Dünya Bankı ilə Azərbaycanda poçt sisteminin modernləşdirilməsi müzakirə olunub

Rabitə və Yüksək Texnologiyalar Nazirliyinin (RYTN) "Azərpoçt" MMC-də islahatların və maliyyə xidmətlərinin geniş çeşiddə və ölkənin bütün ərazisində təmin edilməsi üzrə yeni layihə həyata keçiriləcək.

Nazirlikdən AZƏRTAC-a bildirilib ki, bu barədə Rabitə və Yüksək Texnologiyalar Nazirliyində (RYTN) Dünya Bankının (DB) Avropa, Mərkəzi Asiya, Orta Şərq və Şimali Afrika regionu üzrə maliyyə və bazarların idarəolunması sahəsində qlobal praktika rəhbəri Rolf Berndtin başçılıq etdiyi nümayəndə heyəti ilə görüşdə razılıq əldə olunub.

Qeyd olunub ki, bu sahədə əməkdaşlığın inkişaf etdirilməsi üzrə verilən təkliflərin RYTN tərəfindən Azərbaycan hökumətinə təqdim edilməsi, təkliflərə aidiyyəti qurumlar tərəfindən münasibət bildirildikdən sonra isə DB ilə rəsmi danışıqların aparılmasına başlanması qərara alınıb.

Rabitə və yüksək texnologiyalar naziri Əli Abbasovun iştirakı ilə keçirilən görüşdə DB ilə əməkdaşlıq çərçivəsində "Azərpoçt" MMC-də yerinə yetirilən "Maliyyə xidmətlərinin inkişafı" layihəsinin uğurlu nəticələri qeyd edilib və layihənin həyata keçirilməsindən əldə edilən nailiyyətlərin qarşılıqlı razılıq doğurduğu vurğulanıb.

Sonra poçt sisteminin restrukturizasiyası və poçt şöbələrinin modernləşdirilməsinin davam etdirilməsi, yeni maliyyə xidmətlərinin göstərilməsi və s. istiqamətlərdə DB ilə gələcək əməkdaşlığın perspektivləri nəzərdən keçirilib.

Azərbaycan.- 2015.- 4 iyul.- S. 6.