MDB İcraiyyə Komitəsinin sədri -icraçı katib Sergey Lebedev 47-ci Beynəlxalq Kimya Olimpiadasına təbrik məktubu göndərib

MDB İcraiyyə Komitəsinin sədri-icraçı katib Sergey Lebedev Bakıda 47-ci Beynəlxalq Kimya Olimpiadasının başlanması münasibətilə M.V.Lomonosov adına Moskva Dövlət Universitetinin Bakı filialının rektoru, Olimpiadanın Təşkilat Komitəsinin sədri, professor Nərgiz Paşayevaya təbrik məktubu göndərib.

AZƏRTAC xəbər verir ki, icraçı katib məktubda olimpiadanı vacib beynəlxalq hadisə kimi qiymətləndirib: “Beynəlxalq Kimya Olimpiadası dünyanın 80-dək ölkəsindən 300 ən yaxşı gənc kimyaçı, elmi müşahidəçi və qonaqların iştirak etdikləri önəmli beynəlxalq hadisədir. Kimya sektoru müasir dünyada sənayenin sabit və uzunmüddətli inkişafı baxımından ən prioritet sahələrdən biridir. Kimya ölkə iqtisadiyyatında struktur dəyişikliklərinə, onun yüksəlişi və milli rəqabətədavamlılıq səviyyəsinə ciddi təsir göstərir”.

S.Lebedev qeyd edib ki, MDB-nin üzv ölkələri kimya sənayesində çox böyük potensiala malikdir. İndiki dövrdə bu dövlətlər arasında kimyanın müxtəlif sektorlarının inkişafı və onların modernləşdirilməsi proqramları, çoxtərəfli əməkdaşlığın genişləndirilməsi, yüksək ixtisaslı kadrların hazırlanması məsələləri kifayət qədər aktualdır: “Bakıda M.V.Lomonosov adına Moskva Dövlət Universitetinin bazasında keçirilən 47-ci Beynəlxalq Kimya Olimpiadasında Azərbaycan, Belarus, Qazaxıstan, Qırğızıstan, Moldova, Rusiya, Türkmənistan, Özbəkistan və Ukrayna məktəblilərinin fəal iştirakı MDB dövlətlərinin kimya sahəsinə böyük marağını təsdiq edir”.

MDB İcraiyyə Komitəsinin sədri Beynəlxalq Kimya Olimpiadasının iştirakçılarına yeni dostlar qazanmağa, maraqlı və faydalı ünsiyyət qurmağa, həmçinin MDB məkanında inteqrasiya proseslərini inkişaf etdirməyə şərait yaradacağına əminliyini bildirib. O, olimpiada iştirakçılarına uğurlar arzulayıb.

AZƏRTAC

Azərbaycan.- 2015.- 22 iyul.- S. 9.