Azərbaycan ilə İsveçrə arasında siyasi, iqtisadi, mədəni

sahələrdə yaxşı əməkdaşlıq mövcuddur

Azərbaycan Milli Məclisinin sədr müavini Bahar Muradovanın başçılıq etdiyi nümayəndə heyəti İsveçrəyə səfəri çərçivəsində bir sıra görüşlər keçirib.

Paytaxt Berndə növbəti görüş İsveçrə Xarici İşlər Nazirliyinin dövlət katibi Yves Rossie ilə olub.

Dövlət katibi Azərbaycan ilə İsveçrə arasında siyasi, iqtisadi, mədəni və digər sahələrdə yaxşı əməkdaşlığın mövcud olduğunu söyləyib. O, parlamentlərarası əlaqələrin inkişafına dair göstəricilərin də məmnunluq doğurduğunu bildirib.

Yves Rossie İsveçrənin Azərbaycanın ərazi bütövlüyünü dəstəklədiyini, ölkəsinin Ermənistan-Azərbaycan, Dağlıq Qarabağ münaqişəsinin sülh yolu ilə həllinə qarşı yönələcək hər hansı addımların əleyhinə olduğunu qeyd edib. O deyib: “Beynəlxalq hüquq baxımından vəziyyət aydındır. Təəssüflər olsun ki, beynəlxalq aləmdə bu münaqişənin həlli üçün təcili addımlar atılmır. Əlbəttə, hər hansı bir münaqişənin həll olunmaması təəssüf hissi doğurur”.

Bahar Muradova İsveçrəyə səfəri çərçivəsində keçirdiyi görüşlərin böyük əhəmiyyətə malik olduğunu deyib. İki ölkənin parlamentləri arasında əlaqələrin inkişafından danışan Milli Məclis sədrinin müavini qanunverici orqanlarda fəaliyyət göstərən dostluq qruplarının bu əməkdaşlığın dərinləşməsinə verdiyi töhfəni xüsusi vurğulayıb. Bahar Muradova Ermənistan-Azərbaycan, Dağlıq Qarabağ münaqişəsinin sülh yolu ilə nizamlanması prosesinə Ermənistanın mane olduğunu, bu ölkənin status-kvonu saxlamağa cəhd etdiyini, uydurma yalanlarla bütün dünyanı aldatmağa çalışdığını diqqətə çatdırıb. Azərbaycan Prezidenti İlham Əliyevin İsveçrə ilə münasibətlərin daha da inkişaf etdirilməsinə diqqət yetirdiyini deyən Bahar Muradova dövlət başçılarının qarşılıqlı səfərlərinin əhəmiyyətindən danışıb.

Sonra Azərbaycan nümayəndə heyəti Bern Şəhər Meriyasında olub. Şəhər meri Aleksandr Çeppet İsveçrə paytaxtının tarixi, onun bugünkü həyatı və meriyanın yerləşdiyi tarixi bina haqqında məlumat verib. Azərbaycan-İsveçrə əlaqələrinin, xalqlarımız arasındakı münasibətlərin bundan sonra daha da inkişaf edəcəyinə əminlik ifadə olunub.

Milli Məclis adından Bern şəhərinin merinə xatirə hədiyyələri təqdim edilib.

Azərbaycan.-2015.- 7 mart.- S.3.