9-cu Bakı Yay Enerji Məktəbinin iştirakçılarına Azərbaycanın neft-qaz sənayesinin tarixindən danışılıb

Xəbər verildiyi kimi, Azərbaycan Respublikası Dövlət Neft Şirkətinin (SOCAR) “ADA” Universitetinin Xəzər Enerji və Ətraf Mühit Mərkəzi ilə birgə təşkil etdiyi 9-cu Bakı Yay Enerji Məktəbinə start verilib. İki həftə davam edəcək Yay Enerji Məktəbinə bu il 17 ölkədən 47 enerji mütəxəssisi qoşulub.

SOCAR-ın mətbuat xidmətindən AZƏRTAC-a bildirilib ki, Xəzər hövzəsində neft və qaz hasilatı, eləcə də bölgədə enerji təhlükəsizliyi ilə bilavasitə məşğul olan hökumət və fərdi sektorun yüksək rəsmilərinin çıxış etdiyi Yay Enerji Məktəbi son illər beynəlxalq mütəxəssislər arasında tanınmağa, siyasi, elmi və işgüzar dairələrin nümayəndələrini cəlb etməyə başlayıb. Dinləyicilərə Azərbaycanın dünya neft və qaz hasilatında tarixi rolu, əsası ümummilli lider Heydər Əliyev tərəfindən qoyulan və Prezident İlham Əliyev tərəfindən davam etdirilən uğurlu enerji strategiyası nəticəsində Xəzərin Azərbaycan sektorunda yeni yataqların kəşf edilməsi, region ölkələrinin enerji təhlükəsizliyində Azərbaycanın rolu haqqında məlumat verilib.

İki həftə ərzində məktəb iştirakçıları enerji sahəsinin siyasi və iqtisadi əsasları, hüquqi bazası, o cümlədən enerji və xarici siyasət, enerji və ətraf mühit kimi mövzularda mühazirələr dinləyəcək, interaktiv məşğələlərdən yararlanacaqlar.

9-cu Bakı Yay Enerji Məktəbinin iştirakçıları görkəmli neftçi-alim, akademik, SOCAR-ın geologiya, geofizika və yataqların işlənilməsi üzrə birinci vitse-prezidenti Xoşbəxt Yusifzadənin “Xəzərin inkişafında tarixi mərhələlər. Karbohidrogen ehtiyatları: əfsanəvi geoloqun şəxsi lətifələri” təqdimatını maraqla qarşılayıblar. Neft və qaz sənayesinin inkişafında böyük xidmətləri olan akademik Xoşbəxt Yusifzadə bilavasitə özünün iştirakı və rəhbərliyi ilə Xəzər dənizi hövzəsinin Azərbaycan, Türkmənistan və Rusiya sektorlarında 20-dən artıq neft və qaz yatağı, o cümlədən hazırda bütün dünyada məşhur olan ”Azəri”, ”Çıraq”, ”Günəşli” və “Şahdəniz” yataqlarının kəşf edilməsi haqqında məlumat verib, xatirələrini danışıb.

Böyük marağa səbəb olan çıxışından sonra X.Yusifzadə Yay Məktəbi iştirakçılarının suallarını cavablandırıb.

Daha sonra SOCAR-ın “Azərikimya” İstehsalat Birliyinin Müşahidə Şurasının sədri, Milli Məclisin deputatı Muxtar Babayev “Neft sənayesində sazişlərin növləri, idarəçilik və maliyyə iqtisadiyyatı” mövzusunda çıxış edib. Onun çıxışı da maraqla qarşılanıb, iştirakçılar onları maraqlandıran suallara ətraflı cavablar alıblar.

Son səkkiz il ərzində “ADA” Universitetinin və SOCAR-ın birgə təşkilatçılığı ilə keçirilən Bakı Yay Enerji Məktəbində 350 yerli və beynəlxalq enerji mütəxəssisi təlimlər keçərək, məktəbin məzunu olublar.

Azərbaycan.- 2015.- 11 iyul.- S. 7.