Avstraliya parlamentinin deputatları “ADA” Universitetində olublar

Ölkəmizə səfərə gələn Avstraliya parlamentinin deputatlarından ibarət nümayəndə heyəti iyunun 3-də “ADA” Universitetində olub.

AZƏRTAC xəbər verir ki, görüşdə “ADA” Universitetinin prorektoru Fariz İsmayılzadə təmsil etdiyi ali məktəbin fəaliyyəti, beynəlxalq əlaqələri, burada həyata keçirilən layihələr barədə məlumat verib. Bu ali təhsil ocağında tədrisin ingilis dilində aparıldığını qeyd edən prorektor bunun xarici universitetlərlə geniş tərəfdaşlıq imkanları yaratdığını vurğulayıb. Eyni zamanda, “ADA” Universitetinin Avstraliya universitetləri ilə müəllim-tələbə mübadiləsi, birgə magistratura proqramlarının həyata keçirilməsində maraqlı olduğunu söyləyib.

Görüşdən məmnunluğunu bildirən Avstraliyali deputat Luke Simpkins Azərbaycanda gedən sürətli inkişaf proseslərini yüksək dəyərləndirib, iki ölkə arasında əməkdaşlığın genişləndirilməsinin vacibliyini vurğulayıb.

Sonra qonaqlar “ADA” Universitetinin müasir standartlara cavab verən tədris korpuslarında tələbələr üçün yaradılan şəraitlə tanış olublar.

Azərbaycan. - 2015.- 4 iyun.- S.10.