Zəfər lövhəsində imzalar hər gün artır

“Bakı-2015”in hər keçən günü tarixə qızıl hərflərlə yazılmaqda davam edir. Azərbaycan idmançıları da parlaq qələbələri ilə öz imzalarını bu şanlı tarixə həkk edirlər. Onların qazandıqları hər bir qələbə, əldə etdikləri medallar, üçrəngli bayrağımızın ən yüksəkdə dalğalandırılması ilə hər bir azərbaycanlının qəlbində fəxarət, qürur hissi yaşadır.

Hər gün şanlı qələbələriylə tarix yazan atletlərimiz “Zəfər Günləri”ndə yaşadıqları sevinc hisslərini idman ictimaiyyəti və media nümayəndələri ilə bir daha paylaşırlar. İyunun 14-dən başlayan Milli Olimpiya Komitəsində təşkil olunan bayram tədbirində hər gün qələbəlik olur. İdmançılar xüsusi hazırlanmış lövhəyə imzalarını atır, MOK rəhbərliyi tərəfindən mükafatlandırılırlar. Dünən keçirilən “Zəfər Günləri”ndə daha 4 medalçı - Ayxan Tağızadə (taekvondo, 68 kq), Toğrul Əsgərov (sərbəst güləş, 65 kq), Xetaq Qazyumov (97 kq) və Cəbrayıl Həsənov (sərbəst güləş, 74 kq) “Bakı-2015”in tarixi lövhəsinə öz imzaları ilə bəzək vurdular.

Milli Olimpiya Komitəsinin (MOK) binasında təşkil olunan “Zəfər Günləri”ndə medalçılarımız təəssüratlarını bölüşür, gələcək planları barədə danışırlar.

Bu dəfəki mərasimdə MOK-un vitse-prezidenti Çingiz Hüseynzadə, Olimpiya çempionları Rəfiqə Şabanova və Nazim Hüseynov, Azərbaycan Taekvondo Federasiyasının vitse-prezidenti Niyaməddin Paşayev də iştirak edirdilər.

MOK-un vitse-prezidenti Çingiz Hüseynzadə idmançılarımızın uğurlu çıxışlarının davam etdiyini və xalqımızın bayram əhval-ruhiyyəsində olduğunu söylədi: “Hər gün idmançılarımız üçün uğurlu olur. İyunun 17-də güləşçilərimiz 3 medal qazandılar ki, ikisinin əyarı qızıl idi. Bir taekvondoçumuz da qızıl medala sahib çıxdı. Artıq beş gündür burada “Zəfər Günləri” keçiririk və hər gün yeni idmançılarla görüşürük. İnanırıq ki, zəfərlərimiz davam edəcək. Bu uğurlar hər bir azərbaycanlını sevindirir və idmançılarımıza dəstək olanların sayı günbəgün artır”.

MOK-un vitse-prezidenti daha sonra dedi ki, dünən ölkəmizdə olan xarici ölkələrin Olimpiya komitələrinin rəhbərləri, vitse-prezidentləri ilə görüş keçirilib. Görüşdə xarici qonaqlar “Bakı-2015”in təşkilatçılığı, təhlükəsizlik tədbirlərinin beynəlxalq standartlara tam cavab verdiyini bildiriblər. “Bakıya gələn xarici qonaqlar, federasiya rəsmiləri paytaxtımıza valeh olublar. Onlar Avropa Oyunlarının yüksək səviyyədə keçirildiyini söyləyirlər. Bu isə o deməkdir ki, Azərbaycan bir daha dünyaya həm də idman ölkəsi olduğunu nümayiş etdirir”.

Sonra medalçılar bir-bir səhnəyə dəvət edilərək hədiyyələrlə mükafatlandırıldılar. Atletlərimiz və onların ailə üzvləri sevinc hisslərini jurnalistlərlə də bölüşdülər.

“Vədimi yerinə yetirdim”

Toğrul ƏSGƏROV, I Avropa Oyunlarının çempionu:

- Bu günlər mənim üçün ən sevimli, ən yaddaqalan günlərdir. Qızıl medalın sevinc hissləri tam başqa olur. Zəhmətinin bəhrəsini görən hər bir insan özünü xöşbəxt hesab edir. Ancaq mənim üçün son illər bir az çətin oldu. Avropa və dünya çempionatı 2 ildən artıqdır ki, uğursuz keçib. Bu yarışa isə çox yaxşı hazırlaşırdım. İstəyim, məqsədim o idi ki, I Avropa Oyunlarında qızıl medal qazanım. Şükürlər olsun ki, bunu əldə etdim.

Avropanın ən güclü güləşçiləri Avropa Oyunlarında mübarizə aparır. Ona görə də hər bir görüş gərgin keçir. Rəqiblərimin demək olar ki, əksəriyyətini tanıyırdım. Lakin finalda görüşdüyüm italiyalı rəqib ilə ilk dəfə idi ki, qarşılaşırdım. Əsas odur ki, kim güclü idisə, o da qalib oldu. Hazırlığımız göstərdi ki, bizim güləşçilərimiz güclüdürlər.

Hər kəsə təşəkkür edirəm. Qələbəni dövlətimizə həsr edirəm. 19 yaşında Olimpiya çempionu olmuşamsa, hələ yolum uzundur. İki ilin uğursuz olmasının səbəbi dizimdə zədənin olması idi. Qarşıda bizi daha böyük uğurlar gözləyir. Bundan sonra da bayrağımızı yüksəltmək üçün əlimdən gələni edəcəyəm. Məqsədim ikinci dəfə Olimpiya çempionu olmaqdır.

Son zamanlar bəzi insanlar məni uğursuzluq zolağına düşməkdə ittiham edirdilər. Onların fikirlərini normal qəbul edirəm. Bu, həmişə belə olub. İstər-istəməz uduzanda reaksiya başqa olur, udanda başqa. İdmançılarımıza arzu edirəm ki, həmişə qələbə qazansınlar, üzlərində qələbə sevinci olsun.

“Prezident İlham Əliyevin mübarizəni izləməsi mənə əlavə stimul verdi”

Ayxan TAĞIZADƏ, I Avropa Oyunlarının çempionu:

- Dünəndən bəri keçirdiyim hissləri sözlə deməkdə çətinlik çəkirəm. İlk Avropa Oyunlarının qalibi olmaq qürurvericidir. Vətənimdə keçirilən yarışda Azərbaycana qızıl medalı qazandırmaq gözəl hissdir.

Keçirdiyim görüşlərə gəldikdə isə deyə bilərəm ki, çətin oldu. Birinci döyüş digərlərinə baxanda çətin keçmədi. Amma ikinci görüşümdə 2012-ci ilin Olimpiya çempionu ilə qarşılaşdım. O, həm də ikiqat dünya və Avropa birincisidir. Buna baxmayaraq, qələbə qazandım. Daha sonra rusiyalı rəqibimlə qarşılaşdım. Keçən ay Rusiyada keçirilən dünya çempionatında ona uduzmuşdum. Bu dəfə mənim üçün revanş qarşılaşması idi. Görüş çətin keçsə də, qalib ayrıldım. Final da asan olmadı. Amma qələbə qazanıb, çempion olmağı bacardım.

Azarkeşlərin möhtəşəm dəstəyi vardı. Hətta onların sırasında Prezident İlham Əliyevin mübarizəni izləməsi mənə əlavə stimul verdi. Mən doğma azarkeşlərə minnətdarlıq edirəm. İnşallah, digər taekvondoçularımız da Avropa Oyunlarında medal qazanmaqla, mənim arxamca gələcəklər.

Onu da deyim ki, şəxsi məşqçim atam Əvəz Tağıyevdir. Keçirdiyim məşqlər, “Bakı-2015”ə hazırlığımdan razı qalmışdı. Hətta inanırdı ki, mən Avropa Oyunlarının medalçıları sırasına düşəcəm və mən də ümidləri doğrultdum.

Qeyd edək ki, idmançımız “Zəfər Günləri”nə şəxsi məşqçisi, atası Əvəz Tağıyevlə gəlmişdi.

“Ata kimi qürurlanır, məşqçi kimi fərəhlənirəm”

Əvəz TAĞIYEV, I Avropa Oyunlarının qalibinin atası:

- Mən həm Ayxan Tağızadənin atası və şəxsi məşqçisi, həm də Azərbaycanın para-taekvondo üzrə milli komandasının baş məşqçisiyəm. Oğlum Ayxan 3 yaşından taekvondo ilə məşğul olur. Böyüklərdən ibarət heyətə yeni keçib. Bir valideyn kimi sevincimin həddi-hüdudu yoxdur. Bir məşqçi kimi də hesab edirəm ki, zəhmətimiz hədər getmədi. Ciddi hazırlığın cavabı qızıl medal oldu.

Ayxan gənclər arasında Avropa çempionatında gümüş medala sahib çıxmışdı. İndi isə o, Avropa Oyunlarında qızıl medalçıdır. Hər bir məşqçinin arzusu zəhmətinin bərhəsini görməkdir. Ayxan həm də Avropa Oyunlarında taekvondoda Azərbaycana ilk qızıl medalı qazandırdı.

Para-taekvondo üzrə yığmamızın baş məşqçisi olduğum üçün yetirmələrimdən dəfələrlə uğurlar görmüşəm. Ancaq indi Avropa Oyunlarında qızıl medal qazanan idmançıların valideynlərinin keçirdikləri sevinc hisslərini mən yaşayıram və bunun necə bir xoş hiss olduğunu görürəm. Bütün idmançıların valideynlərinə də bu gözəl duyğuları, sevinc anlarını yaşamasını arzulayıram.

“Zala girəndə ancaq onu düşünürdüm, uduzmaq olmaz”

Xetaq QAZYUMOV, I Avropa Oyunlarının çempionu:

- Çox sevinirəm ki, I Avropa Oyunlarında öz azarkeşlərim önündə çempion oldum. Bizim vəzifəmiz hər kəsə aydındır, güləş döşəyinə çıxmaq və sonadək əzmlə mübarizə aparmaq. Bu dəfə də öhdəsindən layiqincə gələ bildim. Hətta rəqibimi udan zaman Azərbaycan Prezidenti İlham Əliyevin zalda olması məni çox sevindirdi. Buna görə də çox xoşbəxtəm. Prezidentin və çoxsaylı azarkeşlərin iştirakı ilə belə mötəbər yarışda 1-ci yerə çıxmağın özü də bir şərəfdir.

Keçridiyim görüşlərdə ən çətin oyunum yarımfinalda oldu. Belaruslu idmançı ilə də mübarizə gərgin keçdi. Gürcüstanlı güləşçi Elizbara əvvəlki görüşdə uduzmuşdum. Bu dəfə isə onun əvəzini çıxdım. Əldə etdiyim qələbə artıq tarixə yazıldı. Bizi isə qarşıda çoxlu yarışlar gözləyir. Çalışacağam ki, azarkeşlərin ümidini yenə doğruldum. Onu da deyim ki, qələbə qazanmağımda azarkeşlərin böyük dəstəyi də rol oynadı.

Avropa Oyunları bizə olduqca güclü təəssürat yaradıb və bu, Azərbaycan üçün böyük bir bayramdır. Avropa Oyunlarda iştirak etmək böyük şərəfdir. Qazandığım qələbəni bütün Azərbaycana həsr edirəm.

Qarşıdan dünya çempionatı gəlir. Çox ciddi hazırlaşmalıyılq. Çünki dünyada Azərbaycan güləşçiləri həmişə diqqət mərkəzində olublar. Rəqiblərimiz bizi yaxşı tanıyırlar. Bizim də məqsədimiz yalnız ən yüksək zirvəni fəth edərək qızıl medal qazanmaqdır.

“Kiçik səhvlərə görə final şansımı qaçırdım”

Cəbrayıl HƏSƏNOV, I Avropa Oyunlarının bürünc mükafatçısı:

- Avropa Oyunları Azərbaycanda keçirildiyindən biz ikiqat məsuliyyət daşıyırıq. Çox yaxşı hazırlaşmışdıq. Ona görə də nəticə daha yaxşı ola bilərdi. Çalışacağıq ki, səhvlərimizdən nəticə çıxaraq.

Çox çətin görüşlərim oldu. Finalda oynamağı düşünürdüm. Ancaq qismət olmadı. Yarımfinalda uduzduğum türk idmançı Soner Demirtaşa bundan əvvəl üç dəfə qalib gəlmişdim. Bir ay əvvəl dünya kubokunda onu məğlub etmişdim. Ancaq bu dəfə kiçik səhvlərə görə uduzdum. Təsəlliverici görüşdə Finlandiya təmsilçisi Henri Selenius ilə döyüşdüm və 4:0 hesablı qələbə qazandım. Bürünc medal uğrunda mübarizədə isə Bolqarıstan təmsilçisi Kiril Terziyevi 9:0 hesabı ilə məğlub etdim. Çempion olmaq istəyirdim. Ancaq bu dəfə baş tutmadı. Ümid edirəm ki, növbəti yarışlarda yaxşı nəticələr əldə edəcəyəm. Qarşıdan gələn dünya çempionatında uğurlu çıxış edib, lisenziya qazanaraq Braziliyada keçiriləcək Olimpiya Oyunlarında çıxış etmək istəyirəm.

Avropa Oyunlarının təşkilatçılığına gəldikdə isə deyə bilərəm ki, hər şey ən yüksək səviyyədədir. Bunu digər ölkələrdən gələn idmançılar da söyləyirlər. Deyirlər ki, “Bakı-2015” Olimpiya Oyunlarından geri qalmır.

Rəşad BAXŞƏLİYEV,

Azərbaycan.- 2015.- 19 iyun.- S. 3.