“ADA” Universitetində iqlim dəyişikliklərinin səbəbləri və həll yollarına dair müzakirələr aparılır

İyunun 5-də “ADA” Universitetində “İqlim dəyişikliklərinin səbəbləri və həll yolları: hökumət tərəfindən görüləcək işlər, vətəndaş cəmiyyətinin öhdəlikləri və texnoloji həll yolları” mövzusunda konfrans işə başlayıb.

AZƏRTAC xəbər verir ki, tədbirdə “ADA” Universitetinin rektoru Hafiz Paşayev, Fransanın Azərbaycandakı səfiri Paskal Mönye, ekologiya və təbii sərvətlər naziri Hüseyn Bağırov çıxış edərək mövzunun aktuallığından danışıblar. Bildirilib ki, iqlim dəyişikliyi bizim və yeni nəslin gələcəyinə təsir edir. Nəsli kəsilməkdə olan növlər hər il artır. Bəzi proqnozlar 2100-cü ildə dəniz səviyyəsinin bir neçə metr yüksələcəyini bildirir. Buna görə də təbii fəlakətlərə yol açan iqlim dəyişikliyinin qarşısının alınması üçün bütün səylər birləşdirilməlidir.

Qeyd olunub ki, vətəndaş cəmiyyətlərini və yerli xalqları təmsil edən 130-dan çox ölkə 2020-ci ilədək meşələrin qırılmasını yarıyadək azaltmağı vəd edir.

Konfransda, həmçinin Azərbaycanda ətraf mühitin qorunması istiqamətində görülən işlərdən danışılıb.

Panellərlə davam edən tədbirdə, eyni zamanda, BMT-nin rezident əlaqələndiricisi Antonius Bruk, BMT-nin Ətraf Mühit Proqramının ölkə üzrə əlaqələndiricisi Mahir Əliyev, Alternativ və Bərpa Olunan Enerji Mənbələri üzrə Dövlət Agentliyinin, müxtəlif qeyri-hökumət təşkilatlarının nümayəndələri də mövzu ətrafında çıxış ediblər.

AZƏRTAC

Azərbaycan.- 2015.- 6 iyun.- S.11.