Əjdərbəy məscidində görüş

Pakistan Prezidenti Məmnun Hüseynin Azərbaycana rəsmi səfəri

Pakistan İslam Respublikasının Prezidenti Məmnun Hüseyn martın 13-də Bakıdakı Əjdərbəy məscidində olub.

AZƏRTAC xəbər verir ki, Pakistan dövlətinin başçısı məsciddə Qafqaz Müsəlmanları İdarəsinin (QMİ) sədri şeyxülislam Allahşükür Paşazadə ilə görüşüb.

Allahşükür Paşazadə görüşdə ölkələrimiz və xalqlarımız arasındakı dostluq və qardaşlıq münasibətlərindən danışıb. Qeyd edib ki, Azərbaycan və Pakistan prezidentlərinin dostluq münasibətləri xalqlarımız arasındakı əlaqələrin təzahürüdür.

Şeyxülislam vurğulayıb ki, Pakistanın Ermənistan-Azərbaycan, Dağlıq Qarabağ münaqişəsində tutduğu mövqe xalqımız tərəfindən yüksək qiymətləndirilir.

Prezident Məmnun Hüseyn Azərbaycana səfərindən, keçirdiyi çoxsaylı görüşlərdən, ölkəmizdə müşahidə etdiyi inkişaf prosesindən məmnunluğunu bildirib.

Azərbaycan.-2015.- 14 mart.- S.2.