Dövlət dəstəyinin real bəhrəsi

Ötən il Goranboy rayonu üçün Prezident İlham Əliyevin rayona səfəri ilə əlamətdar oldu. Dövlət başçısı Heydər Əliyev Mərkəzinin, “Goranboy” Paylayıcı Elektrik Məntəqəsinin, Goranboy-Ağcakənd avtomobil yolunun açılışında, həmçinin şəhərin su təchizatının yenidən qurulması və kanalizasiya çəkilişinin başa çatması ilə təşkil olunmuş mərasimdə iştirak etdi.

Bu, son 5 ildə Prezident İlham Əliyevin sərhəd bölgəsində yerləşən Goran torpağına dördüncü səfəri idi. Dövlət başçısının hər gəlişi bir-birindən fərəhli hadisələrlə əlamətdar olur. Prezident son bir ildə rayonun sosial-iqtisadi inkişafının sürətləndirilməsi ilə əlaqədar 2 mühüm sərəncam imzalamışdır. Qısa müddət ərzində digər işlərlə yanaşı, rayonda su, işıq və yol çəkilişi kimi çox mühüm sahələrdə geniş işlər görülmüşdür.

Ötən ilin yekunları və cari ildə qarşıda duran vəzifələrin müzakirəsinə həsr olunmuş toplantıda bu barədə geniş söhbət getdi. Rayon icra hakimiyyətinin başçısı Nizaməddin Quliyev iqtisadi-sosial həyatın hər sahəsində görülən işlər və qarşıda duran vəzifələr haqqında geniş məlumat verdi. Sonra ayrı-ayrı idarə və müəssisə nümayəndələrinin, bələdiyyələrin, iş adamlarının çıxışları dinlənildi.

Qeyd olundu ki, sərhəd bölgəsində yerləşən Goranboy rayonu son illər hər sahədə sürətlə inkişaf edir. Ötən 5 il ərzində ümumi məhsul istehsalı 4,2 dəfə artmış, abadlıq-quruculuq işlərinin miqyası dəfələrlə çoxalmışdır. 2014-cü ildə büdcənin mədaxil hissəsi üzrə proqnoza 116,9 faiz əməl edilmişdir. Rayonda Gənclər Mərkəzi, Şahmat Məktəbi, Avtovağzal kompleksi, Paylayıcı Elektrik Qurğusu, yeni məktəb binaları inşa edilmiş, Mədəniyyət evi, iki min yerlik stadion, Dəliməmmədli şəhər xəstəxanası əsaslı təmir olunmuş, müxtəlif sosial obyektlər, fərdi evlər tikilmiş, yaraşıqlı parklar, bağlar salınmış, körpülər, yollar çəkilmişdir.

Rayonun hər tərəfini bəzəyən müasir obyektlər daha çox diqqəti cəlb edir. Xüsusən Nizami meydanında, Mədəniyyət və istirahət parkında görülən işlər göz oxşayır. Burada milli memarlıq üslubunda üçmərtəbəli Heydər Əliyev Mərkəzinin tikintisi başa çatmış, ümummilli liderin abidəsi ucaldılmışdır. Ətrafda müasir işıqlandırma sistemi və bir neçə fontan quraşdırılmış, yaşıllıq zolağı salınmış, dekorativ ağaclar və gül kolları əkilmiş, avtomatik suvarma qurğusu işə salınmışdır.

Ötən ilin ən önəmli obyektlərdən biri də Murovdağ-Goranboy su kəməridir. Kəmərin uzunluğu təqribən 45 kilometrdir. Layihə çərçivəsində 109,6 kilometr şəhərdaxili su xətti, 81,7 kilometr kanalizasiya sistemi çəkilib. Magistral xətt boyunca 13 suvarma qurğusu, 11 hovuz düzəldilib, hər birinin həcmi 1000 kubmetr olan 3 anbar tikilib, laboratoriyalar, inzibati binalar və istehsalat bazası yaradılıb.

Ballıqaya kəndindən gələn saf su Goranboyu və rayonun 18 yaşayış məntəqəsinin, o cümlədən Naftalan şəhərinin, Qaşaltı, Qasımbəyli kəndlərinin və digər yerlərin içməli su tələbatını tam ödəyə bilir. Murovdağdan gələn su bu yaxınlarda təmas xəttində yerləşən Tap Qaraqoyunlu kəndinə verilmiş və yüzlərlə evin qabağında bulaqlar tikilmişdir. Bu kənddə xeyir-şər evi tikilmiş, Bayraq meydanı yaradılmış, Əsgər-Ana abidəsi ucaldılmış, qəfil atəşdən mühafizə üçün 840 metr uzunluğunda hasar çəkilmişdir

Toplantıda qeyd olundu ki, ötən il Goranlı, Baxçakürd, Tatarlı, Həmənli, Əhmədabad, Ağamalıoğlu kəndlərinə abad yollar çəkilib, Məşədiqaralar - Eyvazlılar yolu əsaslı təmir edilib. Dəliməmmədli şəhərinin, Qaradağlı, Qaraqucaq və Yolğunlar kəndlərinin yollarındakı körpülər düzəldilib, Kürəkçay üzərində yeni körpü salınıb. Bundan əlavə, Zeyvə, Hacallı, Səfibəyli, Qaraçinar, Xınalı, Todan kəndlərində və başqa yerlərdə 49 kilometr kəndarası yollar təmir edilib.

35 min nəfər əhalinin yaşadığı irili-xırdalı 18 kəndi birləşdirən Goranboy-Ağcakənd avtomobil yolunun tikintisi üçün Prezident İlham Əliyevin 2013-cü il 30 iyul tarixli sərəncamı ilə ilkin olaraq 3 milyon, ötən ilin iyun ayının 10-da isə 7,2 milyon manat vəsait ayrılmışdır. Artıq yolun 24 kilometrlik hissəsinin inşası başa çatıb. Ətrafda abadlıq, yaşıllıq işləri görülüb.

Rayonda əhalinin arzu və təkliflərinə xüsusi diqqət yetirilir. Görüşlərdən birində Sarov kəndinin bir qrup sakini Dəliməmmədli-Sarov avtomobil yolunun təmiri barədə məsələ qaldırmışdı. Çox çəkmədən 3 kilometrlik bu yol təmir edilərək asfalt-beton örtüklə üzləndi.

Ümumiyyətlə, rayonda sosial problemlər operativ həll olunur. Məsələn, keçən il Qarabağ əlilləri və şəhid ailələri üçün altımərtəbəli yaşayış binası istifadəyə verilib. Əlavə bu qəbildən olan 12 ailə üçün fərdi evlərin inşasına başlanılıb. Təkcə son illər 24 məktəb binası tikilib. Xınalı kəndində uşaq bağçası açılıb. Goranboy şəhərində 100 yerlik uşaq bağçasının inşasına başlanılıb, Goranlı kəndində yeni kitabxana istifadəyə verilib. Veyisli kəndində 2 yerdə istilik sistemi quraşdırılıb.

Bunlardan başqa, turizmin inkişafı ilə əlaqədar Şadılı və Həmənli, Rəhimli kəndlərində qədim abidələr, kurqanlar tədqiq olunur. Yollar boyu məlumat lövhələri hazırlanır. Habelə, yerlərdə rabitə-telekommunikasiya sistemləri sahmana salınır, Olimpiya idman kompleksi inşa edilir.

Tənqid və özünütənqid şəraitində keçən toplantıda bir sıra yerlərdə yol verilən nöqsanlar da göstərildi, xüsusən baytarlıq xidmətinin, Sanitar Epidemiologiya Stansiyasının, kommunal təsərrüfatının, yaşıllıqların mühafizəsinin və digər xidmət sahələrinin fəaliyyəti ciddi tənqid olundu, problemlərin aradan qaldırılması üçün konkret tapşırıqlar verildi.

İstər hesabat məruzəsində, istərsə də ayrı-ayrı çıxışlarda rayonda aqrar sahənin inkişafına, xüsusən yaz-tarla işlərinə hazırlığın vəziyyətinə də ətraflı toxunuldu, taxıl və digər bitkilərin əkini sahələrinə aqrotexniki qaydada xidmət göstərilməsinin vacibliyi xüsusi vurğulandı. 2015-ci ilin “Kənd təsərrüfatı ili” elan olunması ilə əlaqədar bitkiçiliyin və maldarlığın inkişafı üçün geniş tədbirlər planı hazırlandığı bildirilirdi.

Toplantıda Prezident İlham Əliyevə müraciət qəbul olundu.

Əhməd İSAYEV,

Azərbaycan.-2015.- 28 fevral.- S.6.