“Bakı-2015” dünyanın ən mükəmməl idman yarışlarından biridir

“NTV Spor”un şərhçisi Gökhan ÇƏTİNBAŞ: “Hər gün Avropa Oyunlarından 10-12 saat canlı yayım hazırlayırıq”

Azərbaycanda idman bayramı davam edir. Tarixdə ilk dəfə keçirilən Avropa Oyunlarında hər keçən gün həyəcan yaşanır. Bütün arenalarda bir-birindən gərgin yarışlar keçirilir. Oyunlar o qədər maraqlı keçir ki, yarışları həm arenalarda, həm də ekran qarşısında canlı izləyən azarkeşlərin sayı hər gün artır.

Beynəlxalq idman yayımı şirkətinin prezidenti (İSB) Manolo Romero bildirib ki, I Avropa Oyunları təkcə Avropada deyil, dünyanın çoxsaylı ölkələrində yayımlanır. Əvvəl ümumilikdə 1000 saata qədər yayım nəzərdə tutulsa da, yarışların gedişində bu bir qədər artıq oldu: “Əsas auditoriyamız Avropadadır və hazırda bu qitənin 45 ölkəsi yarışları yayımlayır. Dünyanın 100 ölkəsində Avropa Oyunları yayımlanır. Ümumilikdə hər ölkədə gün ərzində 5-7 saat yayım həyata keçirilir. Bundan əlavə rəqəmsal kanallar vasitəsilə də yayım həyata keçirilir”.

Elə idman arenalarında apardığımız müşahidələrə əsaslanaraq deyə bilərik ki, oyunlardan canlı reportajları təqdim edən xarici ölkələrin reportyorları həyəcanlarını gizlədə bilmirlər, ekran qarşısında əyləşən izləyicilərdə pozitiv əhvali-ruhiyyə yaradırlar.

Yarışlar başlayandan müxtəlif arenalardan canlı yayım təşkil edən teleşirkətlərdən biri də Türkiyənin əsas idman kanalı hesab olunan “NTV Spor”dur. Kanalın tanınmış idman spikeri Gökhan Çətinbaş hər gün canlı yayıma qoşularaq I Avropa Oyunlarından bir neçə saat reportaj təqdim edir. Biz isə fasilə zamanı onunla maraqlı söhbət edib “Bakı-2015”lə bağlı təəssüratlarını öyrəndik.

Qardaş ölkənin jurnalisti deyir ki, Bakıda özünü doğma vətənindəki kimi hiss edir. Çünki Azərbaycan onun üçün həm də Türkiyədir: “17 mart 2008-ci il tarixində yayıma başlayan “NTV Spor” kanalı Avropa Oyunlarından hər gün canlı reportajlar verir. Mən 7 ildir bu televiziya kanalında çalışıram. Hər növ idman oyunlarının şərhçiliyini edirəm. Bakıya 2 şərhçi ilə gəlmişik. Mən və Mehmet Sevinç. İlk həftə mən üzgüçülük və güləş yarışlarından canlı reportajlar verdim. Mehmet Sevinç isə karate, taekvando və gimnastikadan canlı reportajlar hazırlayır. Avropa Oyunlarının son gününədək buradayıq. Hər gün Bakıdan 10-12 saat canlı yayım hazırlayırıq”.

Hazırda dünyanın əksər ölkələrində peyk vasitəsi ilə yayımlanan “NTV Spor”un şərhçisi deyir ki, kanal rəhbərliyi Avropa Oyunlarına xüsusi önəm verdiyi üçün canlı reportajlar hazırlanır. Çünki “Bakı-2015” dünyanın ən mükəmməl idman yarışlarından biridir. Eyni zamanda Türkiyə “Bakı-2015”ə böyük nümayəndə heyəti - 186 idmançı ilə qatılıb. Gökhan Çətinbaş hesab edir ki, Avropa Oyunları Olimpiya Oyunlarına yaxın bir idman yarışıdır: “İlk dəfə bu Oyunlar Azərbaycanda keçirilir və görünən odur ki, Avropa Oyunları hər 4 ildən bir keçirilən Olimpiya Oyunlarına çox bənzəyir. Bütün arenalarda maraqlı yarışlar, mübarizələr gedir. Asiya Oyunlarında bu qədər idman növləri yoxdur. Aralıq dənizi Oyunlarında isə Olimpiya Oyunlarına lisenziya qazanmaq üçün yaradılan imkan çox azdır. Avropa Oyunları isə Braziliyada keçiriləcək Olimpiya Oyunlarına hazırlıq üçün əla fürsətdir. Ona görə ki, rəqabət daha ciddiləşir. Oyunları canlı yayımlamaq isə bizdə xüsusi maraq doğurur, həyəcan yaşayırıq”.

Bakıya ilk dəfə təşrif buyuran Gökhan Çətinbaş paytaxtımızın gözəlliyinə, yollarımızın genişliyinə və müasir tikililərimizə heyran qalıb: “Çox fərəhlənirəm, çox sevinirəm ki, qardaş Azərbaycanın paytaxtı bu qədər gözəldir. İnsanları isə daha möhtəşəm. Bizim türk olduğumuzu duyunca, istənilən köməyi göstərirlər. Bizə hər şeyi başa salır və izah edirlər. Şəhərdə gəzəndə insanın könlü açılır. İdmançılarımız isə şok yaşayırlar. Çünki bütün arenalarda türkiyəli atletlərə inanılmaz dəstək var. Hər yarışda bizim idmançılarımız iştirak edərkən azarkeşlərin böyük dəstəyi onlara mübarizədə əlavə stimul verir. Atletlərimiz də qalib gələrkən həm Azərbaycan, həm də Türkiyə bayrağını başları üzərinə qaldırırlar. Gənc güləşçilərimizin çoxu deyir ki, biz bu qədər dəstəyi heç öz vətənimizdə görməmişdik. Sanki Türkiyədə keçirilir Avropa Oyunları. Ona görə də bütün Azərbaycan xalqına minnətdarıq”.

Avropa Oyunlarının təşkilatçılığına, yarışların keçirildiyi arenalara gəlincə isə həmkarımız deyir ki, təhlükəsizlik tədbirləri ən yüksək səviyyədədir. Hər dəfə bayıra çıxıb geri döndükdə bir daha yoxlama aparılır və bu bizim təhlükəsizliyimizin təminatı üçün çox yaxşıdır. Arenalarda reportajlar aparmaq üçün ən müasir texniki avadanlıqlar quraşdırılıb. Səs, işıq effektləri çox mükəmməldir. Su İdmanı Sarayı, Gimnastika Mərkəzi, Heydər Əliyev adına İdman Sarayı, “Kristal Zal” və digər arenalarda Olimpiya Oyunlarının keçirilməsi üçün hər cür şərait var”.

Gökhan əksər əcnəbi jurnalistlər kimi Olimpiya kəndində qalır. Orada yaradılmış şəraiti isə çox bəyənib: “Bu məkan çox gözəl hazırlanıb. Heç bir narahatlığımız yoxdur. İstirahətimiz üçün əla şərait var. Atletlər kəndi də bizə yaxındır. Ümumiyyətlə, Azərbaycan dövləti Bakıya gələn hər bir idmançı və media nümayəndəsi üçün inanılmaz imkanlar yaradıb”.

Rəşad BAXŞƏLİYEV,

Azərbaycan.- 2015.- 20 iyun.- S. 7.