Möhtəşəm arena gimnastların yolunu gözləyir

Son illər ölkəmizdə bütün sahələrdə olduğu kimi, müasir idman infrastrukturunun yaradılması istiqamətində də genişmiqyaslı tədbirlər həyata keçirilir, müasir idman obyektləri tikilib istifadəyə verilir. Artıq dünyanın qabaqcıl idman ölkələrindən olan Azərbaycan Beynəlxalq Olimpiya hərəkatının fəal üzvlərindəndir. İdmanın bütün növlərinin inkişaf etdirilməsi Azərbaycan Prezidenti İlham Əliyevin daim diqqət mərkəzindədir. Paytaxt Bakıda və regionlarda inşa edilən, ən müasir avadanlıqla təchiz olunan Olimpiya idman komplekslərinin sayı 50-yə çatmışdır.

İdmanın inkişafına göstərilən yüksək dövlət qayğısı sayəsində Azərbaycan idmançıları da dünyanın mötəbər yarışlarında və Olimpiya Oyunlarında ölkəmizi ləyaqətlə təmsil edir, uğurlarını ildən-ilə artırırlar.

Bu il iyunun 12-28-də Bakıda və Mingəçevirdə keçiriləcək I Avropa Oyunlarına hazırlıq məqsədilə beynəlxalq standartlara uyğun mühüm layihələrin icra olunması ölkəmizdə müasir idman infrastrukturunun yaradılması işinə böyük təkan vermişdir. Prezident İlham Əliyev və xanımı Mehriban Əliyevanın iştirakı ilə Bakıda təməli qoyulan Milli Gimnastika Arenasının inşası idmanın bu növünün daha da inkişaf etdirilməsi işində mühüm rol oynayacaq.

Azərbaycan Gimnastika Federasiyasının son illər əldə etdiyi böyük uğurlar dünyanın idman ictimaiyyəti tərəfindən maraqla izlənilir. Bu nailiyyətlər Azərbaycanın birinci xanımı, “Bakı-2015” ilk Avropa Oyunları Təşkilat Komitəsinin sədri, UNESCO-nun xoşməramlı səfiri Mehriban Əliyevanın federasiyaya rəhbərliyi sayəsində mümkün olmuşdur. Başqa sözlə, 2002-ci ildən AGF-nin prezidenti olan Mehriban xanım Əliyevanın fəaliyyəti nəticəsində ölkədə idmanın bu növünün əsl inkişaf mərhələsi başlamışdır.

Son illər Bakıda bədii gimnastika üzrə ilk dünya kuboku yarışları, Avropa çempionatları və beynəlxalq yarışlar keçirilmişdir. Bunun nəticəsi kimi Azərbaycan gimnastları da böyük irəliləyişlərə nail olmuşlar.

Milli Gimnastika Arenasının inşası beynəlxalq əhəmiyyətli idman yarışlarının yüksək səviyyədə təşkili və keçirilməsi üçün geniş imkanlar açmışdır.

Kompleksin fasadı xüsusi formada işlənmişdir. Burada maraqlı illüminasiya elementləri təqdim edən ekranlar quraşdırılmışdır. Əsasən gimnastika yarışları üçün nəzərdə tutulan arenanın əhəmiyyətini artıran mühüm amillərdən biri də buranın digər idman tədbirlərinin və yarışlarının da keçirilməsi üçün uyğunlaşdırılmasıdır.

Gimnastika zalı əsas yarış və köməkçi məşq hissələrindən ibarətdir. Yarışların miqyasından asılı olaraq, arenanın əsas hissəsində oturacaq yerlərinin sayını 5 mindən təxminən 10 minə qədər artırmaq mümkündür. Dünya standartlarına uyğun inşa olunan kompleksdə mətbuat mərkəzi, ilk tibbi yardım məntəqəsi, xoreoqrafiya, trenajor zalları, dopinq nəzarəti, inzibati otaqlar, mağazalar, kafelər və digər yardımçı sahələr var. Dünyanın ən yaxşı gimnastika komplekslərindən olan bu idman qurğusunda hotel də inşa edilmişdir.

Avropa Gimnastika İttifaqının rəhbərliyi burada yaradılan şəraiti yüksək qiymətləndirmişdir. Zalda ən müasir gimnastika avadanlığı quraşdırılmışdır. Bu ay I Avropa Oyunları çərçivəsində gimnastikanın 5 növü üzrə yarışlardan əlavə, digər mühüm turnirlər, o cümlədən 2019-cu ildə bədii gimnastika üzrə 2020-ci il Yay Olimpiya Oyunlarına lisenziya xarakterli dünya çempionatı bu arenada keçiriləcək.

İdman gimnastikası, bədii gimnastika və batut üzərindən tullanma yarışları - eyni zamanda, iki yeni qeyri-olimpiya növü olan aerobika və akrobatika I Avropa Oyunlarında nümayiş olunacaq.

Arena artıq “Bakı-2015” I Avropa Oyunlarının yarışlarını qəbul etməyə tam hazırdır. Burada həm idmançıların hazırlığı, yarışların keçirilməsi, həm də media nümayəndələrinin rahat işləməsi üçün hər cür şərait yaradılıb. “Bakı-2015” I Avropa Oyunları Əməliyyat Komitəsinin Milli Gimnastika Arenası üzrə meneceri Zərifə Həsənova dedi ki, iyunun 14-dən 21-dək Milli Gimnastika Arenasında keçiriləcək yarışları 9 min 600 azarkeş izləyə bilər. Medallar uğrunda 50 ölkəni təmsil edən 446 idmançı mübarizə aparacaq. Arenada quraşdırılan oturacaqların bir hissəsi azarkeşlərin sayına görə, lazım olan zaman yığılıb-açılma mexanizmi ilə təchiz olunub. Hazırda 6 min 850 oturacaq quraşdırılmışdır. Zərurət yaranacağı halda isə bunların sayını 9 min 600-dək artırmaq olar. Media nümayəndələri, VİP qonaqlar üçün ayrıca oturacaqlar quraşdırılıb.

Milli Gimnastika Arenasında mehmanxana da tikilib. İdmançılarımız və məşqçilər bu hoteldə məskunlaşıblar. Onlar burada qalır və gün ərzində rahat şəkildə hazırlıq prosesində iştirak edirlər. Əsas arenadan başqa, gimnastikanın bütün növləri üzrə hazırlıq keçmək üçün müasir avadanlıqlarla təchiz olunmuş böyük məşq zalı da fəaliyyət göstərir. Burada gimnastlar üçün bütün avadanlıqlarla yanaşı, xüsusi havalandırma sistemi, paltardəyişmə və istirahət otaqları inşa olunub.

“Bakı-2015” I Avropa Oyunlarından öncə iştirakçı ölkələrin gimnastları da Milli Gimnastika Arenasında məşqlər keçəcəklər.

Rizvan HİLALOĞLU,

Azərbaycan. - 2015.- 5 iyun.- S. 6.