Qeyri-neft sənaye sektoru əsasən regionlarda inkişaf edir

Məlumdur ki, Azərbaycan iqtisadiyyatının dinamik və hərtərəfli inkişafının təmin edilməsi üçün son 10 ildə ciddi islahatlar keçirilib, ölkənin neft ixracından asılılığını azaltmaq, əsas ağırlığı qeyri-neft sektoruna vermək üçün mühüm işlər görülüb. Nəticədə son illər qeyri-neft sektorunda istehsal nəzərəçarpacaq dərəcədə artıb. Bununla belə, qeyri-neft sektoruna dövlət səviyyəsində diqqət, qayğı və dəstək azalmır.

Prezident İlham Əliyev Nazirlər Kabinetinin 2014-cü ilin sosial-iqtisadi inkişafının yekunlarına və qarşıda duran vəzifələrə həsr olunmuş iclasında bir daha qeyri-neft sektorunun əhəmiyyətini qeyd edərək demişdir: “Ən sevindirici hal ondan ibarətdir ki, qeyri-neft sektorumuz 7 faiz artmışdır. Bu da son illər ərzində görülən işlərin bariz nümunəsidir, aparılan siyasətimizin təzahürüdür. Qeyri-neft sektoru gələcəkdə Azərbaycanın iqtisadi inkişafını daha da böyük həcmdə təmin edəcəkdir. Qeyri-neft sektorunun inkişafı bizə imkan verir ki, ölkə iqtisadiyyatı çoxşaxəli şəkildə inkişaf etsin və iqtisadiyyatımızın dayanıqlı inkişafını təmin etsin”.

Qeyri-neft sektorunun inkişafında sənayenin rolu danılmazdır. Təkcə son illər sənayenin qeyri-neft bölməsi üzrə 124 layihənin maliyyələşdirilməsinə 380 milyon manat güzəştli kredit verilib. Bunun nəticəsində bir sıra sənaye məhsulları üzrə idxaldan asılılıq azalıb, bəziləri üzrə isə ixrac potensialı yaranıb. Yalnız ötən il 230-dan çox sənaye müəssisəsi açılıb, mövcud sənaye müəssisələrinin istehsal gücləri artıb, 5 elektrik stansiyası istifadəyə verilib. Bu gün tikinti materiallarından sement, gips, hörgü blokları, metal konstruksiya, boya və s.-nin istehsalı daxili tələbatı ödəməyə imkan verir.

Cari ilin ilk ayı da sənaye sektoru üçün uğurlu olub. Belə ki, yanvar ayında sənayedə istehsal olunan malların və göstərilən xidmətlərin həcmi 1,4 faiz artaraq

1 milyard 780,2 milyon manat təşkil edib. Bu sektorun özəl bölməsində istehsalın həcmi ümumi sənaye məhsulunun 71,5 faizini təşkil edib. Qeyri-neft sənaye məhsullarının ən çox artımı içki, kimya sənayesi məhsulları, rezin və plastmas, hazır metal məmulatları, tikinti materialları, mebel, elektrik avadanlıqları, avtomobil və qoşqu istehsalında müşahidə edilib.

Yeri gəlmişkən qeyd edək ki, keçən il ölkənin sənaye sahələrində çalışan muzdlu işçilərin sayı 2013-cü illə müqayisədə 0,3 faiz artaraq 183,7 min nəfər olub. Onların orta aylıq əməkhaqqı 9,7 faiz artaraq 711,5, qeyri-dövlət sənaye müəssisələrində işçilərin orta aylıq əməkhaqqı 14,7 faiz artaraq 863,9 manata çatıb.

Qeyri-neft sektorunun bölgələrdə inkişafını təmin etmək üçün çox işlər görülüb. Təsadüfi deyil ki, dövlət başçısı sənaye infrastrukturunun məhz bölgələrdə yaradılmasına xüsusi önəm verir. Prezident İlham Əliyevin “Mingəçevir Yüksək Texnologiyalar Parkının yaradılması haqqında” fərmanı, “Mingəçevir Sənaye Parkının yaradılması haqqında” və “Mingəçevir Sənaye Parkının fəaliyyətinin təmin edilməsi ilə bağlı tədbirlər haqqında” sərəncamları da bundan irəli gəlir. Mingəçevir şəhərində yeni yaradılacaq müəssisələr təkcə şəhərin deyil, eləcə də ölkənin iqtisadi inkişafına yeni güc qatacaq. Bu sənədlər eyni zamanda şəhər əhalisinin işlə təmin olunmasında və onların sosial rifahının yaxşılaşmasında mühüm rol oynayacaq. Bunlardan əlavə, Prezident İlham Əliyev 2 fevral 2015-ci ildə “Neftçala Sənaye Məhəlləsinin yaradılması haqqında” sərəncam imzalamışdır ki, bu da qeyri-neft sənaye sektorunun bundan sonra da əsasən regionlarda inkişaf etdiriləcəyindən xəbər verir.

Rüstəm KAMAL,

Azərbaycan.-2015.- 8 mart.- S.1.