“Corriera dello Sport” qəzeti: Azərbaycan 2024-cü ildə keçiriləcək Yay Olimpiya Oyunlarına ev sahibliyi etmək iqtidarındadır

İtaliyanın “Corriera dello Sport” qəzetində Azərbaycanın 2024-cü ildə keçiriləcək Yay Olimpiya Oyunlarına ev sahibliyi edə bilməsi ilə bağlı məqalə dərc olunub.

Paris, Boston, Budapeşt, Hamburq, Roma ilə yanaşı, Bakının da Yay Olimpiya Oyunlarına namizədliyini irəli sürə biləcəyinin vurğulandığı yazıda Azərbaycanın İtaliyadakı səfiri Vaqif Sadıqovun fikirləri yer alıb: “2024-cü ildə Olimpiya Oyunlarına ev sahibliyi etmək Azərbaycanın əsas hədəflərindən biridir. Azərbaycan müstəqil dövlət olaraq ilk dəfə 1996-cı ildə Atlantada keçirilmiş Yay Olimpiya Oyunlarında iştirak edib. Olimpiya Oyunlarında Azərbaycanı təmsil edən idmançılar getdikcə daha yüksək nəticələr göstərərək medallarının sayını artırırlar. Artıq idmançılarımız növbəti Olimpiya Oyunlarına da məsuliyyətlə hazırlaşırlar. İlk Avropa Oyunlarına ev sahibliyi etməklə Azərbaycan böyük təcrübə əldə etdi. Olimpiya Oyunlarına bərabər səviyyədə bir tədbir keçirərək növbəti Avropa Oyunları üçün yüksək standartlar yaratdı. Bu Oyunlar üçün tikilmiş yeni idman obyektləri növbəti mötəbər idman tədbirləri üçün də istifadə olunacaq. Bu tədbirlər sırasında Formula-1 üzrə Avropa Qran-pri yarışları, 42-ci Şahmat Olimpiadası və IV İslam Həmrəylik Oyunları və s. durur. Gənclər və idman sahələrinin inkişafı Azərbaycan hökumətinin əsas prioritetlərindəndir”.

Müəllif oxucuların diqqətinə çatdırır ki, Azərbaycanın sürətlə inkişaf edən iqtisadiyyatı idmanın da tərəqqisinə müsbət təsir göstərir. Bakıda yaradılmış geniş idman infrastrukturu bu şəhərin 2024-cü ildə keçiriləcək Yay Olimpiya Oyunlarına güclü namizəd olduğunu göstərir.

Maqsud Dadaşov

AZƏRTAC-ın xüsusi müxbiri

Roma

Azərbaycan.- 2015.- 1 iyul.- S. 6.