Azərbaycan idmanında yeni era başlanır

Avropa Oyunlarına 41 gün qalır

Dünyanın diqqəti yenə də Azərbaycana, onun paytaxtı Bakıya yönəlib. 1994-cü ildən üzübəri dəfələrlə belə olub. Müəllifi ümummilli lider Heydər Əliyev olan yeni neft strategiyasının reallaşmağa başlamasını - “Əsrin müqaviləsi”nin imzalanmasını, Bakı-Tbilisi-Ceyhan əsas ixrac neft kəmərinin təməlinin qoyulmasını və Prezident İlham Əliyevin iştirakı ilə bu boru xəttinə ilk neftin vurulmasını, “Cənub” qaz dəhlizi ilə bağlı, eləcə də müxtəlif mövzularda keçirilən onlarca digər önəmli beynəlxalq tədbiri dünyanın bir çox ölkələrində maraqla izləyiblər. Bu dəfə növbə daha bir mötəbər idman tədbirinin - “Bakı-2015” Birinci Avropa Oyunlarınındır.

Birinci Avropa Oyunlarının Bakıda keçirilməsi qərarı ölkəmizdə idmanın prioritetlərdən biri olduğunu, əslində yeni bir inkişaf mərhələsinə çatdığını təsdiqləyir.

Azərbaycanda idmanı qədim zamanlardan sevirlər. Yay atan, qılınc oynadan, at çapan igidlər, pəhləvanlar haqqında rəvayətlər hələ də yaşayır. Sovet dönəmində də fərqlənən, qələbələr qazanan idmançılarımız az olmayıb. Lakin onların uğurları öz adımıza yazılmayıb. Onları Azərbaycan idmançısı kimi deyil, SSRİ idmançısı kimi təqdim edib və tanıyıblar. İdmançılarımız qələbə qazanıb Olimpiya çempionları olanda da, qızıl, gümüş medallar alanda da nə Azərbaycanın bayrağı yada düşüb, nə də himni...

20 ildən çoxdur ki, idman sahəsi qarşısında da ölkəmizdə geniş üfüqlər açılmaqdadır. Milli Olimpiya Komitəsinin yaradılması ilə Azərbaycanda idmanın inkişafına yönəldilən tədbirlər konkret istiqamət aldı. Bir-birinin ardınca yeni-yeni nailiyyətlər əldə olundu. Qısa zamanda Azərbaycan idmanı elə bir inkişaf pilləsinə çatıb ki, artıq burada bir çox idman növləri üzrə beynəlxalq turnirlər, Avropa və dünya birincilikləri uğrunda yarışlar keçirilir.

Son 12-13 ildə Azərbaycan hətta onlarca beynəlxalq idman yarışına ev sahibliyi edib. Bundan əlavə, ölkə idmançıları dünyanın müxtəlif yerlərində keçirilən çempionatlarda və Olimpiadalarda iştirak edərək uğurlar qazanıblar. Təkcə keçən XXX London Yay Olimpiya Oyunlarında 2 qızıl, 2 gümüş və 6 bürünc medalın qazanılması bunu bir daha təsdiqləyir. Neçə-neçə mötəbər yarışda idmançılarımız ölkələrin tutduğu yeri göstərən cədvəllərdə Azərbaycanın adını irəli çəkiblər.

Yeri gəlmişkən qeyd edək ki, indi Azərbaycanda nəinki sağlam insanlar, hətta müəyyən fiziki qüsuru olanlar da idmanla fəal surətdə məşğul olurlar. Dünyanın idman həvəskarlarına neçə-neçə Azərbaycan paraolimpiyaçısının adı yaxşı tanışdır. Qazandıqları hər önəmli qələbədən sonra Prezident İlham Əliyev onları qəbul edir, dinləyir, mükafatlandırır.

Təsadüfi deyil ki, dövlət başçısı Birinci Avropa Oyunlarının Azərbaycanda keçirilməsinin əsas səbəbləri sırasında idmançılarımızın uğurlu çıxışlarını da qeyd etmişdir. Həmin səbəblərdən biri də ölkədə yaradılmış idman infrastrukturudur.

İndi Azərbaycan paytaxtından ölkənin şərqinə və qərbinə, şimalına və cənubuna doğru getdikcə az qala hər bölgədə Olimpiya idman komplekslərinə, yaxud digər müasir idman qurğularına, meydançalarına rast gəlirsən. “Bakı-2015”in ərəfəsində bu infrastruktur daha da genişləndirildi və təkmilləşdirildi.

Tədbirə hazırlıq mütəşəkkil surətdə başa çatdırıldı. Bu işdə Birinci Avropa Oyunları Təşkilat Komitəsinin sədri, Azərbaycanın birinci xanımı, UNESCO-nun və ISESCO-nun xoşməramlı səfiri, Milli Məclisin deputatı Mehriban Əliyevanın böyük zəhməti olmuşdur.

Hələ bu ilin aprel ayında Nazirlər Kabinetinin birinci rübün sosial-iqtisadi inkişafının yekunlarına və qarşıda duran vəzifələrə həsr olunan iclasında Prezident İlham Əliyev demişdir: “İdman obyektlərimiz demək olar ki, hazırdır. Keçən ay biz Bakı Olimpiya Stadionunun və Bakı Atıçılıq Mərkəzinin açılışını qeyd etdik. Su İdmanı Sarayında son tamamlama işləri gedir. Heydər Əliyev adına İdman-Konsert Kompleksində təmir işləri başa çatır. Bulvarda yerləşən idman sarayında da işlər yekunlaşır. Bildiyiniz kimi, həm yeni idman obyektləri yaradılır, həm əvvəlki illərdə yaradılan obyektlər əsaslı şəkildə təmir olunur, əslində yenidən qurulur”.

Bu obyektlər sırasında təmir-bərpa işləri başa çatdırılan Tofiq Bəhramov adına stadion, eləcə də idman yarışlarının keçiriləcəyi “Crystall Hall”, Mingəçevirdəki Kür avarçəkmə bazası, Atletlər Kəndi və digər idman qurğuları var.

Bakıda Avropa Oyunları Parkı da yaradılıb. Bütün bunlar bir daha göstərir ki, Azərbaycanda idmanın inkişafı yeni mərhələyə qədəm qoyub. Daha dəqiq ifadə etsək, Azərbaycanda idmanın yeni epoxası başlanıb. Dövlət başçısı qeyd edib ki, Avropa Oyunları Parkı müvəqqəti idman qurğusu kimi nəzərdə tutulsa da, tədbir qurtarandan sonra da qalmalıdır. Çünki qarşıda bizi daha bir mötəbər idman yarışı gözləyir. 2017-ci ildə Bakıda İslam Həmrəyliyi Oyunları keçiriləcək.

Bu qərar da çox söz deyir. Bu o deməkdir ki, Azərbaycanda digər sahələr kimi, idman da getdikcə irəliləyir, uğurdan-uğura, qələbədən-qələbəyə doğru gedir.

Flora SADIQLI,

Azərbaycan.-2015.- 2 may.- S. 1;8.