Azərbaycanı təsir altında saxlamaq yolverilməzdir

Prezident İlham Əliyev gələcək dövr üçün çox mühüm bir siyasətin mesajını verdi

Nazirlər Kabinetinin 2015-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında Prezident İlham Əliyev Azərbaycana qarşı hər hansı təzyiqlərin göstərilməsi, ölkəmizə şər və böhtan atılması məsələlərinə xüsusilə toxundu və antiazərbaycançı şəbəkəyə daha bir sərt xəbərdarlıq etdi.

Dövlət başçısı ölkədə görülən işlərdən və görüləcək tədbirlərdən söz açanda isə bildirdi ki, ilin sonuna qədər dərman vasitələrinin qiymətləri kəskin şəkildə aşağı düşməlidir. Viza məsələləri, sahibkarlara dövlət tərəfindən göstərilən qayğının daha da artırılması, bu kateqoriyadan olan insanların üzləşdikləri problemlərin təxirəsalınmadan həll edilməsi istiqamətində işlər sürətlənməlidir.

Bu məsələlərlə bağlı bir neçə deputatın fikrini öyrəndik.

Yeni Azərbaycan Partiyası icra katibinin müavini, Milli Məclisin komissiya sədri Siyavuş Novruzov:

- Bu gün Azərbaycan inkişaf etmiş ölkə, güclü dövlətdir. Xalqla iqtidarın birliyi mövcuddur və heç bir təzyiqlə Azərbaycanı öz yolundan döndərmək olmaz. Məsələn, Almaniya Bundestaqında heç bir aidiyyəti olmayan və ümumilikdə hüquqi əsası olmayan bir müzakirə aparıldı. Almaniya Bundestaqı öz ölkəsi haqqında hansısa qərar qəbul edə bilər. Amma Bundestaqa Almaniya çərçivəsindən kənar, digər ölkələr haqqında qərar qəbul etmək səlahiyyəti verilməyib. Bundestaqda hər hansı ölkənin məsələsinin müzakirə olunması çox gülünc vəziyyət yaradır. O cümlədən Avropa Şurasında çox ədalətsiz və beynəlxalq hüquqa zidd olan qərarların qəbulunun şahidi olduq.

Azərbaycanın tutduğu yol var və dövlətimiz hər bir ölkə ilə qarşılıqlı münasibət qurmaq istəyir. Əgər o dövlətlərdə səmimiyyət, ədalət, haqq varsa, qarşılıqlı münasibət qurulacaq. O ki qaldı təzyiqlər yolu ilə güzəştli şəkildə Azərbaycandan nəsə qoparmaq, yaxud hüquqazidd əməllər törətmiş insanların azadlığa buraxılmasını, yaxud məsuliyyətə cəlb olunmamasını arzu edirlərsə, belə şeyləri görməyəcəklər.

Milli Məclisin İqtisadi siyasət komitəsinin üzvü Vahid Əhmədov:

- Prezident İlham Əliyev Nazirlər Kabinetinin iclasında çox ciddi mesajlar verdi. Yəqin ki, bu mesajlardan sonra mühüm dəyişikliklər olacaq. Dövlət başçısı ayrı-ayrı qurumların sahibkarların işinə müdaxiləsi ilə bağlı çox sərt fikirlər səsləndirdi. Azərbaycanda hər zaman sahibkarlığın inkişafına böyük diqqət yetirilir. Sahibkarlığa Kömək Fondunun yaradılması ilə sahibkarlığın inkişafı üçün il ərzində təxminən 250-300 milyon manatlarla kreditlər verilir. Bunun müqabilində sahibkarların əsas vəzifəsi xidmətini yüksək keyfiyyətlə yerinə yetirmək, məhsul istehsal etmək, dövlətin onun qarşısında qoyduğu tələblərə riayət etməkdən ibarətdir. Yəni vergini vaxtında ödəməlidir. Amma onların işinə müdaxilələr yolverilməzdir.

Fikrimcə, dövlət başçısının söylədiyi tənqidindən sonra aidiyyəti qurumlar nəticə çıxaracaqlar. Prezidentin dərman preparatlarının qiyməti ilə bağlı söylədiklərinə gəldikdə deyə bilərəm ki, bu məsələ bir neçə dəfə parlamentdə də qaldırılıb. Cənab Prezidentin qeyd etdiyi kimi, dərmanların qiymətlərinin yuxarı həddi müəyyən edilməli və əhali bu qiymətlər barədə məlumatlandırılmalıdırlar. Bu sahədə də ciddi addımlar atmağa ehtiyac var. Ölkənin birinci şəxsi haqlı iradlar bildirirsə, demək, mütləq dönüş olacaq.

Milli Məclisin Hüquq siyasəti və dövlət quruculuğu komitəsinin üzvü Çingiz Qənizadə:

- Prezident İlham Əliyevin çıxışı çox vacib açıqlamalar ilə yadda qaldı. Dövlət başçısı ölkəmizə qarşı aparılan çirkin kampaniyalardan söz açaraq bunun haradan qaynaqlandığına aydınlıq gətirdi və haqlı suallar səsləndirdi.

Antiazərbaycançı şəbəkənin daim dövlətimizə qarşı apardığı kampaniyanın, Azərbaycan əleyhinə qəbul edilən qərəzli qətnamələrin heç bir təsir mexanizmi olmayıb. Prezident də bu məsələyə xüsusi olaraq toxunaraq deyib ki, dövlətin siyasəti Azərbaycan maraqları üzərində qurulub. Heç bir kənar qüvvə bu siyasətə təsir edə bilməz. Dövlət başçısı vurğuladı ki, bizə qarşı çox çirkin kampaniya aparılır. Bu kampaniya dayanmır, önəmli beynəlxalq tədbirlər ərəfəsində daha da alovlanır, güclənir, əgər belə demək mümkündürsə, ondan sonra bir az səngiyir. Ancaq bu, daimi bir kampaniyadır, səbəbləri də aydındır. İlk növbədə, dünya erməniliyi, erməni lobbisi bizi hədəf seçib, onların himayəsində olan riyakar, rüşvətxor siyasətçilər bu işlərə qoşulub. Xüsusilə bu, Qərb siyasətçilərinə aiddir. Erməni pulları ilə özünə həyat quran konqresmenlər, senatorlar, deputatlar, islamofob siyasətçilər və s. ünsürlər Azərbaycana qarşı müharibə elan ediblər.

Bəzi beynəlxalq təşkilatların daim Azərbaycanın əleyhinə qəbul etdiyi qətnamələr dövlət başçısının söylədiyi kimi, kağız parçasıdır. Ona görə heç kim onları heç vaxt icra etməyəcək. Azərbaycanla diktat dili ilə danışmaq olmaz.

Prezidentin sahibkarlara dövlət qayğısının daha da artırılması, bəzi problemlərin aradan qaldırılması, eləcə də dərman preparatlarının qiymətlərinin tənzimlənməsi ilə bağlı söylədiyi fikirlərə gəlincə isə, deyə bilərəm ki, son 12 ildə Azərbaycanda infrastruktur quruculuğuna böyük investisiyalar, xərclər qoyulub. Bu gün də o siyasət davam etdirilməkdədir. Ancaq bəzi məsələlərin həlli öz əksini tapmadığı üçün dövlət başçısının iradları yerində və vaxtında səsləndi. Hesab edirəm ki, cənab Prezident qarşıdakı dövr üçün mühüm bir siyasətin siqnallarını verdi. Ölkə ictimaiyyətini narahat edən bütün məsələlər də aidiyyəti qurumlar tərəfindən araşdırılmalı və tez bir zamanda həllini tapmalıdır.

Milli Məclisin Beynəlxalq münasibətlər və parlamentlərarası əlaqələr komitəsinin üzvü Asim Mollazadə:

- Prezident İlham Əliyev tam həqiqəti əks etdirib. Azərbaycan müstəqil ölkə kimi heç kəsin hökmranlığını, böyük qardaşlığını qəbul etməyəcək. Azərbaycan ikitərəfli, çoxşaxəli əməkdaşlığın tərəfdarıdır. Azərbaycan mədəniyyət, təhsil, iqtisadi sahədə Avropa ölkələri ilə ikitərəfli əməkdaşlıq edir. Lakin yeni “böyük qardaş” kimi, erməni lobbisinin təsiri ilə hansısa təzyiqlər, hansısa təsiretmə mexanizmləri Azərbaycanda işləməyəcək. Biz dəfələrlə bəyan etmişik ki, Azərbaycan qarşılıqlı dostluğun, əməkdaşlığın tərəfdarıdır. Lakin Azərbaycan heç bir ölkənin, birliyin təsiri ilə öz siyasətinə dəyişiklik etməyəcək. Bu cür oyunlarla Azərbaycanı təsir altında saxlamaq yolverilməzdir.

Nəinki indi Azərbaycan əleyhinə siyasət aparılır, “Eurovision” mahnı müsabiqəsi ərəfəsində də Azərbaycana qarşı informasiya, ideoloji müharibə başlamışdılar. Bu, əslində, tək Azərbaycana deyil, Avropanın maraqlarına, dəyərlərinə ziddir. Azərbaycan Avropaya inteqrasiyanı öz maraqları çərçivəsində görür. Söhbət mədəni inteqrasiya, iqtisadi əməkdaşlıq, birgə vahid təhsil sistemindən gedir. Yəni Azərbaycana zəruri olan istiqamətlərdə biz əməkdaşlığa fikir verəcəyik. Ölkəmizə hansısa təzyiqlər, təsirlər, “böyük qardaş” siyasəti keçməyəcək.

Rəşad BAXŞƏLİYEV,

Azərbaycan.- 2015.- 17 iyul.- S. 3.