Bakıda III Beynəlxalq “Caspian Energy Forum–2015” keçirilib

Martın 11-də Bakıda III Beynəlxalq “Caspian Energy Forum–2015” keçirilib. Forum Azərbaycan Respublikası Energetika Nazirliyinin, Azərbaycan Respublikası Dövlət Neft Şirkətinin (SOCAR) və Caspian European Club-un dəstəyi ilə baş tutub.

AZƏRTAC xəbər verir ki, forumda çıxış edən “Caspian European Club”un baş icraçı direktoru Telman Əliyev tədbirin keçirilməsində əsas məqsədin biznes-dövlət ünsiyyətinin yaradılması olduğunu deyib. “Bundan əvvəlki iki forum Bakıda təşkil olunmuşdu. Belə forumlar dünyanın 50 ölkəsində keçiriləcək. Ümid edirik ki, bu forum da uğurlu olacaq”, - deyə T.Əliyev bildirib.

“Caspian Energy” jurnalının 100-cü buraxılışının 2016-cı ildə işıq üzü görəcəyini deyən “Caspian European Club”un baş icraçı direktoru bu münasibətlə dövlət səviyyəli beynəlxalq tədbirin təşkil olunacağını qeyd edib.

Sonra forum öz işini sessiyalarla davam etdirib.

Milli Məclisin sədr müavini, parlamentin təbii ehtiyatlar, energetika və ekologiya komitəsinin sədri Valeh Ələsgərovun moderatorluğu ilə keçirilən birinci sessiyada ekologiya və təbii sərvətlər nazirinin müavini Firdovsi Əliyev “Azərbaycanın enerji siyasətinin ətraf mühit aspektləri” mövzusunda məruzə ilə çıxış edib. Azərbaycanın ekologiya siyasəti və görülən işlər haqqında məlumat verən nazir müavini bildirib ki, ötən dövrdə 122 min hektar ərazidə yeni meşə sahələri salınıb.

Sessiyada “Azersun Holding”in Müşahidə Şurasının sədri Abdulbari Gözəl, Akkord Sənaye, Tikinti, İnvestisiya Korporasiyasının baş direktoru Göksel Aybek və başqaları çıxış edərək forumun keçirilməsinin əhəmiyyətindən danışıblar.

SOCAR-ın geologiya, geofizika və yataqların işlənməsi üzrə birinci vitse-prezidenti, akademik Xoşbəxt Yusifzadənin sədrliyi ilə keçirilən forumun ikinci sessiyasında “Müstəqillik illərində Azərbaycanda neft sənayesinin nailiyyətləri və gələcək perspektivləri” mövzusunda fikir mübadiləsi aparılıb.

Sessiyada çıxış edən akademik X.Yusifzadə Azərbaycanın neft və qaz sənayesinin tarixindən, həm karbohidrogen ehtiyatlarının, həm də qoyulan sərmayələrin həcminə görə dünyanın ən iri sazişləri sırasına aid edilən “Əsrin müqaviləsi”nin əhəmiyyətindən danışıb. Bildirilib ki, 1997-ci ilin noyabrından bu ilin əvvəlinədək “Azəri-Çıraq-Günəşli” yataqlar bloku üzrə hasil edilən 360 milyon ton neftin 196 milyon tonu mənfəət nefti kimi Azərbaycanın payına düşüb.

X.Yusifzadə Azərbaycan neftinin dünya bazarına çıxarılmasında əhəmiyyətli rola malik Bakı–Tbilisi–Ceyhan (BTC) əsas ixrac neft boru kəmərindən də danışıb. O bildirib ki, kəmər istifadəyə verilən gündən indiyədək BTC ilə 260 milyon ton Azərbaycan nefti dünya bazarına yola salınıb.

SOCAR-ın birinci vitse-prezidenti Azərbaycanın iştirakı ilə reallaşdırılan TANAP, TAP və “Şahdəniz” layihələrindən, o cümlədən də Dövlət Neft Şirkətinin xarici ölkələrdəki fəaliyyətindən söhbət açıb.

Sessiyada SOCAR Fugro LLC-nin baş direktorunun müavini Fikrət Əliyevin “SOCAR Fugro LLC-nin fəaliyyəti”, Caspian Wireline Services LTD-nin baş icraçı direktoru Kelvin Uilsonun “Neft quyularında geofiziki alətlərin üstünlükləri ”, SOCAR Polymer MMC-nin baş direktoru Fərid Cəfərovun “Azərbaycan qlobal sənaye istiqamətləri kontekstində” mövzularında məruzələri dinlənilib.

Qeyri-neft sektorunun inkişafına həsr edilən və Milli Məclisin iqtisadi siyasət komitəsinin sədri, akademik Ziyad Səmədzadənin moderatorluq etdiyi forumun üçüncü sessiyasında isə maliyyə-bank, sığorta, lizinq, telekommunikasiya, turizm və digər sahələrə innovasiyaların tətbiqi, eləcə də biznesin aparılması, biznes-hakimiyyət dialoqunun yaradılması məsələləri müzakirə olunub.

Sessiyalar həm mühazirə, həm də diskussiya formasında keçirilib.

Tədbirdə Azərbaycanın, habelə Xəzər-Qara dəniz və Baltik regionları ölkələrinin dövlət strukturlarının, nazirlik, komitə və idarələrinin rəhbərləri, ölkəmizdə akkreditə edilmiş diplomatik və beynəlxalq missiyaların nümayəndələri, iri beynəlxalq şirkətlərin rəhbərləri iştirak ediblər.