İti zəkaya, yüksək intellektə malik insan

Adətən, insan əsasən, ailədə ata-anadan, məktəbdə müəllimlərindən tərbiyə alır. O həyatı boyu daim valideynlərinə və müəllimlərinə oxşamağa, onların insani keyfiyyətlərini, ən yaxşı xarakter və təlimlərini mənimsəyib bəhrələnərək öz şəxsi həyatına tətbiq etməyə çalışır. Bu cəhətdən həyat Habilə çox münbit şərait qismət etmişdi. Onun valideynləri: anası Səidə xanım və atası Surxay Qurbanov respublikamızın görkəmli müəllimləri, ziyalıları, maarif xadimləri idi. Habilin şəxsiyyət kimi həyata, xalqına yararlı və ali bir insan kimi formalaşmasında müəllim-valideynlərin rolu böyük olmuşdur. Atası Surxay müəllim iki institut bitirmişdi, çox mehriban insan, həddindən artıq məsuliyyətli, xeyirxah, ciddi, özünə qarşı tələbkar idi, daim inkişaf etməyə çalışırdı. Mütəmadi mütaliə etdiyinə görə, dünya ədəbiyyatnı gözəl bilirdi. Bu insan böyük vətənpərvər idi. O, İkinci Dünya müharibəsinin - 1941-ci ilin ilk günlərindən 1945-ci il qalibiyyətinə qədər faşistlərlə vuruşmuş, fədakarlıq, cəsarət, mərdlik nümunəsi göstərib orden və medallarla təltif olunmuş, vətənə qayıdıb, məsul işlərdə fəaliyyətini davam etdirmişdir.

Habili uşaqlıqdan yaxşı tanıyıram, onun həyat fəaliyyətini uzun illərdir mişahidə edirəm. Zəhmətkeşliyi, alicənablığı, yüksək mədəniyyəti, ziyalılığı, sadəliyi, insanpərvərliyi ilə həqiqətən, o, atasının - mərhum Surxay Qurbanovun xüsusiyyətlərini, hətta onun qamətini, mülayim xasiyyətini, həzin səsini də özündə əks etdirir.

Habil zəngin mənəvi dünyası, böyük xeyirxahlığı, diqqəti ilə bütün tanıyanları həmişə heyrətə gətirən təvazökar və nəcib bir insandır. Öna görə insanlar - böyüklər də, kiçiklər də onu çox sevir, onunla təmasda olmağa, həzin, mehriban səsini eşitməyə həmişə can atırlar.

Habil ailədə, qohum-əqrəba arasında da böyük nüfuz sahibinə malikdir. Onların hər birinə məhəbbət, diqqət və qayğı ilə yanaşır. Həyat yoldaşı Yeganə xanıma, uşaqlarına və nəvələrinə hər cür qayğı göstərir. O, nümunəvi ailə başçısı, ata, babadır - onları həyatı qədər sevir, mən bunun canlı şahidiyəm. Bu cəhətdən də o atasının gözəl davamçısıdır. Çünki Surxay müəllim də anası Qərənfil xanımı və atası İmanqulunu çox incə məhəbbətlə sevib, onların ehtiramını yüksək səviyyədə saxlayırdı.

Habil yüksək intellektə, iradəyə malik çox zəhmətsevər insandır. O, elm sahəsində həmişə böyük nailiyyətlər qazanmışdır. Azərbaycan Dövlət Pedaqoji İnstitutunu fərqlənmə diplomu ilə bitirib, Volqoqrad istintaq məktəbində təhsil alaraq iki ixtisas sahibi olmuşdıır. Bunlarla kifayətlənməyərək elmi araşdırmalarla məşğul olmuşdur. Bunun da nəticəsində çoxsaylı monoqrafiyaların, dərsliklərin, elmi əsərlərin müəllifidir. Moskvada əvvəlcə elmlər namizədi, sonra doktorluq dissertasiyasını müdafiə edib. Azərbaycan Respublikası Prezidenti yanında Ali Attestasiya Komissiyasında elmlər doktoru kimi alimlik dərəcəsinin təsdiqini alıb, professor elmi adına layiq görülüb.

Habil Qurbanov müxtəlif vaxtlarda bir çox müdafiə şuralarının üzvü olmuş, öz ixtisası ilə bağlı ali məktəblərdə müəllim işləmiş, Avropa Humanitar Elmlər Akademiyasının, Türk Dünyası Araşdırmaları Uluslararası Elmlər Akademiyasının üzvü seçilmişdir. Hüquq elmləri doktoru, professor Habil Qurbanov uzun müddət Azərbaycan Respublikasının Prezidenti yanında Ali Attestasiya Komissiyasının eksperti olmuşdur. Bu faktları xeyli dərəcədə uzatmaq olar. Lakin elə bunlar da Habil müəllimin məhsuldar elmi və praktik fəaliyyətinin miqyasını anlamağa imkan verir. Ağdam rayonunda doğulub, orada tam orta təhsil almış Habil Qurbanovun qazandığı uğurlar onun müəllimləri, valildeynləri üçün əlbəttə, qürur doğuracaq nailiyyətlər idi.

Tam səmimiyyətlə etiraf edirəm ki, mən Habili özümə əziz dost bilirəm, o, yüksək insani keyfiyyətlərə malik, çox səmimi və mərd insandır. Mənim üçün bu xüsusiyyətlərdən ən dəyərlisi Habilin dostluğa olan sədaqətidir. Səmimilik, sədaqətlilik isə insan mənəviyyatının ən yüksək göstəricisidir.

Bəlkə bir az pafoslu görünəcək, amma mütləq deməliyəm ki, şəxsən mənim üçün insanın içində olan və həm də səmimi olan vətən, millət sevgisi hər şeydən öncədir. Bu keyfiyyət bir də ondan qaynaqlanır ki, Azərbaycan bir müstəqil dövlət kimi kövrəkdir, biz bir çox istiqamətlərdən bu dövlətin tam möhkəmlənməsi üçün hələ çox iş görməliyik. Habil müəllimin içində vətən və millət sevgisinin alovlarını görmüşəm. Və bir də onu görmüşəm ki, onun Azərbaycan sevgisi Qarabağdan, Ağdamdan keçir. Onda mənim də qəlbimdə bu adama qarşı minnətdarlıq dolu bir hörmət, bir sayğı yaranır.

Hərdən düşünürəm ki, bu qədər dolu və bir az da mürəkkəb bir həyatı - yad ölkələrdə təhsil, müxtəlif vəzifələr, Qarabağ uğrunda döyüşmək, üstə gəl neçə-neçə elmi kitablar, elmi məqalələr, min bir işin-gücün içində dostlarına, yaxınlarına qayğılar, hal-əhval tutmağa vaxt tapmaq, dərdini deyil, sevincini paylaşmaq kimi işləri bu adam necə yerinə yetirə bilir?! Yaddaşıma nəzər salıram və Habil müəllimin tərbiyəsinin, işgüzarlığının qaynaqlarını araşdırıram. Bir də zaman və onun çağırışlarına diqqət yetirirəm. Dövrün bu çağırışları isə əsl ziyalının çiyninə çox böyük yük qoyur. Zaman yalnız bu yükü çəkə bilənləri üzə çıxarır, ictimailəşdirir, hamıda onlara sevgi hissi yaradır. Habil Qurbanov təkcə öz ətrafının, dostlarının, tanışlarının, doğmalarının deyil, bütövlükdə ictimai mühitin sevgisinə layiq bir insandır.

Qısa yazımı bitirərək mən görkəmli alim, bir çox nüfuzlu elmi cəmiyyətlərin fəal üzvü professor Habil Qurbanova möhkəm can sağlığı, uzun ömür, elmi- pedaqoji, ictimai fəaliyyətində yeni müvəffəqiyyətlər arzulayıram. O gün olsun ki, o, daha yüksək elmi adlara və rütbələrə layiq görülsün, bir-birinin ardınca sevimli nəvələrinin toy məclislərində iştirak etsin.

Hamımızın ürəyimizdə olan ümdə arzu tezliklə çin olsun - gözəl Qarabağımıza Böyük Qayıdış olsun, füsunkar Ağdamda və erməni faşistlərinin işğalı altından azad olmuş başqa dilbər məkanlarımızda da əl-ələ verib quruculuq işləri ilə məşğul olaq.

Adilə NAMAZOVA,

akademik, əməkdar elm xadimi,

Dövlət mükafatı laureatı

Azərbaycan.-2015.- 14 mart.- S.7.