Məşəl inkişaf və quruculuq məkanında

Azərbaycan xalqı dövlətimizin müstəqilliyinin bərpasından ötən 24 il ərzində çoxlu sayda möhtəşəm tarixi hadisələrin sevincini və həyəcanını yaşayıb. 1993-cü ildə ulu öndər Heydər Əliyevin siyasi hakimiyyətə qayıdışı ilə müstəqilliyimizin əbədi və dönməzliyinin təmin olunması, 1994-cü ildə “Əsrin müqaviləsi”nin bağlanması, neftimizin Ceyhan limanına çatdırılması, Azərbaycanın “Eurovision” mahnı müsabiqəsinə ev sahibliyi etməsi, BMT Təhlükəsizlik Şurasının üzvü seçilməsi, dünyanın bu ali və mötəbər qurumuna rəhbərlik etməsi, “Şahdəniz” yatağının ikinci mərhələsinin işlənməsinə başlanılması, “Cənub” qaz dəhlizinin təməlinin qoyulması və bu kimi onlarla tarixi hadisə ölkəmizin müstəqillik dövründə qazandığı möhtəşəm uğurlardır.

Cəmi 6 gündən sonra isə Azərbaycanda I Avropa Oyunları start götürəcək. Qeyd edək ki, Amerika, Avropa və Asiyada qitə ölkələrini əhatə edən kütləvi idman yarışları çoxdan mövcuddur. Avropa Oyunları isə bunların sırasında indiyədək təsis olunan sonuncu qitə miqyaslı yarışmadır.

İlk Avropa Oyunlarının keçirilməsi haqqında qərar 2012-ci il tarixində Avropa Olimpiya Komitəsinin 41-ci Baş Assambleyasında qəbul olunub. Bu möhtəşəm qitə yarışında Avropanın 50 ölkəsindən 6 mindən çox idmançı gücünü sınayacaq. Onlar on altısı olimpiya və dördü qeyri-olimpiya olmaqla 20 idman növü üzrə 253 dəst medal uğrunda mübarizə aparacaqlar.

Avropa Olimpiya Komitəsi I Avropa Oyunlarının Bakıda keçirilməsi ilə bağlı qərarı Azərbaycanda idmanın inkişafına göstərilən qayğının və ölkəmizin mötəbər tədbirlərin təşkilində ortaya qoyduğu yüksək nümunənin beynəlxalq miqyasda etirafı idi. Bu idman yarışında 50 ölkədən idmançıların iştirakı onun nə qədər möhtəşəm və miqyasının böyük olmasından xəbər verir. Bu mənada Avropa Oyunları müasir olimpiya oyunlarına bərabər tutulan beynəlxalq idman hadisəsidir. Lakin olimpiya oyunları zamanı ev sahibi olan ölkənin hazırlıq işləri üçün ən azı 8 il vaxt tələb olunsa da, Azərbaycanın qarşıda cəmi 2 il yarımlıq hazırlıq dövrü var idi. Azərbaycanın birinci xanımı, Heydər Əliyev Fondunun prezidenti Mehriban xanım Əliyevanın rəhbərlik etdiyi I Avropa Oyunlarının Təşkilat Komitəsi bu qısa müddətdə hazırlıq işlərini ən yüksək səviyyədə başa çatdırıb. I Avropa Oyunlarının yarışları 18 idman arenasında keçiriləcək. Bunların 5-i tamamilə yeni inşa olunub, digərləri isə müasir standartlara uyğun yenidən qurulub.

I Avropa Oyunları iyun ayının 12-dən start götürəcək. Lakin Azərbaycanda Oyunların həyəcanı çoxdan başlayıb. Aprelin 26-da Prezident İlham Əliyevin “Atəşgah” məbədində alovlandırdığı I Avropa Oyunlarının məşəli artıq 60-a yaxın şəhər və rayona səyahət edib. İyun ayının 5-də isə I Avropa Oyunlarının məşəli Siyəzən rayonundan sonra Xırdalan şəhərinə gətirildi. Abşeron rayonunun inzibati mərkəzi olan Xırdalanda bir neçə gün əvvəldən məşəlin yürüşünə hazırlıq işləri başlanmışdı. Məşəlin qarşılanacağı yerdən tutmuş, keçəcəyi küçə və prospektlər, yürüşün tamamlanacağı Heydər Əliyev adına Mədəniyyət və İstirahət Parkı bayram libasına bürünmüşdü.

Ümumiyyətlə, Abşeron rayonu inkişafı ilə yanaşı, bayram və əlamətdar günlərin özünəməxsus şəkildə qeyd olunması ilə həmişə diqqət çəkir. Novruz bayramı, ulu öndər Heydər Əliyevin doğum günü, Respublika Günü, Qurtuluş Günü və digər əziz tarixlərimiz Xırdalan sakinlərinin sevimli bayramlarıdır. Həmin günlərdə minlərlə sakin zövqlə təşkil olunan bayram şənliklərində yaxından iştirak edir. Elə məşəlin gətirildiyi 5 iyun tarixində də şəhərdə müşahidə olunan izdiham digər bayramlarda olduğu kimi idi. Həmin gün Xırdalanda yüksək bayram əhvali-ruhiyyəsi var idi, on minlərlə şəhər sakini I Avropa Oyunlarının məşəlinin gəlişini izləmək üçün küçələrə çıxmışdı.

Siyəzən rayonundan gətirilən məşəl Xırdalanın girişində - M.Rəsulzadə küçəsində qarşılanacaq. Məşəlin qəbul edilməsi isə kun-fu sanda üzrə dördqat dünya çempionu, ikiqat Avropa çempionu, əməkdar idman ustası Ramiz Yaqnəliyevə həvalə edilib. O, həyəcan dolu təəssüratlarını bölüşərək dedi: “İdmançı kimi həyatımda çox həyəcanlı anlar olub. Lakin bu gün mən başqa həyəcanın doğurduğu sevinc içərisindəyəm. Çünki I Avropa Oyunlarının məşəldarı olmaq həyatımın ən yaddaqalan hadisəsidir. Ölkəmizi dolaşan məşəl, nəhayət, şəhərimizə gəlib çıxdı. Son illər sürətlə inkişaf edən, modern şəhərə çevrilən Xırdalan bu xoş gündə daha gözəl, daha əzəmətli görünür. Şəhərin sakinləri isə məşəlin yürüşünü izləməklə həm də I Avropa Oyunlarının sevincini bölüşürlər. Azərbaycan indiyədək çoxlu sayda beynəlxalq tədbirə layiqli ev sahibliyi edib. İnanıram ki, ölkəmiz I Avropa Oyunlarını da ən yüksək səviyyədə təşkil etməklə sonrakı Oyunlar üçün nümunə olacaq”.

Həmsöhbətimin qeyd etdiyi kimi, Xırdalan şəhəri son illər həqiqətən inkişaf edib, modernləşib. Lakin bu inkişaf tək Xırdalanı deyil, onun inzibati mərkəzi olduğu bütün Abşeronu əhatə edir. Respublikada aparılan uğurlu sosial-iqtisadi siyasət nəticəsində Abşeron rayonunun da hərtərəfli inkişafı üçün böyük işlər görülüb və bu işlər hazırda yüksək əzmlə davam etdirilir. Ölkənin hər yerində yaşanan inkişaf Abşeronun simasında aydın müşahidə olunur. Son illərin real mənzərəsi bu rayonun ölkənin əsas inkişaf və quruculuq ünvanlarından biri olduğunu təsdiq edir. Bu inkişaf Abşeronun qüruru olduğu qədər, ölkəmizdən kənarda da Azərbaycanın gözəl tanıtımıdır. Ölkə Prezidentinin birbaşa təşəbbüsü və himayəsi sayəsində rayon ərazisində olduqca mühüm infrastruktur layihələri həyata keçirilmiş, möhtəşəm tikililərin təməli qoyulmuş və uğurla başa çatdırılmışdır. İstifadəyə verilən və yenidən qurulan səhiyyə və təhsil müəssisələri, uşaq bağçaları, yollar, yol ötürücüləri və yol qovşaqları, idman qurğuları, parklar, inzibati binalar rayonun simasını tamamilə dəyişmişdir. Bu dövrdə həm ayrı-ayrı dövlət proqramlarından, həm yaradılmış azad sahibkarlıq mühitindən irəli gələrək rayonda çoxsaylı xidmət və istehsal sahələri fəaliyyətə başlamışdır.

Xırdalan şəhərinin girişinə toplaşan minlərlə sakinin alqışları I Avropa Oyunlarının məşəlinin gətirilməsindən xəbər verir. Bir qədər əvvəl həmsöhbətim olmuş Ramiz Yaqnəliyev məşəli qəbul edərək başı üzərinə qaldırır və yürüş başlayır. Daha sonra onu digər məşəldarlar - Xəyyam Abışov, Şahmar Əliməmmədov, Rafiq Məmmədov, Zöhrab Əliyev, Şərif Şərifli, Balakərim Rəhimov, Cavid Rəfiyev və Qələndər Aslanov əvəz edirlər. Məşəlin keçdiyi Heydər Əliyev prospekti, Zərifə Əliyeva və Qalubiyyə küçələri boyunca musiqi sədaları eşidilir, sakinlər yürüş iştirakçılarını alqışlarla qarşılayırdılar.

Yürüşün marşrutu həm də Xırdalan şəhərinin son illər daha da gözəlləşən simasını yaxından izləməyə imkan verirdi. Xırdalan sürətlə inkişaf edib, xüsusən şəhər adı almasından sonra bu statusa uyğun olaraq dəyişib, modernləşib. Qısa müddət ərzində burada onlarla yeni inzibati və hündürmərtəbəli yaşayış binaları inşa olunub. Əhalinin istirahətinə xidmət edən parklar salınıb. Şəhərin küçələrində göz oxşayan yaraşıqlı gecə işıqları, ictimai binaların, fərdi evlərin, xidmət obyektlərinin, həyət divarlarının fasadlarının milli ornamentlər və müasir üzlük materialları ilə işlənməsi Xırdalan şəhərinin ümumi mənzərəsinə xüsusi gözəllik verir. Burada inşa olunmuş yüksəkmərtəbəli yaşayış evləri, inzibati binalar, nəfis layihələr əsasında tikilib istifadəyə verilmiş sosial obyektlər, ticarət, iaşə və məişət xidməti müəssisələri şəhərin möhtəşəmliyini, müasirliyini əks etdirir. Məşəl yürüşünün keçirildiyi Heydər Əliyev prospekti, Zərifə Əliyeva və Qalubiyyə küçələri də görülən yenidənqurma işləri nəticəsində öz görkəmini tamamilə dəyişmişdir. Səkilər yenisi ilə əvəz olunmuş, yolların kənarında gözoxşayan qazon örtüyü salınmış, binaların fasadı yenilənmiş, müasir işıqlandırma sistemi quraşdırılmış, mövcud iaşə obyektləri standartlara uyğun olaraq yenidən qurulmuşdur.

Ötən ilin oktyabr ayında Prezident İlham Əliyevin Abşeron rayonuna səfəri zamanı istifadəyə verilən obyektlər bu rayonun və Xırdalan şəhərinin inkişaf yolunda olmasının əyani təsdiqi idi. Prezident İlham Əliyev Xırdalan şəhərində Heydər Əliyev Mərkəzinin, şahmat və musiqi məktəblərinin, Masazır qəsəbəsində inşa olunan stadionun açılışında iştirak edib, həmçinin Xırdalan şəhərindəki Bayraq meydanında, Heydər Əliyev adına Mədəniyyət və İstirahət Parkında aparılan yenidənqurma işləri ilə tanış olub. Məşəlin yürüşünü izləyənlər arasında olan Abşeron Rayon Ağsaqqallar Şurasının sədri Nadir Ağayevlə Abşeronun dünəni və bugünkü barədə söhbətləşirik. 40 ildən artıqdır Xırdalanda yaşadığını bildirən həmsöhbətim dedi ki, hələ ötən əsrin 70-ci illərində ulu öndər Heydər Əliyevin başladığı islahatlar nəticəsində Abşeron rayonu da inkişaf yoluna qədəm qoymuşdur: “O dövrdə Heydər Əliyevin müdrik rəhbərliyi ilə respublikamızın hər bir bölgəsində canlanma yaşanırdı. Ulu öndərin diqqəti və qayğısı nəticəsində Abşeronda müasir üsullarla - süni yağış aqreqatları ilə suvarılan əkin sahələrinin genişləndirilməsi, istehsalatın bütün sahələrində ən yeni texnikanın geniş tətbiqi, maldarlığın, quşçuluğun sənaye əsasına keçirilməsi rayonun ən yüksək istehsalat göstəriciləri əldə etməsinə şərait yaratmışdı. Həyata keçirilən islahatlar nəticəsində Abşeron rayonu yaradılarkən qarşısında qoyulan başlıca vəzifənin - Bakı və Sumqayıt şəhərlərinin təzə-tər kənd təsərrüfatı məhsulları ilə daha dolğun ödənilməsinin öhdəsindən layiqincə gəldiyini sübut etmişdi.

Bu gün isə rayonumuz ulu öndərin layiqli siyasi davamçısı olan Prezident İlham Əliyevin diqqəti sayəsində dinamik inkişaf edir. İndi Abşeronda hara getsən inkişafla, quruculuqla, yeni açılan müəssisələrlə rastlaşarsan. Elə küçələrində addımladığımız Xırdalan şəhəri rayonumuzun inkişaf edən simasıdır. Əgər təxminən 10 il əvvəllə müqayisə etsək, şəhərimizin nə qədər dəyişdiyini görərik”.

Qalubiyyə küçəsindən sonra məşəl Heydər Əliyev adına Mədəniyyət və İstirahət Parkına gətirildi. Bu park ötən il yenidənqurmadan sonra istifadəyə verilib və xırdalanlıların ən sevimli istirahət məkanlarından birinə çevrilib. Parkda ulu öndər Heydər Əliyevin abidəsi qoyulub. Ölkəmizin ən gözəl memarlıq nümunələrindən olan Xırdalan şəhərindəki Heydər Əliyev Mərkəzi də parka yaxın yerdə inşa olunub. Azərbaycan dövlətçiliyinin möhkəm əsaslar üzərində qurulmasında, respublikanın hərtərəfli inkişafında, ölkədə bütün sahələrin canlandırılmasında müstəsna xidmətləri olan ümummilli lider Heydər Əliyevin xatirəsinin əbədiləşdirilməsi məqsədilə Abşeronda indiyədək bir neçə mühüm layihə reallaşdırılıb. Xırdalanda orijinal layihə əsasında tikilən Heydər Əliyev Mərkəzi də ümummilli liderin xatirəsinə rayon sakinlərinin dərin ehtiramının parlaq nümunəsidir. Məşəlin yürüşünü izləyənlər arasında Xırdalan şəhərindəki 2 saylı orta məktəbin XI sinif şagirdi Naqi Məhəmmədzadə ilə söhbətimiz də Heydər Əliyev Mərkəzinin gənc nəslin inkişafına verdiyi töhfələrlə bağlı oldu. O dedi: “Bu gün Azərbaycanın dinamik sosial-iqtisadi inkişafı, ölkəmizin dünya birliyində öz yerini daha da möhkəmləndirməsi məhz Heydər Əliyevin irsinin, ideyalarının yaşamasının, siyasi kursunun uğurla davam etdirilməsinin nəticəsidir. Ulu öndər Heydər Əliyevin dövlətçilik fəlsəfəsinin, azərbaycançılıq məfkurəsinin dərindən öyrənilməsi, geniş təbliğ olunması bütün Azərbaycan xalqının ümdə istəyidir. Biz məktəblilər də Heydər Əliyev irsinin öyrənilməsinin vacibliyini dərk edirik. Çünki Heydər Əliyev irsinin öyrənilməsi, ümummilli liderin ideyalarının yaşaması, davam etdirilməsi dövlətimizin, xalqımızın inkişafı deməkdir.

Ona görə də şəhərimizdə bu cür möhtəşəm Heydər Əliyev Mərkəzinin yaradılması hər bir Xırdalan sakininin, o cümlədən biz məktəblilərin ürəyincədir. Mərkəzdə ümummilli liderin xatirəsinin əbədiləşdirildiyi muzey məktəblilərin daha çox maraq göstərdiyi yerdir. Burada yaradılan müzakirə və diskussiya zalları bizim öz intellektual dünyagörüşümüzü artırmaq üçün ən gözəl vasitələrdir. Mərkəzdəki linqafon, internet və rəssamlıq otaqları və rəqs zalları yeniyetmə və gənclərin asudə vaxtının səmərəli təşkil edilməsinə geniş imkanlar açır”.

Xırdalan şəhərində öz möhtəşəmliyi ilə müşayiət olunan məşəlin yürüşü ulu öndərin adını daşıyan mədəniyyət və istirahət parkında başa çatdı. Qeyd etdiyimiz kimi, bu park yenidən qurulub və ötən il Prezident İlham Əliyevin Abşerona səfəri zamanı istifadəyə verilib. Ərazisi 12 hektar olan parkda sakinlərin mənalı istirahəti və asudə vaxtlarının səmərəli keçirilməsi üçün hər cür şərait yaradılıb. Yenidənqurma işləri zamanı milli memarlıq üslubu ilə müasirlik tam uzlaşdırılıb, orijinal elementlər və formalarla zənginləşdirilib. Parkın ərazisində çoxlu ağac və dekorativ gül kolları əkilib, çəmənlik salınıb. Burada aparılan yenidənqurma işləri ölkədə əhalinin istirahətinin yüksək səviyyədə təşkil olunmasının davamlı və kompleks xarakter daşıdığını təsdiqləyir.

Adi günlərdə Xırdalan sakinlərinin əsas istirahət yeri olan bu məkanda iynə atsan, yerə düşməz. Dünən isə parkda 10 minə yaxın insan var idi. Hər kəs məşəlin meydana gətirilməsini alqış sədaları ilə qarşılayırdı. Hər kəsin simasında bir bayram sevinci, bayram ovqatı var idi. Hər kəsin çöhrəsindən fərəh yağırdı. Yaxınlıqdakı Bayraq meydanında vüqarla dalğalanan üçrəngi bayrağımız isə bu mənzərəni daha qürurverici edirdi. Sonuncu məşəlçi kunq-fu sanda üzrə dördqat dünya çempionu və Avropa çempionu Rövşən Həşimov burada quraşdırılan səhnəyə qalxaraq məşəli alovlandırdı. Sonra I Avropa Oyunlarının çırağı yandırıldı və yarışlar başa çatanadək saxlanılmaq üçün şəhərə təhvil verildi. Mərasimdə I Avropa Oyunlarının məşəlinin “Atəşgah” məbədində alovlandırılması mərasiminin əks olunduğu videoçarx nümayiş etdirildi.

Rəşad CƏFƏRLİ,

Azərbaycan.- 2015.- 6 iyun.- S. 7.