Azərbaycan və Serbiyanın hakim partiyaları arasında əməkdaşlığa dair memorandum imzalanıb

Mayın 4-də Yeni Azərbaycan Partiyasının (YAP) Mərkəzi Qərargahında Azərbaycan Baş nazirinin müavini, YAP-ın sədr müavini, icra katibi Əli Əhmədov ölkəmizdə səfərdə olan Serbiya Tərəqqipərvər Partiyasının nümayəndələri ilə görüşüb.

AZƏRTAC xəbər verir ki, görüşdə Əli Əhmədov iki ölkə arasındakı əlaqələrdən danışıb. O bildirib ki, Azərbaycan-Serbiya münasibətləri inkişaf etməkdədir. Ötən ay Serbiyanın Tərəqqipərvər Partiyasının sədri, bu ölkənin baş naziri Aleksandr Vuçiçin Azərbaycana səfərini xatırladan Əli Əhmədov qarşılıqlı səfərlərin əməkdaşlığın daha da inkişaf etdirilməsində böyük rolunu vurğulayıb.

Baş nazirin müavini qeyd edib ki, Serbiya Tərəqqipərvər Partiyasının nümayəndələrinin ölkəmizə səfəri iki partiya arasındakı dostluq münasibətlərinin etibarlı təməlini yaradacaq. Eyni zamanda, bu səfər qonaqların Azərbaycanla daha yaxından tanış olmasına imkan verəcək.

Serbiya Tərəqqipərvər Partiyasının beynəlxalq əlaqələr katibi, Avropa inteqrasiyası məsələləri üzrə portfelsiz nazir xanım Yadranka Yoksimoviç Azərbaycanda olmaqdan məmnunluğunu diqqətə çatdırıb. O qeyd edib ki, bu səfər ikitərəfli münasibətlərimizin yüksək səviyyəsinin bariz nümunəsidir. Qonaq partiyalar arasında dostluq əlaqələrinin yaradılmasının vacibliyindən danışıb.

Daha sonra YAP ilə Serbiya Tərəqqipərvər Partiyası arasında gələcək əməkdaşlığa dair memorandum imzalanıb.

Əli Əhmədov qeyd edib ki, YAP-ın dostlarının coğrafiyası getdikcə genişlənməkdədir. İki ölkənin hakim partiyaları arasında imzalan sənəd ölkələrimizin münasibətlərinə müsbət təsirini göstərəcək. Baş nazirin müavini Azərbaycanın ərazi bütövlüyünün tanınması ilə əlaqədar dəfələrlə bəyanat vermiş Serbiyanın bundan sonra da bu mövqedə qalacağına əminliyini bildirib.

Azərbaycan.-2015.- 5 may.- S. 5.