Nə qürurla dalğalanır

“Bakı-2015” ilk Avropa Oyunlarında qızıl medal qazanan idmançılarımızın sayı gündən-günə artır. Hər qələbədən sonra yarışın getdiyi idman arenasında Azərbaycan bayrağı qaldırılır, Azərbaycanın himni səslənir.

Bunlar olduqca sevincli və həyəcanlı anlardır. Azərbaycan himninin sədaları qəlblərimizi dönə-dönə riqqətə gətirir. Yüksələn üçrəngli bayrağımız isə bizə qürur, fəxarət, fərəh bəxş edir.

Ümumiyyətlə, istənilən ölkənin elçisinin qələbəsindən sonra idman arenasında tamaşaçıları qalibin təmsil etdiyi dövlətin bayrağına və himninə ehtiram bəsləməyi, yəni, salondakılara ayağa durmağı xatırladan sözlər səslənir. Lakin cəmi tamaşaçılar yüksələn bayrağımızın, səslənən himnimizin timsalında Azərbaycanı həmin çağırışsız da salamlayırlar. Azərbaycan vətəndaşları ilə birlikdə dünyanın müxtəlif yerlərindən gələn qonaqlarımız bütün Azərbaycanı alqışlayırlar. Çünki Azərbaycan bu alqışlara layiqdir.

Azərbaycan bayrağı həmişə yüksəklərdə dalğalanır. Bayrağımız da başımız kimi ucadır. Ucadır ona görə ki, tikirik, yaradırıq, qururuq. Xəzərdən Qara dənizə, Aralıq dənizinə, Adriatik dənizinədək od-ocaq körpüləri salır, işıq, hərarət dəhlizləri yaradırıq. Biz heç kəsi isti yurd-yuvasından məhrum etmirik. Əksinə, torpağımızda yaşayan bir çox digər xalqların nümayəndələrinə hörmət və məhəbbətlə yanaşırıq. Yurdumuza gələn qonağı təmiz ürəklə, açıq süfrə ilə qarşılayırıq. Hər sahədə nailiyyətlər qazanırıq. Hazırda idman arenalarında əldə olunan uğurlarımız şərəfinə yüksəklərə qalxan bayrağımız da bütün bu işlərin bir qolunu təcəssüm etdirir. Bəlkə də elə əslində, bütün uğurlarımızın rəmzinə çevrilir.

Bu günlərdə Azərbaycan bayrağı təkcə qələbə qazanan idmançılarımızın başları üzərində dalğalanmır, onu hər tərəfdə yüksəklərdə görürük. Sevinci aşıb-daşan azarkeşlər üçrəngli bayrağımızı boylarından yuxarı qaldıraraq əllərindən yerə qoymurlar. Bizi özünə dost, qardaş bilən hər kəs belə hərəkət edir. Məsələn, elə Türkiyə idmançılarının əllərində öz bayraqları ilə yanaşı Azərbaycan bayrağını da daşıdığını dönə-dönə görürük.

Azərbaycan bayrağı paytaxtımızda düzənlənən bu nəhəng tədbirin sanki ən böyük rəmzinə çevrilərək küçələrin, eyvanların, maşınların, bütün şəhərin bəzəyi olub.

İdman arenalarında qazanılan qələbələr şərəfinə ucalan bayrağımız həm də gücümüzün, qüdrətimizin göstəricisidir. Hansı qüvvəyə, məharətə sahib olduqlarını göstərən pəhləvanlarımız, igid qeyrətli qızlarımız Azərbaycanın minlərlə belə gənclərinin yalnız bir dəstəsidir. Elə gənclərin ki, onlar Azərbaycan bayrağını Xankəndidə, Şuşada, düşmən tapdağından tezliklə azad olacaq digər torpaqlarımızda ucaltmağa qadirdirlər.

Flora SADIQLI,

Azərbaycan.- 2015.- 20 iyun.- S. 5.