I Avropa Oyunlarının simvolları “Qız Qalası” festivalında

Qonaqlı-qaralı Bakının Qız Qalasının qarşısındakı meydan da bu günlər həmişə olduğundan daha izdihamlıdır. Burada “Qız Qalası” 6-cı Beynəlxalq incəsənət festivalı keçirilir.

Qədim, sirli və bəşəri dəyərlərə malik olan Qız Qalası UNESCO-nun “Dünya İrs Abidələri” siyahısına daxil edilib. “Qız Qalası” adlı festivalın keçirilməsi də elə bu abidənin - Azərbaycan memarlığı incisinin, xalqımızın qədim tarixi irsinin və zəngin mədəniyyətinin nümunələrindən birinin təbliği məqsədini daşıyır.

“Qız Qalası” festivalı 2010-cu ildən başlayaraq hər il keçirilir. Ötən illər ərzində festivalda dünyanın müxtəlif ölkələrindən gəlmiş 100-dən çox tanınmış rəssam iştirak edib.

Bu il keçirilən sayca altıncı festival iyunun 11-də başlanıb və 14-də başa çatacaq. Festivalın sərhədləri ildən-ilə yeni tematik komponentlərlə genişləndirilir. 2012-ci ildən başlayaraq Qız Qalasının təbliği ilə yanaşı təşkilatçılar insanların diqqətini ətraf mühitin mühafizəsinə cəlb etməyi də qərara alıblar. O cümlədən Qafqaz faunasının nəsli kəsilmək təhlükəsi qarşısında olan heyvanlarının əsas növləri haqqında bilgiləri artırmaq məsələsi diqqət mərkəzindədir.

Heydər Əliyev Fondunun vitse-prezidenti Leyla Əliyevanın təşəbbüsü ilə başlanan “Ətraf mühit naminə beynəlxalq dialoq aksiyası” kampaniyası Qafqazın nəsli kəsilmək təhlükəsi olan beş heyvanını - ayı, qartal, canavar, ceyran və Qafqaz bəbirini müəyyən edib. Maraqlıdır ki, builki festivalda iştirak edən yerli və xarici rəssamlara I Avropa Oyunlarının simvolları - Nar və Ceyran heykəllərini rəngləmək təklif olunur.

Rəssamların ən yaxşı işlərindən ibarət sərgi əvvəlcə İçərişəhərdə, sonra dünyanın bir sıra müxtəlif ölkələrində nümayiş etdiriləcək.

Azərbaycan.-2015.- 13 iyun.- S.12.