Azərbaycanlı alimlərin İsrailə səfəri davam edir

Azərbaycan Milli Elmlər Akademiyasının (AMEA) prezidenti, akademik Akif Əlizadənin rəhbərlik etdiyi nümayəndə heyətinin İsrailə səfəri davam edir.

AMEA-dan AZƏRTAC-a bildiriblər ki, Qüds şəhərində səfərin sonuncu günündə akademik Akif Əlizadə, AMEA-nın vitse-prezidenti, akademik İbrahim Quliyev və Yer Elmləri Bölməsinin akademik-katibi, akademik Fəxrəddin Qədirov İsrailin Xarici İşlər Nazirliyinin (XİN) Baş katibinin müavinləri Rafael Qamzo və Zvi Rav-Ner ilə görüşüblər. İsrail XİN-in Beynəlxalq Əməkdaşlıq Departamentinin rəhbəri Dan Stavın iştirakı ilə keçirilən görüşdə iki ölkənin alimləri arasında əməkdaşlıq, tələbə mübadiləsi və digər məsələlər müzakirə edilib.

Səfər çərçivəsində Azərbaycan nümayəndə heyəti Təl-Əvivdə İsrailin ali təhsil müəssisəsi və çoxprofilli elmi-tədqiqat ocağı olan Veytsman adına İnstitutda da görüşlər keçirib. Bildirilib ki, bu institutda riyaziyyat, fizika, kimya, biologiya, informatika, həmçinin nevrologiya və beyin araşdırmaları sahələrində tədqiqat bölmələri fəaliyyət göstərir. Bundan əlavə, ali təhsil müəssisəsində ikinci və üçüncü akademik dərəcə almaq arzusunda olan tələbələri qəbul edən Faynberq adına ali məktəb də fəaliyyət göstərir. Alimlərimiz institutun auditoriya və laboratoriyaları, eləcə də bu elm müəssisəsində ötən əsrin 50-ci illərinin əvvəllərində yaradılan ilk kompyuterlərdən biri ilə tanış olublar.

Daha sonra nümayəndə heyətinin iştirakı ilə İsrailin ən böyük ali təhsil müəssisələrindən olan Təl-Əviv Universitetində görüş keçirilib. Universitetin 9 fakültəsində 25 mindən çox tələbənin təhsil aldığı bildirilib, İsrailin faydalı qazıntıları haqqında maraqlı mühazirə dinlənilib. Mühazirədə vurğulanıb ki, İsrail alimləri karbohidrogen axtarışı zamanı Azərbaycan alimlərinin təcrübəsindən də istifadə edirlər.

Azərbaycan.-2015.- 28 fevral.- S.2.