Güllə atıcılığı üzrə yarışlarda serbiyalı idmançılar birinci olublar

Dünən Bakı Atıcılıq Mərkəzində qadınlar və kişilər arasında 10 metr məsafəyə güllə atıcılığı üzrə yarışlar başa çatmışdır. Milli Komandamızın veteranı 373 xal toplayaraq 26-cı yerdə qərarlaşmışdır. Digər təmsilçimiz Nərminə Səmədova isə 35-ci yeri tutmuşdur (360 xal). Beləliklə hər iki idmançımız mübarizəni dayandırıblar. Səkkiz ölkədən idmançıların mübarizə apardıqları final mərhələsində serbiyalı Zorana Arunoviç 199.5 xal qazanaraq qızıl medala sahib olub. Beləliklə o, “Rio-2016” Yay Olimpiya Oyunlarında iştirak etmək hüququ qazanıb.

Yarışda gümüş medalı ispaniyalı Sonya Franquet, bürünc mükafata isə belaruslu Viktoriya Çayka layiq görülüb.

Təəssüf ki, Azərbaycan idmançıları Rəsul Məmmədov və Ruslan Lunyov da kişilər arasında 10 metr məsafədən hava tapançası ilə atəşaçma yarışının təsnifat mərhələsində mübarizəni dayandırmalı olublar. Ruslan 574 xalla 19-cu, Rəsul isə 559 xalla 32-ci yeri tutublar.

Kişilər arasında 10 metr məsafəyə hava tapançası ilə atəşaçma yarışının finalında qızıl medal uğrunda Ukrayna, İtaliya, Portuqaliya, Polşa, Slovakiya, Serbiya və Türkiyədən 8 idmançı mübarizə aparıb.

Nəticədə bu yarışın qalibi Serbiya idmançısı Damir Mikeç olub. O, qızıl medal uğrunda mübarizədə rəqiblərindən üstün sərrastlıq nümayiş etdirərək 201.8 xalla birinciliyi təmin edib və gələn il Braziliyada keçiriləcək Yay Olimpiya Oyunlarına vəsiqə qazanıb. İkinci yerə portuqaliyalı Joao Kosta, üçüncü yerə isə slovakiyalı Juraj Tuzinski çıxıblar.

İdmançılarımızdan Elvin İsmayılov və Əlimirzə Quliyev isə kişilər arasında səngər stendi yarışının ikinci təsnifat günündə uğursuz nəticə göstəriblər.

Yarışların qızıl medalını Rusiya idmançısı Aleksey Alipov qazanıb. 2004-cü il Afina və 2008-ci il Pekin Olimpiadalarının çempionu olan rusiyalı idmançı gələn il Braziliyada keçiriləcək Yay Olimpiya Oyunlarında iştirak hüququ əldə edib.

Gümüş medalı slovakiyalı Erik Varqa, bürünc medalı isə italiyalı Covanni Pellielo qazanıblar.

Yarışlar başa çatdıqdan sonra bolqarıstanlı idmançı Mariya Qrozdeva KİV-ə müsahibəsində deyib: “Mən ilk Avropa Oyunlarının açılış mərasimində Bolqarıstan nümayəndə heyətinin bayraqdarı idim. Hər şey möhtəşəm idi. 6 Olimpiadada iştirak etmişəm və deyə bilərəm ki, burada hər şey Olimpiya Oyunlarındakı kimidir. Yarışların təşkili çox xoşuma gəlir. Bəlkə də növbəti Avropa Oyunları Azərbaycandakı kimi yüksək səviyyədə təşkil edilməyəcək... Ötən il Qəbələdə olmuşam. İndi isə Bakıdayam. Şəhər çox xoşuma gəldi. İçərişəhərdə, dənizkənarı Parkda gəzintiyə çıxmışam. Burada hər şey çox gözəldir.

Azərbaycan.-2015.- 18 iyun.- S. 5.