Azərbaycandan unudulmaz təəssüratlar

İsveçrəli turist Avropa Oyunları və Bakı barədə redaksiyamıza məktub yazıb

I Avropa Oyunları günlərində ölkəmizi xeyli sayda turist ziyarət etdi. Onlardan biri də isveçrəli xanım Reta Tşopp idi. Onun Evelin adlı qızı cüdo idman növü üzrə Avropa Oyunlarına qatılmışdı. Xanım Reta da qızına dəstək olmaq üçün onunla birgə Azərbaycana gəlmişdi. Evelin I Avropa Oyunlarında son anda medal sevincindən məhrum olsa da, müxtəlif beynəlxalq yarışların qalibi, o cümlədən, Avropa və dünya çempionatlarında iştirak edib.

Retanın Azərbaycan haqqında təəssüratları zəngin idi. Demişdi ki, İsveçrəyə qayıdan kimi redaksiyamıza bu barədə məktub yazacaq. O, sözünün üstündə duraraq həm Avropa Oyunları, həm də Bakı və onun sakinləri barədə fikirlərini yazıb göndərdi. Həmin məktubu Azərbaycan dilinə çevirərək dərc edirik:

Bu il biləndə ki, I Avropa Oyunları Bakıda keçiriləcək, qızım orada iştirak etmək istədi. Mən də onunla birgə Azərbaycana gəldim. Beləcə, həm möhtəşəm idman oyunlarına şahidlik etdim, həm də Bakını tanımaq fürsəti qazandım. I Avropa Oyunlarında iştirak etmək üçün ilk dəfə Azərbaycana gələcəyimi biləndə qızımdan soruşdum ki, ora haradır? Həmin vaxt Azərbaycanın harada yerləşdiyini belə bilmirdim. Yalnız onu bilirdim ki, Azərbaycan keçmiş SSRİ-nin bir hissəsidir və bizim SOCAR-a məxsus yeni qaz stansiyamızın yanacağı Azərbaycan məhsuludur.

Bakı haqqındakı təəssüratlarım çox pozitivdir: səmimi insanlar, hər yerdə rastıma çıxan köməkçilər - üzərinə “ask me” yazılmış qısaqol köynəkli gənclər və Bakıya xoşgəldin deyən çox isti və xoş hava... İsveçrə xalqı ilə müqayisədə burada böyük qonaqpərvərlik gördüm. İsveçrəlilər adətən insanlarla daha çox məsafə saxlayırlar və utancaq olurlar. İsveçrə restoranlarında əgər bir stolda bir nəfər oturduğunu görürlərsə, isveçrəlilər deyir ki, bura çox izdihamlıdır. Həmçinin də qatarda hər kəs istəyir ki, onun ətrafındakı yerlər boş olsun. Adətən öz təhlükəsizlikləri üçün belə edirlər. Amma mən Bakının küçələri və parkları boyu tək yeriyərkən özümü çox təhlükəsiz və azad hiss etdim. Həmçinin gecələr də hər yerdə hamının üzündə gülüş görmək mümkün idi.

Şəhəriniz çox təmizdir. Hər yerdə insanlar küçələri təmizləyirlər. Bakının çoxsaylı gözəl fəvvarələri, bəzilərində suyun rəngbərəng işıqlarla rəqs etməsi çox xoşuma gəldi. Qədim Bakı sayılan İçərişəhər də çox gözəldir.

Bakının simvollarından sayılan Alov Qüllələri gecə vaxtı öz LED-Şouları ilə məndə çox müsbət təəssürat yaratdı. Çox şad idim ki, mineral su və meyvə şirələrini hər zaman əksər köşklərdən ala bilirdim. Mən Bakıda avtobusla şəhər gəzintisinə də çıxdım. Həmin vaxt Bakı şəhəri və Azərbaycanın tarixi barədə xeyli məlumat öyrəndim. Biz orada Alov Qüllələrinə qalxan funikulyordan pulsuz istifadə etdik. Belə şeyləri Avropada tapmaq mümkün deyil, burada hər şey üçün haqq ödəməlisən. Mən həmçinin əksər qadınların başları örtüksüz, azad geyinmələrinə çox təəccübləndim. Çünki müsəlman ölkələrinin 95 faiz qadın əhalisi örtük geyinir. Buna görə də düşündüm ki, Bakı çox liberal şəhərdir.

I Avropa Oyunlarına gəldikdə isə, müvafiq stadionlarda yüksək səviyyəli təşkilatçılığa, minlərlə könüllünün dostcasına davranışına çox şad oldum. Burada tələbkarlıq və etibarlılıq gördüm. Hava limanından nəqliyyat vasitəsilə şəhərə doğru gəlməyin özü də mənim üçün unudulmaz bir səyahət oldu. Bütün şəhər boyu reklam lövhələrində Avropa Oyunları qeyd olunurdu. Hər yerdə - böyük binaların, körpülərin üzərində bayraqlar və Avropa Oyunlarının loqoları asılmışdı.

Azərbaycan xalqı həqiqətən də qonaqların Bakıda sərbəst, təhlükəsiz qalmaları üçün hər şeyi etdi. Mən fikirləşirəm ki, bir gün olimpiya oyunları da Bakıda keçirilə bilər! Çünki Bakı artıq buna hazırdır. Özünün mükəmməl idman infrastrukturu var. Qızımın da təsdiq etdiyi kimi, idmançıların yerləşdiyi yerlərdə hər şey yüksək səviyyədə idi.

Hələ də bəzi şeylər haqqında təəccüblüyəm: hər bir şəhərdə adətən mənfi şeylər də görmək mümkündür. Lakin Bakıda bunların heç biri görünmədi. Məsələn, uşaqların böyüklərə qarşı çox yaxşı hazırlandığına, yüksək tərbiyəsinə şahid oldum. Yeniyetmələr heç bir narahatlıq törətmirdilər. Mən küçələrdə nə bir dilənçi, nə narkoman, nə də ki alkoqollu birini gördüm. Heç kim məni narahat etmədi, yaxud buna çalışmadı.

Beləliklə, mən Bakı səfərimi çox xoşladım və bunu həyatımda çox müsbət şəkildə xatırlayacağam. Ümid edirəm ki, Bakı haqqında təcrübələrimi və təəssüratlarımı paylaşa bildim. Sizə gözəl günlər arzulayıram, isti yay günlərindən həzz alın. Hazırda İsveçrədə də Bakı ilə eyni temperatur müşahidə olunur, xüsusən də bizim yaşadığımız Basel şəhərində isti yay günəşi var.

Reta TŞOPP

İsveçrə, Basel şəhəri

Azərbaycan.- 2015.- 22 iyul.- S. 10.