalı əməkdaşlıq prinsipləri üzərində qurulduğu, Əfqanıstan prezidentinin 2014-cü ildə Azərbaycana səfərinin, bu ilin fevralında isə Münxen Təhlükəsizlik Konfransında Azərbaycan və Əfqanıstan Prezidentlərinin görüşünün ölkələrimiz arasında əməkdaşlığın inkişafında əhəmiyyəti vurğulanıb.

Həmçinin enerji, tranzit, logistika, tikinti materiallarının istehsalı və digər sahələrdə əməkdaşlıq, eləcə də qarşılıqlı maraq doğuran digər məsələlər də müzakirə edilib.

Azərbaycan.-2015.- 28 fevral.- S.2.