I Avropa Oyunları dünya idman tarixinə əbədi həkk olundu

İlk Avropa Oyunlarının həyəcanlı anlarının təsirindən hələ ayrıla bilməmişik. Ötən ayın 12-dən qitəmizin, dünyanın diqqət mərkəzində olan, yüksək səviyyədə təşkili ilə hətta ən tələbkar mütəxəssisləri də heyrətə gətirən bu böyük bayram tezliklə Avropanın idman hərəkatında yeni dövrün ilk səhifəsi kimi tarixdə özünə layiqli imic qazanmışdır. Oyunların təşkili dünyanın, demək olar, hər yerində böyük rəğbətlə qarşılanmış, iştirakçıların və tamaşaçıların qəlbində xoş hisslər oyatmışdır.

“Bakı-2015” I Avropa Oyunlarının möhtəşəm bağlanış mərasimində ölkəmizin birinci xanımı, “Bakı-2015”in Təşkilat Komitəsinin sədri Mehriban Əliyevanın və Avropa Olimpiya Komitəsinin prezidenti Patrik Hikkinin çıxışında yarışların bütün beynəlxalq standartlara uyğun keçirildiyi, medallar uğrunda mübarizənin ədalətli idman rəqabəti şəraitində davam etdirildiyi, xalqımızın qonaqpərvərliyi və səmimiyyəti minnətdarlıq hissi ilə qeyd edilmişdir.

Bu möhtəşəm yarışlarda idmançılarımız 21 qızıl, 15 gümüş və 20 bürünc medal qazanmışlar. Buna Azərbaycanın idman ictimaiyyəti, bütün xalqımız ürəkdən sevinir. Bütün parametrlərlə yüksək səviyyədə keçirilən bu Oyunların sevinci, qüruru biz alimləri ikiqat fərəhləndirmişdir. Bəlkə də bu, 18-20 yaşlı bir gənc üçün adi görünə bilər, amma qismən yaşlı nəslin nümayəndələri Azərbaycanda belə möhtəşəm idman bayramını, belə idman təntənəsini heç vaxt görməmişdilər. Bu da ölkəmizin inkişafını özündə ehtiva edən unudulmaz hadisədir. Bütün bunlar müstəqil və müasir Azərbaycan dövlətinin qurucusu və memarı dahi Heydər Əliyevin qoyduğu siyasətin davamıdır. Ulu öndərin Azərbaycanın inkişafında xüsusi önəm verdiyi sahələrdən biri də idman siyasəti idi.

Azərbaycanın birinci xanımı Mehriban Əliyevanın təşkilatçılığı ilə yüksək səviyyədə öz işini başa çatdıran və dünya idman tarixinə qızıl hərflərlə yazılan ilk Avropa Oyunları bu siyasətin uğurlu bəhrəsidir. Bu sahədə Prezident İlham Əliyevin Heydər Əliyev siyasi kursunu qətiyyətlə davam etdirməsi Azərbaycanı dünyanın idman mərkəzlərindən birinə çevirmişdir. İndi ölkəmiz dünyanın ən möhtəşəm idman yarışlarına, nüfuzlu beynəlxalq forum və simpoziumlara, digər tədbirlərə evsahibliyi edir. Bu isə Azərbaycanın sürətlə artan nüfuzundan xəbər verir.

Yüksək təşkil olunan “Bakı-2015” ilk Avropa Oyunları öz zəhməti ilə təkcə idmançıları deyil, bütün idmansevərlərin və tarixin yaddaşında daim yaşayacaqdır.

Arif MEHDİYEV,

akademik

Azərbaycan.- 2015.- 2 iyul.- S. 3.