Əmək və əhalinin sosial müdafiəsi naziri Masallıda

beş rayondan olan vətəndaşları qəbul edib

Fevralın 27-də əmək və əhalinin sosial müdafiəsi naziri Səlim Müslümov nazirliyin Masallı Rayon Əhalinin Sosial Müdafiəsi Mərkəzinin inzibati binasında Lənkəran, Masallı, Astara, Lerik, Yardımlı rayonlarının sakinlərini qəbul edib.

Əmək və Əhalinin Sosial Müdafiəsi Nazirliyinin ictimaiyyətlə əlaqələr şöbəsindən AZƏRTAC-a bildiriblər ki, qəbul zamanı müraciətlər əsasən mənzillə təmin olunma, dövlət büdcəsi hesabına minik avtomobili ilə təmin edilmə ilə bağlı olub.

Müraciətlərin bir qismi isə məşğulluğun təminatı, bərpa müalicəsinə köməklik, zərərə görə ödəncin verilməsi ilə bağlı əmək hüququnun müdafiəsi, əlillik dərəcəsinin artırılması və s. məsələləri əhatə edib. Habelə ayrı-ayrı müraciətlərdə sosial cəhətdən həssas qruplardan olan insanların sosial müdafiəsinin gücləndirilməsi üçün görülən işlərə görə dövlət başçısına minnətdarlıq ifadə olunub.

S.Müslümov müraciətlərdə qaldırılan məsələlərin obyektiv və ədalətli şəkildə araşdırılaraq cavablandırılması və müvafiq tədbirlər görülməsi barədə nazirliyin aidiyyəti struktur bölmələrinin məsul şəxslərinə tapşırıqlar verib. Ayrı-ayrı vətəndaşların məşğulluğunun təminatına yerindəcə köməklər göstərilib, 1 nəfər yerindəcə əlil arabası ilə təmin olunub. Habelə nazir tərəfindən bir sıra şəxslərin bərpa müalicəsinə cəlb edilməsi, müvafiq reabilitasiya vasitələri ilə təmin olunması ilə bağlı göstərişlər verilib.

Nazir 2015-ci ildə də bütün sosial proqramların uğurla davam etdiriləcəyini, əhalinin sosial müdafiəsinin gücləndirilməsinə yönələn heç bir proqramın təxirə salınmayacağını, hazırda ölkədə bütün sosial ödənişlərin gecikdirilmədən, vaxtlı-vaxtında həyata keçirildiyini vurğulayıb. Bildirib ki, Prezident İlham Əliyevin birbaşa qayğısı növbədə olan müharibə əlilləri və şəhid ailələrinin mənzillə təminatı işlərini sürətləndirməyə imkan verib. İndi ölkənin digər bölgələrində olduğu kimi, bu qəbulda sakinlərini qəbul etdiyimiz rayonlarda da müharibə əlilləri və şəhid ailələri üçün mənzil tikintisi işləri aparılır. Hazırda onlar üçün Masallı rayonunda 6 ədəd fərdi ev tikilir. Yaxın günlərdə Lənkəranda 9, Lerikdə 10, Astarada 6, Yardımlıda 2 ədəd fərdi evin də tikintisinə başlanılacaq.

S.Müslümov, həmçinin dövlət büdcəsi hesabına minik avtomobili almaq üçün növbəyə dayanmaq istəyən müharibə əlillərinin bunun üçün tibbi göstərişlərinin olub-olmamasının araşdırılmasını tapşırıb. Qeyd edilib ki, müharibə əlillərinin minik avtomobili ilə təminatının sürətləndirilməsi, təbii ki, bunun üçün növbəyə dayanmaq istəyənlərin sayını artırıb. Lakin bu sahədə qanunvericiliyin tələblərinə əməl edilməsinə ciddi nəzarət olunur. Belə ki, ötən il bu məqsədlə müraciət edənlərin sayı 3 min 460 nəfər olub. Onlardan yalnız 20,8 faizinin minik avtomobilinə tibbi göstərişinin olduğu müəyyən edilib və növbəyə götürülüblər. Tibbi göstərişin hansı hallarda verilməsi nazirliyin rəsmi internet saytının (www.mlspp.gov.az) “Fəaliyyət və xidmətlər” bölümünün “Avtomobillərlə təminat” alt-bölümündə təqdim olunur.

Qəbulda nazirliyin səlahiyyətlərinə aid olmayan məsələlərlə bağlı müraciətlər edilib və onlar müvafiq qurumlara çatdırılmaq üçün qeydiyyata alınıb.

Lənkəran, Astara, Lerik, Yardımlı rayonlarından qəbula yazılmış vətəndaşların xüsusi ayrılmış nəqliyyatla Masallı rayonuna aparılıb gətirilmələri təmin olunub.

Azərbaycan.-2015.- 28 fevral.- S.5.