Azərbaycan və Fransa arasında kosmik və nüvə tədqiqatları üzrə əməkdaşlıq məsələləri müzakirə olunub

İyulun 6-da Rabitə və yüksək texnologiyalar naziri Əli Abbasov Bakıda səfərdə olan Fransanın xarici ticarət, turizmin inkişafı və xaricdəki fransızlarla iş üzrə dövlət katibi Matias Feklin rəhbərlik etdiyi nümayəndə heyəti ilə görüşüb.

AZƏRTAC xəbər verir ki, görüşdə Azərbaycan və Fransa arasında kosmik və nüvə tədqiqatları üzrə əməkdaşlıq məsələləri müzakirə olunub.

Rabitə və yüksək texnologiyalar naziri Əli Abbasov ölkəmizdə informasiya-kommunikasiya texnologiyaları (İKT) sektorunda aparılan islahatlar, həyata keçirilən milli və regional layihələr, o cümlədən, kosmik sənayenin inkişafı, nanotexnologiyaların və nüvə tədqiqatlarının genişləndirilməsi istiqamətində həyata keçirilən işlər barədə məlumat verib. Nazir, həmçinin yüksək texnologiyaların tətbiqi ilə Fransa şirkətləri tərəfindən Azərbaycanın ilk telekommunikasiya peykinin orbitə buraxılmasını xatırladaraq, ölkələrimiz arasındakı münasibətlərin yeni inkişaf mərhələsinə qədəm qoyduğunu qeyd edib.

Nümayəndə heyətinin rəhbəri Matias Fekl Azərbaycanın İKT sektorunda Fransa şirkətlərinin iştirakından və ilk peykin kosmik fəzaya buraxılmasında fransız maliyyə təsisatlarının verdiyi töhfədən məmnunluğunu ifadə edib. O, gələcəkdə də əməkdaşlığın davam etdirilməsində maraqlı olduqlarını qeyd edib və həmçinin Azərbaycanda kosmik sənayenin inkişaf etdirilməsində fransız şirkətlərinin fəal iştirak edəcəyinə əminliyini vurğulayıb.

Nazir Əli Abbasov fransız şirkətləri ilə əməkdaşlığın hər iki ölkə üçün faydalı olacağını, eyni zamanda İKT sahəsində qurulan münasibətlərin siyasi münasibətlərin daha da yaxınlaşmasında əhəmiyyətli rol oynayacağını vurğulayıb.

Görüşdə Fransanın Azərbaycandakı fövqəladə və səlahiyyətli səfiri Paskal Mönye iştirak edib.

Azərbaycan.- 2015.- 7 iyul.- S. 3.