Avropa Oyunlarından söz düşəndə ilk növbədə Azərbaycan xatırlanacaq

Bakıda keçirilən I Avropa Oyunları idmançıların, tarixçilərin və siyasətçilərin görüşlərində, jurnalistlərin yazılarında dönə-dönə, zaman-zaman xatırlanacaq. Oyunların açılış mərasimi və sonrakı günlər ölkəmizin möhtəşəmliyini bütün dünyaya bəyan etdi. Yarışların çox böyük uğurla başa çatmasına baxmayaraq xarici mətbuat, telekanallar onun möhtəşəmliyindən yazırlar.

Yüksək peşəkarlıqla hazırlanan bu tədbirlə Azərbaycan dünyaya bir neçə önəmli mesaj verdi. Oyunların açılış mərasimində kompozisiyada Nizami Gəncəvinin ölməz əsərlərindən seçmələrin yer alması minlərlə, milyonlarla tamaşaçıya xatırlatdı ki, Azərbaycan həm də müdrik şairlər məkanıdır. “Sarı gəlin” mahnısına sahib çıxmaq istəyən bədnam qonşularımız da öz paylarını aldılar. Qobustan qayalarının, xalçalarımızın təsviri, muğamın səslənməsi xalqımızın qədim tarixə və zəngin mədəniyyətə malik olmasını bir daha dünyaya çatdırdı. Açılışda baş verənləri sözlə demək asandır, lakin bütün bu və digər mürəkkəb kompozisiyaları qısa müddətdə peşəkarlıqla hazırlamaq və yüksək səviyyədə gerçəkləşdirmək böyük uğurdur. Azərbaycanın birinci xanımı Mehriban Əliyevanın rəhbərlik etdiyi Təşkilat Komitəsinin həqiqətən gərgin əməyinin bəhrəsidir. “Bakı-2015” ilk Avropa Oyunlarının Təşkilat Komitəsi 7 rəsmi tərəfdaşla çalışıb. Yarışlarda Azərbaycan da daxil olmaqla 50-dək ölkədən təxminən 6 min idmançı iştirak edib. Oyunlar 100-dən artıq ölkədə, o cümlədən Avropada, Asiyada, Afrikada, Şimali və Cənubi Amerikada, eləcə də Avstraliyada yayımlanıb. Yarışlara 150 Olimpiya, 200-ə yaxın dünya çempionunun qatılması Oyunların çox böyük önəmə malik olduğunun göstəricisidir.

İlk Avropa Oyunları hələ də dünya mediasının diqqət mərkəzindədir. Xarici ölkələrin televiziya verilişlərində, böyük oxucu auditoriyasına malik qəzetlərdə “Unudulmaz idman bayramı”, “Avropa Oyunlarını Azərbaycan reallığa çevirdi”, “Azərbaycan qitənin idman tarixini yazdı”, “Bakı dünyanın ən gözəl şəhərlərindən biridir” və digər bu qəbildən olan yazılar yer alıb. Rusiya Federasiyası Dövlət Dumasının Ailə, Qadın və Uşaq məsələləri üzrə Dövlət Komitəsi sədrinin müavini Larisa Yakovleva “Parlamentskaya qazeta”nın mətbuat mərkəzində “Azərbaycanda I Avropa Oyunları. Siyasi aspekt” mövzusunda keçirilmiş “dəyirmi masa” zamanı Oyunların açılışından bəhs edərkən heyranlıqla demişdir: “Mən bu gün təsəvvürəgəlməz dərəcədə möhtəşəm bir hadisənin şahidi olmuşam”.

Oyunların açılış mərasimini izləmək məqsədilə paytaxtımıza gələn turistlər də, milli komandaların təmsilçiləri də ölkəmizin ilk Avropa Oyunlarına yüksək səviyyədə hazırlaşdıqlarını bildirirlər. Bakıya gələn əcnəbi qonaqlar ölkəmizin gəzməli, görməli, tarixi memarlıq abidələri ilə maraqlanır, konsert salonlarında, televiziyada, teatr və kino müəssisələrində Azərbaycan mədəniyyəti və incəsənəti ilə tanış olur, qədim Bakının gözəlliklərinə heyran qaldıqlarını, Azərbaycan xalqının qonaqpərvərliyini, gözəl ənənələrə malik olduğunu söyləyirlər.

Bu uğurların təməlində sözsüz ki, ulu öndər Heydər Əliyevin müəyyənləşdirdiyi məqsədyönlü siyasət dayanır. İlk Avropa Oyunlarının Azərbaycanda keçirilməsi ulu öndər Heydər Əliyevin idman siyasətinin davamıdır. Ümummilli lider Heydər Əliyevin “İdman elə bir sahədir ki, idmançılarımız müxtəlif ölkələrdə yarışlarda iştirak edir, qələbələr qazanırlar və hər dəfə müstəqil Azərbaycanın adını ucaldırlar. Müstəqil Azərbaycanın himni çalınır, müstəqil Azərbaycanın bayrağı qaldırılır və müstəqil Azərbaycan dünyanın müxtəlif ölkələrində tanınır. Demək olar ki, idman kimi Azərbaycanın müstəqilliyinin rəmzlərini nümayiş etdirən ikinci bir vasitə yoxdur” fikirləri bu sahənin inkişafına verilən önəmi şərtləndirən əsas amillərdəndir. Gənclərə diqqət və qayğını dövlət siyasətinin əsas tərkib hissəsinə çevirən ulu öndər fiziki cəhətdən sağlam gənclərin yetişdirilməsinə xüsusi diqqət yetirirdi. Bu siyasətin Prezident İlham Əliyev tərəfindən uğurla davam etdirilməsi nəticəsində Azərbaycan indi dünyada və Avropada həm də idman ölkəsi kimi tanınır. Bu sahədə uğurlarımız beynəlxalq yarışlarda əldə etdiyimiz medallarla ölçülür, eyni zamanda paytaxt və bölgələrdə yaradılmış müasir idman infrastrukturu bu göstəriciləri tamamlayır. Buna ölkəmizdə keçirilmiş dünya, Avropa çempionatlarını əlavə etsək, bir daha görərik ki, doğrudan da, Azərbaycanda idman sürətlə inkişaf edir. İdmanın kütləviliyi təmin edilir və Azərbaycanda bu gün Olimpiya hərəkatı çox yüksək səviyyədədir.

Təəssüf ki, Azərbaycanın uğurlarını həzm edə bilməyən qüvvələr də var. Onlar ilk Avropa Oyunlarına hazırlıq mərhələsində ölkəmizə qarşı “qara piyar” kampaniyasına start vermişdilər. Bunlar ABŞ-dakı müəyyən qüvvələr, bəzi Avropa ölkələrindəki islamofob dairələr, xaricdəki erməni lobbisi tərəfindən koordinasiya olunmuş şəkildə aparılan “qara piyar” kampaniyasında özlərini “beynəlxalq” statuslu qurum adlandıran, əslində isə milli dövlətlərə qarşı təzyiq aləti qismində çıxış edən “Human Rights Watch”, “Freedom House”, “Article XIX”, “Sərhədsiz peportyorlar”, “Transparency İnternational” kimi təşkilatlardır. Lakin onların canfəşanlığına baxmayaraq “qara piyar” kampaniyası alt-üst olub.

Bu gün hər kəsə yaxşı məlumdur ki, Olimpiya Oyunlarından söz düşəndə ilk növbədə Yunanıstan yada düşür. Bundan sonra isə Avropa Oyunlarından söz düşəndə Azərbaycan yada düşəcək. Özü də çox böyük hörmətlə və ehtiramla.

Rəhman SALMANLI,

Azərbaycan.- 2015.- 2 iyul.- S. 3.