Viktor ZORİN: “Xəzər Neft və Qaz” sərgisi yüksək səviyyədə təşkil olunub

XXII Beynəlxalq “Xəzər Neft və Qaz” sərgisi yüksək səviyyədə təşkil olunub. Bunu AZƏRTAC-a müsahibəsində “Xəzər Neft və Qaz” sərgisinin iştirakçısı Rusiyanın “Rimera group” şirkətinin meneceri Viktor Zorin deyib. O bildirib ki, “Rimera group” yanacaq-energetika kompleksinə daxil olan müəssisələr üçün avadanlıqların istehsalı və servis xidmətlərinin göstərilməsi üzrə müəssisələri özündə birləşdirir.

“Rimera group”un əsas biznes istiqamətləri magistral avadanlıqlar, habelə neft hasilatı üçün avadanlıqların istehsalı, neft sahəsinə aid olan boru və avadanlıqlara texniki xidmət göstərilməsidir.

“Biz “Caspian Oil and Gas 2015” sərgisində debüt etməklə, unikal “Ağ quyu” layihəsini təqdim edirik. Bu layihə yanacaq-energetika müəssisələrinə kompleks yanaşma baxımından fərqlənir. “Ağ quyu” layihəsinin həyata keçirilməsi üçün nasos-kompressor borular Birinci Ural Yeni Boru Zavodunda istehsal edilir” - deyə V.Zopin bildirib.

V.Zorin sərginin yüksək səviyyədə təşkil olunduğunu, bu günlər ərzində vaxt tapıb Bakını gəzdiyini də söyləyib. Vurğulayıb ki, Azərbaycanın paytaxtı Bakının arxitekturası özündə qədimliyi və müasirliyi əks etdirir. Bu şəhər göydələnlərlə və ən müasir tikililərlə zəngindir, bu da respublikanın sürətli inkişafının ən bariz göstəricilərindən biridir.

Azərbaycan. - 2015.- 7 iyun.- S.12.