IDEA İctimai Birliyi Azərbaycan Respublikasının Prezidenti yanında Gənclər Fondu ilə əməkdaşlığa başlayır

IDEA İctimai Birliyi Azərbaycan Respublikasının Prezidenti yanında Gənclər Fondu ilə ekologiya sahəsində birgə əməkdaşlığa başlayıb.

İctimai Birlikdən AZƏRTAC-a bildiriblər ki, bu məqsədlə iyunun 5-də tərəflər arasında əməkdaşlıq sazişi imzalanıb. Sazişə əsasən IDEA İctimai Birliyi və Azərbaycan Respublikası Prezidenti yanında Gənclər Fondu arasında ekoloji maarifləndirmənin gücləndirilməsi, iqlim dəyişikliyinə qarşı mübarizə, tullantıların idarə olunması, meydana çıxan ekoloji çağırışlarla mübarizə, biomüxtəlifliyin qorunması, davamlı inkişafın təşviqi, ekoloji məsuliyyətin təbliği, ekoloji qiymətləndirmə kimi sahələrdə əməkdaşlıq və müvafiq layihələrin həyata keçirilməsi nəzərdə tutulur.

IDEA İctimai Birliyi 2011-ci ildə ətraf mühit sahəsində ictimai maarifləndirmənin gücləndirilməsi, ekoloji problemlərinin səmərəli həlli yollarının tapılmasına gənclərin cəlb olunması və bu sahədə təlim-tədrisin təşviqi məqsədilə təsis edilib. Ötən dövrdə IDEA ətraf mühitin mühafizəsi və ekoloji problemlərin həlli sahələrində gənclərin geniş kütlələrinin iştirakı ilə mühüm milli və regional layihələr həyata keçirib, beynəlxalq tədbirlər təşkil edib və bu sahədə fəaliyyət göstərən milli və beynəlxalq strukturlar ilə əməkdaşlıq əlaqələri qurub.

“Azərbaycan Respublikasının Prezidenti yanında Gənclər Fondunun Əsasnaməsi”ndə gənclərin ekoloji maarifləndirilməsi məqsədi ilə onlar arasında müxtəlif tədbirlər, o cümlədən təlim və tətbiqi layihələrin həyata keçirilməsi Gənclər Fondunun əsas vəzifələrindən biri kimi müəyyən olunub. IDEA və Gənclər Fondu arasında qurulacaq əməkdaşlıq əlaqələri bu vəzifənin həyata keçirilməsi məqsədinə xidmət edəcək.

AZƏRTAC

Azərbaycan.- 2015.- 6 iyun.- s.12.