Məşəl Heydər Əliyev Mərkəzində parladı

Aprelin 26-da Prezident İlham Əliyevin “Atəşgah”da yandırdığı ilk Avropa Oyunlarının məşəlinin paytaxt səyahəti davam edir. Avropa Oyunlarının yoluna işıq saçan, ölkəmizin 60 bölgəsini gəzib-dolaşan məşəl estafeti dünən Heydər Əliyev Mərkəzinin qarşısında davam etdirildi.

Qeyd edək ki, dünya memarlığının incilərindən sayılan Heydər Əliyev Mərkəzinin binası müasir Bakının rəmzlərindən biri hesab olunur. Azərbaycan Prezidenti İlham Əliyevin 29 dekabr 2006-cı il tarixli sərəncamına əsasən yaradılan Heydər Əliyev Mərkəzi 2012-ci il mayın 10-da ümummilli liderin anadan olmasının 89-cu ildönümündə istifadəyə verilib.

Mərkəz dahi şəxsiyyətin dövlətçilik fəlsəfəsi və azərbaycançılıq məfkurəsinin öyrənilməsi, Heydər Əliyev irsinin tədqiqi və təbliği, elm, təhsil, mədəniyyət, səhiyyə, idman, ekologiya və iqtisadiyyatın inkişaf etdirilməsinə xidmət edən layihələrin həyata keçirilməsi, Azərbaycan tarixi və mədəniyyətinin, Azərbaycan dilinin və digər milli-mənəvi sərvətlərinin beynəlxalq aləmdə tanıdılması, təbliği və digər tədbirlərin keçirilməsi istiqamətində fəaliyyət göstərir.

Möhtəşəm binanın layihəsində düz xətlərdən istifadə olunmayıb. Yerdən dalğavari şəkildə səmaya doğru yüksəlməsi, sonra isə süzülərək yenidən yerə qovuşması təkcə memarlığın postmodern tərzini deyil, eyni zamanda davamlılığı, sonsuzluğu təcəssüm etdirir. Binanın üzərindəki xətlər həm də keçmişlə gələcəyin bir-birinə bağlılığını yaradır. Mərkəzin əsas binası üç böyük hissədən ibarətdir: Heydər Əliyev Muzeyi, sərgi zalları və “Auditorium”. Binanın doqquz mərtəbəli hissəsində sərgi zalları, ofislər, həmçinin kafelər yerləşir. Dördmərtəbəli “Auditorium” hissəsində iki konfrans salonu, görüş otaqları və media mərkəzi yerləşir.

UNESCO-nun Mədəni İrs Siyahısına daxil olan qədim İçərişəhərdən sonra Heydər Əliyev Mərkəzinə gətirilən məşəli Azərbaycanın məşhur heykəltəraşı, xalq rəssamı, Azərbaycan Milli Elmlər Akademiyasının həqiqi üzvü, Azərbaycan Rəssamlıq Akademiyasının rektoru Ömər Eldarov qəbul etdi. Xalq rəssamı məşəllə mərkəzə daxil oldu.

87 yaşlı məşəldarın necə sevinc, qürur hissi keçirdiyini üzündəki cizgilərdən asanlıqla oxumaq olurdu. Hətta öz xoş təəssüratlarını bizimlə bölüşərkən sevinc göz yaşlarını saxlaya bilmədi: “87 yaşım var. Bu yaşda Avropa Oyunlarının məşəldarı olmaq qürurvericidir. Həyatımda ilk dəfədir məşəl qəbul edirəm. Bu, mənim tərcüməyi-halım üçün də çox əhəmiyyətlidir.

Yaşım çox olsa da, məşəli məharətlə daşımağın öhdəsindən gəldim və bununla fəxr edirəm. “Bakı-2015” I Avropa Oyunları dünya idman tarixində böyük bir hadisədir. Ona görə də məşəli qəbul edən şəxslərin hamısı sevinc hissini yaşayır. Bu, bizim əhvalımızı yüksəldir. Azərbaycan dövləti tarixində ilk dəfə belə böyük beynəlxalq idman bayramına evsahibliyi edir.

Amma onu da deyim ki, narahat idim. Deyirdim birdən nəfəs almağım çətinləşər, yaxud xəstələnərəm. Lakin hər şey normal oldu. Bu missiyanı yerinə yetirdim və bununla fəxr edirəm”.

Günorta saatlarında isə məşəl Fəvvarələr meydanı, Qış və Filarmoniya parkı kimi şəhərin bir sıra yaraşıqlı yerlərində və müxtəlif məkanlarında oldu. Gün ərzində məşəl AMEA-nın Nizami Gəncəvi adına Azərbaycan Ədəbiyyatı Muzeyinə, Müslüm Maqomayev adına Azərbaycan Dövlət Filarmoniyasına və “YARAT” Müasir İncəsənət Mərkəzinə səyahət etdi.

Paytaxt əhalisində xoş təəssüratlar yaradan məşəl Bakı Metropolitenində də alovlandı. Yunan-Roma güləşi üzrə Avropa çempionu, 2008-ci il Pekin Olimpiadasının gümüş medalçısı Vitali Rəhimovun daşıdığı məşəlin metro səfəri “28 May” stansiyasından başlayıb “İçərişəhər” stansiyasında başa çatdı. Sonda məşəl Funikulyor vasitəsilə şəhərin ən hündür yerlərindən biri olan Dağüstü Parka aparıldı.

Xatırladaq ki, bu gün məşəlin Bakı səyahətinin sonuncu günüdür. Bu gün alov “Bakı-2015” Avropa Oyunları Əməliyyat Komitəsinin baş ofisinə aparılacaq.

İyunun 12-də isə məşəl Bakı Olimpiya Stadionunda keçiriləcək açılış mərasiminə gətiriləcək.

Rəşad BAXŞƏLİYEV,

Azərbaycan. - 2015.- 11 iyun.- S.10.